1 Nyangnu" gi nyang: ri vhu" kaid lho: lhid mo dain: za: gu: yhe: lo" ri Kusa gagyoo: kang khyoo: ju" yhe: lo" boem bye:. Hau: thang: nyid" ri nyangnu" gi Rodo gagyoo: kang khyoo: ju" lo" wigi houg: mo Patara voogung khyoo: ju" yhe: lo" boem bye:. 2 Hau: voogung moo Phonisha mung" khyoo: gu: yhe: loo" wa da" lhid daloem: ri ngoonu" myang wigi hau: lhid tho' moo yhe: do, zhoung: lho: gu: yhe: lo" boem bye:. 3 Ngoonu" gi Kupru gagyoo: kang ri lo" myang. Kaid lang" hau" gagyoo: kang gyid byeung: shoid khyo" gu: gyo" lo" lho: Suri mung" khyoo: gu: yhe: lo" boem bye:. Kid" zi joem ri khyoo, wa shid re" Turu voogung mo gu: khuang" moo lo" theung: boem bye:. 4 Ngoonu" gi voogung mo loem jeing" bang: dayham" ri lo" shau" myang go" lho: nyangnu" yo' labain daloem: lo" theung: nyid bye:. Hau: loem" jeing" bang: gi gyeungshang: da" Venyi: yoemso khyo" wigi Polu ri Yerusalem voomoo" khyoo: ayhi: wa shid mo tid ago". 5 Nghoid loug we' nyangnu" yo' shau" theung: nyid da" ayo, bidnyid thang lang" ngoonu" gi houg: mo thu' lho: yhe: lo" boem bye:. Ngoonu" dangain" mo, gi nyangnu" yhoem: seing: myhi' yi yo' zooshang: bang: dangain" we' voogung tung: gung khyo" gyid yam, moo ju" sho' ngoonu" ri re" de" kaid boem ago". Hau: khyi moo ngoonu" dangain" mo, poid' thug thoug lho: akyu" coem mho' boem bye:. 6 Hau: thang: ri ngoonu" gi dayug yo' dayug nyang: cang" nyang: bain vhu" goo" lang" gi ngoonu" gi lhid khoug: moo yhe: do, zhoung: lho: wigi nyangnu" gi yhoem: khyoo: doem tau" lo" ago". 7 Ngoonu" gi Turu voogung mo doem xo' gu: lo" wigi Patoleme voogung moo ju" lo" boem bye:- ngoonu" gi hau: voogung mo loem" jeing" bang: ri lo, zei: zei: being" si' go" lho: nyangnu" yo' danyid" yhe: theung: nyid bye:. 8 Hau: thang: nyid ri ngoonu" gi hau: voogung mo doem to' lo" wigi kesare voogung moo ju" lo" boem bye:- ngoonu" gi Yerusalem voomoo" mo pang" thoug wa byu nyhed' yug ri zheung: khyen: yu to" jangmo dayug nghoid lho: ngeibu: ludang: gi ri kho" kyoo" su- Philib, da" yhoem: moo yhe: theung: nyid boem. 9 Philib, gi yhoem: ayoo" shi" da" myiyi: zoo: myed: yug yo' nyangnu" gi Mangso mungdang: ri tid fu" nyid mo, nghoid ago". 10 Ngoonu" gi hau: yhoem: moo myang" sho' theung: nyid thang: ri Yuda mung" mo Agapu ga: da" lapi: dayug ju" re" da. 11 Nyang: gi ngoonu" jhang moo ju" ri" lang" Polu da" phyid" cu" ri yu lho: hau: ze wigi nya: khyid: yo' lo, joem moo tei" da. Hau: lho: nyang: gi he: phyid" cu" seing: ri Yuda byumyu" yi wigi Yerusalem voomoo" moo hidsu" tei" joeb, lho: nyangnu" gi nyang: ri tungbau byumyu" yi da lo, moo ab, byid: pyam goo" wa gyeungshang: Venyi: tid? ga: tid da. 12 He: da" dang: ri ngoonu" shau" gyo: boem lang" ngoonu" yo' hau: khyi moo bo nyid bang: dayham" gi Polu ri Yerusalem voomoo" khyoo: ayhi: wa shid re" coem, mho' boem bye:. 13 Nghoid loug we' Polu gi nanu" cenoem wim wigi hid: su" ngau, lho: ngoo ri shoo" byo, nhang: go" lha". Ngoo gi Aseing Yesu gang mo Yerusalem voomoo" moo tei" zi shau" wa shid re" za: we' anghoid- shid: wa zi lang" gi jen" jen" nghoid bye: ga: phoug tu". 14 Ngoonu" gi nyang: ri nookhyab' moo vang sho' ayo" tid loo: yoomo ?Aseing vho: khyo" dajha" nghoid loo: baja"? ga: tid lho: sam zoo: nyid pyam boem bye:. 15 Dayo, zoo: kyo: lo" thang: ri ngoonu" da" zi joem ri soin' nyheung boem, lho: Yerusalem khyoo: yhe: lo" boem bye:. 16 Kasare voogung mo cangzoo: yi dayham" bang: gi ngoonu" yo' dage" cang re" lo boem lho: no" re" phung: byu bue" nyid bye: mo, gi Kupru gagyoo: kang mo Manason ga: su: da" yhoem: khyoo: theing: wa shid mo ngoonu" ri shu" vang yhe: lo" boem ago".

17 Ngoonu" gi Yerusalem Voomoo" khyoo: ju" yhe: boem ri loem" jeing" bang: gi ngeibu: gau yi ziyo' ngoonu" ri lhoem: tau, yu boem. 18 Hau: thang: nyid" ri Polu gi ngoonu" yo' dage" Yaku ri yhe: shau- phung sayen" yi dangain" bang: we' houg: moo nyid ago". 19 Polu gi nyangnu" ri being" si' dang: tid lho: nyang: zei: so' da" moozoo" khyo" wigi tungbau byumyu" yi da" phung: moo Mangsoo koid bye: da" moozoo" joem ja: khang" moo" ri joeb, sho' ludang: ri shed' kyo". 20 Polu tid kyo" da" ludang: joem ri bain shau" gyo: boem lang" nyangnu" dangain" mo, gi Mangsoo ri coung" nghei boem ago". Hau: thang: ri nyangnu" gi Polu ri mangnhung" phoo' Polu we"- Yuda byu yi moo loem" jeing" loo bye: bang: kha myhoo, khyeing" nghoid bye: ziyo' nyangnu" dangain" mo, gi tarha" ri khayhi' ju" sho' cang loo wa shid mo kang: lung bu nyid mo, nghoid ziri nang se' myang gu nghoid. 21 Nang gi tungbau mungdain moo nyid da- Yuda byumyu" yi ri nyangnu" da" myed: zoo: yi ri athang: yham" khyoo: akoid wa ziyo' Yuda thung" tarha" ri acang loo: wa shid re tid yoomo tungbau' mungdain moo nyid da" Yuda yi gi Moshe tarha" ri she: pyam ca" da" khyoo: ri nang jhau" byid: loo bye: ga: tid ziri nyangnu" shau" gyo: ci: boem abye: go". 22 Akhid" khasu" koid wa lha". Nang ju" loo, bye: ga: ziri we' Nyangnu" gi" gi" nyang: shoug" gyoo: goo" wim bye:. 23 Houg: yoomo ngoonu" gi nang ri hidsu" koid nhang: nau. Ngoonu" moo we' Mangso ri dang: soo" byid: to" byu myed: yug nyid ago". 24 Nyangnu" ri shu" lo" lho: kyeung sain' da" khyoo: ri nyangnu" yo' dage" lo" koid we' Nyangnu" gi vhudung: yo" doung: pyam boem wa shid re" nyangnu" kyeung sain da" khyoo: koid da" jang" moo gyoo" eung: da" aphoug" gi nang bo byid: we. Hidsu" koid yoomo Re" khyoo: yo' sen: lho: nyangnu" shau" gyo: da" ludang: joem gi adeung nhung: ga: ziyo' nanyang: we' Moshe da" tarha" ri phau" cang su nghoid nhung: ga: ziri we' yug khang" moo" se' lo" boem wa zi nghoid. 25 Nghoid loug we' loem" jeing" lo da" tungbau yi shid re koem gi yu phara" soolhoo: ri xoin" to' byid: da" zoo: noem yo' suid" yo' leung zeung: mo cu" said da" gougnyhoug shoo" azoo: wa ziyo' gain: tho' zung" da" khyoo: ri jang" pyam boem wa shid re" ngoonu" myid phyid lho: nyangnu" ri foin: da" mougsoug" dakhyab, moo bo lhid" foin: kaid boem bye:. 26 Houg: yoomo Polu gi thang: nyid" hau: byu myed: yug ri shu" yu lho: wigi nyangnu" yo' dage" kyeung sain' khyoo: ri koid yu bye:. Hau: thang: ri nyang: gi Noku Yhoem: Moo" khyoo: vang yhe: lho: kyeung sain' da" ayo, bidnyid dayo, bain wa ziyo' nyangnu" yug khang" mo" shid re" xoin" ngei" byid: wa da" ayo, dayo, nghoid wa da" khyoo: ri tid kyo" too" kho' da.

27 Nghoid loug we' bidnyid nyhed nyid" byeung" loo lang" gi Asia mung" mo Yuda byu yi dayham" bang: gi Noku Yhoem: Moo" moo shau" myang abye: go". Nyangnu" gi mungbyu phung: goin" ziri lhu: nhau" pu: to' kaid lho: Polu ri myheung yu ago". 28 Nyangnu" tid zigi Israela byumyu" yi we"- pang" ge' byu he: yug gi khyi khang" moo" moo cang so" yen" lho: yug khang" moo" ri we' Israela byumyu" yi ri we' Moshe da" tarha" ri we' hid: Noku Yhoem: Moo" ri we' gyi, koid lho: khoug" byid: yen" su: nghoid da. Hau: lho: akhid" we' Noku Yhoem: Moo" khyoo: tungbau byumyu" dayham" ri shu" vang re" wigi hid: yhi gyeungshang: da" joyoo ri avoid avu: koid pyam abye:- ga: neig yo: lho: nyho: nyid ago". 29 (Nyangnu" hidsu" tid nyid boem zigi Polu ri Ephesu voobyu Trophimu ga: su: yo' dage" voogung khoug: moo nyangnu" shau" myang boem wigi hau: yug gi Noku Yhoem: Moo" khyoo: shu" vang re" zi nghoid- ga: nyangnu" jho: boem yoomo nghoid da. 30 Voogung goin" jang" moo mo, thei" mo, yang bue" lo wigi mungbyu yi dangain" bang: gei, zeung: re" boem lho: Polu ri Noku Yhoem: Moo" tung: goung, shoid khyoo: she: khyoid thu' lo" ago". Houg: lang" jang: Noku Yhoem: Moo" khoem" duang: joem ri we' myhed" pyam boem ago". 31 Hau: lho: mungbyu yi gi Polu ri said pyam wa ga: soin' nyid boem da" uri Yerusalem voogung goin" moo mo, thei" mo, yug lu: fu" go" nyid ga: da" ludang: ri Roma gyizoug: moo" ri lo" tid kyo" boem ago". 32 Houg: lang" gyizoug: moo" gi gyizoug: yi dayham" yo' gyizoo: yi ri shu" lho: mungbyu yi nyid da" joyoo khyoo: gei yhe: lo" boem ago". Mung" byu yi gi gyizoug: moo" yo' gyizoo: yi ri lhoem: myang lang- nyangnu" gi Polu ri baid nyid zi theung: lo" ago". 33 Gyizoug: moo" gi Polu jhang khyoo: yhe: lo" lho: myheug yu lho: jang coo" eig khaid yo' tei" too" wa shid re" amyeung" khyo' kaid bye:. Hau: thang: ri gyizoug: moo" gi he: yug hang" nghoid lha". Nyang: ce: noem koid shoid lha". Myed: yu. 34 Mung" byu yi gi daphung daja: ga: zheung: yoid nyho: nyid ago". Hougsu" nyho: lu: fu: go" nyid yoomo gyizoug: moo" gi bue" lo da" Khyoo: ri goolhoo' za: asi yoomo wigi Nya: gyizoo: yi ri Polu ri gyidab, khyoo: shu" loo" goo" wa shid re" amyeung" byid: kaid bye:. 35 Nyangnu" gi gyidab, zoem" lhang: moo ju" loo" yo'- mungbyu yi gi aphoug" akhyoid koid lo boem yoomo gyizoo: yi gi Polu ri nyangnu" da" lo, phyoo" khyo" vu, do, loo" ca" bye:. 36 Mung" byu yi gi nyang: ri said pyam ge"- ga: nya: thang: moo cang rue" lo zoo" re" nyho: boem ago".

37 Gyidab, khoug: khyoo: Polu ri shu" vang loo" wa zi nghoid lang" Polu gi gyizoug: moo" ri Nang ri ngoo dang: da eig khoin" ge tid wa la"? ga: myed:. Houg: lang" gyizoug: moo" gi nang Greek myeing" se' kaid la"? ga: myed:. 38 Hougsu" wigi atoung" myang" shi" ri tu: lhoin" moo" zei: lho: dabung: gyizoo: myed: khyeing" ri vhujhung: shu" koid lo wigi dain" pyoid yoo khyoo: shu" yhe: lo" da- Egutu byu anghoid la"? ga: Polu ri doem myid: yu". 39 Houg: lang" Polu gi Ngoo gi Kiliki mung" Tarshu voogung moo khu: lo da" Yuda byu dayug nghoid. Yhau: gyen: da" voomoo" zeing mo byu dayug nghoid. Jeju yo' ngoo ri mungbyu yi ri dang: tid wa akhang" byid: we' ga: mho' tid. 40 Gyizoug: moo" gi nyang: ri akhang" byid:- hougsu" yoomo Polu gi zoem" lhang: phyoo" moo yab, jo, lho: mungbyu yiri sam: zoo: nyid goo" wa shid re- lo, tu' tu' nyid da- mungbyu yi tam" loo" lang" Polu gi nyangnu" ri Hebre myeing" khyo" tid zi gi