1 Khokham" Agripa gi Polu ri Re" shid mo nang dang: tid wa da" akhang" yo" ga: tid. Houg: lang" Polu gi nya: lo, ri yhoin" kaid lho: nya: gung ri nyang: tid khoem yu da. 2 Khokham" Agripa we"- ngoo ri Yuda byumyu" yi yooboo foin: boem da" khyoo: dangain"- akhid" nyid" re" da" shidkhoin" moo ngoo nya: gung ri yo' tid khoem yu da" khyoo: gi nga" shid mo gye" gyi: da" amyeung" akhang" nghoid bye: ein: ngoo myed yu bye:. 3 Khokham" Nang gi Yuda byumyu" da" thung" ri yo' sen: lho: tid ngeug go" da" khyoo: dangain" ri voin: tang: za: si' su: nghoid. Houg: yoomo nga" da" dang: thui: ri nheigloem: sheing: sheing: za: tam" gyo: yu byid: wa shid re" ngoo mho' nyid. 4 Ngoo gi zooyam, pyaid mo khasu" kangso' dei nyid lid lo da" khyoo: ri Yuda byumyu" yi dangain" se' boem ago". Ngoo gi xangshid" ayo, moo ngoo nyang: khu: lo da" moug: moo nyid lho: hau: thang: rigi Yerusalem voomoo" moo nga" da" pyaid goin" nyid lo da" khyoo: ri nyangnu" se' ago". 5 Ngoo gi xangshid" mo nyang- ngoonu" nya: da" noku thung" moo gye" thain: khyo" kangso' dei nyid lid loo bye: su: dayug nghoid. Hau: khyoo: dangain" ri nyangnu" se' too' gu zheung: nghoid boem wigi nga" khyoo: ri nyangnu" sagsi kham nau rigi yo" kham boem wa zi nghoid. 6 Mangso wigi ngoonu" da" phoug" phyid" yi ri byid: to" da" dang: soo" ri" ngoo myed, byu nyid yoomo akhid" ngoo gi he: joyoo moo yab, jo, wigi myid: ca: yu" ziri shau" nyid da. 7 Daxe: eig kung: mo nyangnu" ko' bang: gi hau: dang: soo" ri yo" Kham: yu sho' myed byu nyid boem wigi nyid ri myen" ri Mangsoo ri noku nyid boem. Khokham" phoo' we"- hid: su" myid byu nyid boem da" gang mo ngoo gi Yuda byumyu" yi wigi yooboo foin: zi shau" nyid. 8 Mangso wigi byu yi shid re" dei to' loo nhang: ziri age loem" ga: he: khyi moo nyid to" da" nanu" gi khasu" ein: jho: nyid go" la". 9 Ngoo nyang: we' Nazared mo Yesu da" myeing ri gyi, koid da" moozoo" ri ngoo yo" koid yhi' mo koid eung: su: nghoid ein: jho: lo yu" da" byu dayug nghoid. 10 Ngoo gi Yerusalem voomoo" moo houg: su" nyang: koid lid loo bye:. Ngoo gi khainjung agyi moo" yi jhang mo amyeung" ri mho' ci: lho: Mangso byu yi myoo" sho' ri thung: tei" lhoung wigi nyangnu" ri said pyam wa jang" moo we' myed veung" da" lo, bo tu: lo yu" bye:. 11 Yuda tarha" jung joem moo we' nyangnu" ri myoo" sho' lheung: yooboo dam, kaid wigi nyangnu" da" loem" jeing" khyoo: ri ngeug pyam boem wa shid re" ngoo gi gye" yoem: kaid loo bye:. Ngoo gi nyangnu" ri nheig sung yoo: noug yoomo gootu: da" mungdain mo voogung joem khyoo: lang" ju" yhe: wigi nyangnu" ri shen" yhen yu" bye:.

12 Houg: su" koid wa shid re" ngoo gi khainjung agyi moo" yi jhang mo amyeung" ri mho' ci: lho: wigi Damasku voogung khyoo: do, loo" bye:. 13 Khyoolaid' moo do, lo" nyid uri nyid" khyoug, bidnyid" gung tu: ayo, moo Khokham" phoo' we"- bid tho' moo je bang da" bidbang daloem: gi mougkhung: khyo" bang thu' lo wigi nga" da" ayam, aqei: yo' ngoo yo' dage" nghoid mo, da" ayam, aqei: moo bang jo, ziri ngoo myang. 14 Ngoonu" dangain" bang: gi myidjang moo leung, lo" byug boem wigi Hebre" myeing" khyo" Sho" lu- Sho" lu Nang ngoo ri cikoid shen" yhen nyid lha". Nujung loo: gi nya: Aseing da" voosi" zucoin: moo khyid: peug peug, yu ziyo' dakhyoo" ti" nang gi ngoo ri gyi, koid wigi- nanya: gung ri nanyang: noo nhang: da- ga: tid da" thui: ri ngoo shau" gyo. 15 Houg: lang" ngoo gi ?Aseing we"- Nang hang" su: nghoid lha" ein: myid: kaid. Aseing gi nang shen" yhen nyid da" Yesu nghoid? ga: tid. 16 Nghoid loug we' to' lho: so" yhe: loo" we' Nang ri nga" dei, zoo: khyo" nyheung too" wa shid re" nga" gung nang ri toin" shid bye:. Akhid" nyid" ngoo nang ri ce: noem toin" shid bye: da" khyoo: yo' Thang: phyang" ngoo nang ri toin" shid shi" wa khyoo: ri Nang gi subi" gooji yi ri sagsi kham byid: ca" wa zi nghoid da. 17 Ngoo gi Israela byumyu" yi da" lo, mo we' Nang ri ngoo nhang: kaid wa da" tungbau byumyu" da" lo, mo we' nang ri khyoid yu wa zi nghoid. 18 Nang gi nyangnu" da" myojid" ri bang" loo nhang: lho: nyangnu" ri mougcoid khoug: mo zi bidbang khoug: khyoo: satan da" yoemso khoug: mo wigi Mangso yoemso khoug: khyoo: phoug loo nhang: wa nghoid. Hougsu" nyangnu" gi ngoo ri loem" jeing" lo boem khyo" wigi nyangnu" da" yau: noo yooboo joem ri khyoid pyam byid: zi shau" lho: Mangsoo khyen: yu to" da" mo, phung: moo yo" boo mo, bue" loo goo" wa zi nghoid.

19 Hougsu" nghoid yoomo Khokham" Agripa we"- mougkhung: khyo" toin" shid da" myo, myang ri ngoo gi angeug, pyam. 20 Ngoo gi xangshid" ri Damasku voogung moo Yerusalem voomoo" moo hau: thang: ri Yuda mung" goin" jang" moo we' tungbau byumyu" yi ri we' nyangnu" da" yooboo mo nheigloem:" thid lo boem wigi Mangso shoid khyoo: lheung: loo ca"- houg: su" nyangnu" nheigloem: thid' bye: ga: ziri lo, moo" khyo" aved, asam" yo' zei: shug khyo" toin" shid ca- ein: ngoo cang kho" kyoo" bye:. 21 He: khyoo: yoomo Yuda byumyu" yi gi ngoo Noku Yhoem: Moo" moo nyid to" uri re" zheung: myheug yu lho: ngoo ri said pyam wa ga: soin' lo ago". 22 Nghoid loug we' akhid" nyid" ju" sho' Mangsoo gi ngoo ri pang" thoug byid: nyid yoomo hid: moo yab, jo, lho:- gyi: su: ngisu: a ein: loo: yug khang" moo" ri sagsi yo" kham byid: nyid zi nghoid. 23 Meshia gi dayam, dayoo: kham zo: wigi nyang: gi shid: jangmo xangshid" doem dei to' loo su: nghoid ziyo' Yuda byumyu" yi yo' tungbau byumyu" yi ri khyoid yu khyoo: ri tid fu" loo" goo" wa ga: Meshia yo' lapi: yi tid too" khare" ziyo' dakhyoo" ti" ngoo kho" kyo"- ga: tid. 24 Polu gi hid: su" nya: gung ri tid khoem yu nyid uri Festu gi Polu we" ?Nang ko" abye:. Nang gi phajhi" sung jhau" ci: wigi ko" lo" byug bye: nhung:? ga: nyho: tid kaid. 25 Houg: lang" Polu gi phau" myang: da" zoug: phoo' we"- ngoo gi akoo" deingmain" da" khyoo: ri gyeing: gyeing: za: da tid nyid. 26 Khokham" Agripa we"- hau: khyoo: joem ri nang si' gu nghoid yoomo ngoo gi re" da" shidkhoin" moo agyug avoem, looza: tid nyid zi nghoid. Khasu" wim gari he: da" moozoo" gi ajhoin: ajhab mo khoug" soo" lanyham" bue" lo da" moo" anghoid ziri Khokham" phoo' nanyang: se' too" gu nghoid wim bye: ein: ngoo myed loem nyid. 27 Khokham" Agripa we"- Lapi: yi da" jhoem: mungdang: ri nang loem" jeing" la". Nang loem" jeing" nyid ziri ngoo se- ga: tid. 28 Houg: lang" Agripa Polu ri tid zigi daso' dadam da" agyoo: moo nang ngoo ri Khristain yo bui" nhang: wa ein: jho: la"? ga: tid. 29 Polu doem tid zigi daso' dadam ga: nghoid loug we' myang" sho' nghoid, nghoid hau: zigi yhau: gyen: khyoo: anghoid- Khokham" phoo' Nang yo' dage" akhid" nyid nga" dang: ri tam" gyo: nyid bang: dangain" gi Hid: nga" jang coo" doem ri atid noug- ngoo yo' dakhyoo" ti" bue" lo boem wa shid re" Mangsoo ri ngoo akyu" mho' nyid ga: phoug tu". 30 Hau: thang: ri Khokham" Agripa gi mung" zoug: phoo' Bernike yo' gootu: dangain" mo, gi joyoo mo thu yhe: lo" wigi 31 Nyangnu" gi hau: joyoo mo thu' yhe: lo" boem thang: ri byu he: yug gi shid: moin: da" yooboo anghoid lang" myheug lhoung, too" wa da" yooboo gi ci: ashoid nghoid da- ga: nyang: cang" nyang: tid go" nyid ago". 32 Agripa gi Festu ri ?Byu he: yug gi Khosen" pho jhang khyoo: lhid: to' kaid ge" ga: nyang: amho' to" nghoid rigi- nyang: ri ge phoid: nhang: kaid bye: ga: tid.