1 Apolo gi Korinthu voogung moo nyid da" uri Polu gi hau: mung" agung khyo" so" lid: lo" wigi Ephesu voogung moo ju" lo". Hau: voo moo nyang: gi loem" jeing" mo, dayham" ri yhe: myang wigi 2 Nyangnu" ri nanu" gi loem" jeing" bang: bue" loo lang" gyeungshang: da" Venyi: ri yo' kham: yu bye: goo" la"? ga: myed.

Nyangnu" gi gyeungshang: Venyi: nyid ga: ziri ngoonu" ashoug" gyo: yu" shi"- ga: phoug tu" ago".

3 Houg: Lang" Polu gi houg: ri nanu" ce: noem babtisma kham: yu go" la"? ga: myed:." Nyangnu" gi Yohan da" babtisma ri kham: yu- ga: tid boem. 4 Polu doem tid zigi Yohan da" babtisma gi nyangnu" da" yooboo mo nheigloem: thid loo wa shid re" nghoid- Yohan gi nya: thang: moo ju" ri wa da" Yesu ga: su: ri loem" jeing" boem wa shid re" Israela mungbyu yi ri tid zi nghoid- ga: tid kyo". 5 He: da" dang: khoin" ri nyangnu" shoug" gyoo: lang" gi nyangnu" Aseing Yesu da" myeing mo babtisma ri zheung: kham: yu boem ago". 6 Polu da" lo, nyangnu" tho' moo ki" byid: lang" gyeungshang: da" Venyi: gi nyangnu" da" atho' moo gyoo" lo wigi nyangnu" gi gooja: myeing" kaid lo boem lho: Mangso mungdang: ri we' lapi: pe: lho: tid lo boem ago". 7 Nyangnu" gi daxe: eig yug koo: nghoid boem ago". 8 Polu gi lhammoo" soem" khyab, koo:- Yuda tarha" jung moo main: main: yhe: lho: wigi mungbyu yi yo' agyug avoem, loo: zheung: tid ngeug go" nyid boem lho: Mangso mungdain: ri se' kham: yu boem, goo" wa shid re" nyangnu" ri kho" kyoo" byid: nyid. 9 Nghoid loug we' nyangnu" mo dayham" bang: gi nheigloem: thain: nyid boem yoomo aloem" jeing" boem nghoid ago". Houg: yoomo nyangnu" gi mungbyu dangain" bang: da" shidkhoin" moo Aseing da" khyoo: ri age khyo" tid phue: pyam byid: boem ago". Houg: yoomo Polu gi loem" jeing" bang: shu" lho: nyangnu" mo zheung: thu' lo" wigi Turanu ga: su: da" phajhi" jung moo nyid" khang" moo" mungdang: ri tid go" koin, da" zoebphoung: ri koid nyid boem ago". 10 Hidsu" eig zain' loem: loem: koid lho: wigi Asia mung" moo zheung: nyid da- Yuda byumyu" yi yo' Tungbau byumyu": yi dangain" mo, gi Aseing da" mungdang: ri zheung: shau" gyo: boem ago".

11 Mangsoo gi Polu khyo" wigi mau" pho" alhoo: again ri zei: shug byid: nyid. 12 Polu ci: da" phajed' yo' pain" phyid" cu" joem rilang"- noo phyoo" shau" mo, yo' yu vang jo, mo, jhang khyoo: ci: yhe: lo" ri noo phyoo" shau" bang: gi ge sain, lo wigi yu joem we' nyangnu" vang nyid mo, jhang mo phang: thu' lo" boem ago". 13 Yu joem ri cang khaid thu yen" da- Yuda byu yi dayham" we' Yu joem ri khaid thu pyam boem wa shid re" Aseing Yesu da" myeing ri lang: lho: koid yu" boem ago". Nyangnu" gi Polu kho" kyo" da" Yesu myeing ri lang: lho: Nang ri ngoo amyeung" khyo ga: akhyeung" da" yu joem ri tid ago". 14 Yuda khainjung zeing Skeva da" nya: zoo: yi nyhed' yug bang: we' houg: su" yhe: koid yu" ago". 15 Nghoid loug we' akhyeung" da" yu gi nyangnu" ri Yesu ri ngoo se' Polu ri we' ngoo se' nanu" loem: hang" nghoid go" ga: myed:. 16 Hau: da" yu vang ci: su: gi nyangnu" ri aphoug" akhyoid koid lho: nyangnu" dangain" bang: ri oung: pyam da- nyangnu" gi dam zheung: dab lo" boem ziyo' hau: yhoem: mo shoocen: doem: phang: thu' lo" boem ago". 17 Ephesu voogung moo nyid da" Yuda byumyu" yi yo' Tungbau byumyu" yi dangain" bang: gi hau: ludang: ri zheung: shoug" gyoo: lang" gyoug lo lho: Aseing Yesu myeing ri je" wigi coung" nghei nyid boem. 18 Loem" jeing" bang: myoo" sho' ju" re" boem wigi nyangnu" zei: shoid lo da" yooboo joem ri mungbyu yi da" shidkhoin" moo bang bang za: yhen: yu boem ago". 19 Fa" zoo: lung' zo: nyid mo, myoo" sho' bang: gi nyangnu" da" mougsoug" pug joem ri zheung: ci: re" lho: mungbyu yi da" shid moo zheung: nghe pyam boem ago". Hau: mougsoug" pug joem da" gu ri soin: yu" boem, ri ngei pyi" wim: moin koo: moin: zi nghoid. 20 Hid: yhang: ti" yoem: moo" bo khyo" Aseing da" mungdang: gi byo sain lo" wigi yoemso yo' gyi: sheung: lo nyid.

21 He: da" moo" bain bue" lid lo" da" thang: ri Polu gi Makedoni Mung" yo' Akhaia mung" khyo" so" lid lo" wigi Yerusalem voomoo" khyoo: yhe: loo" wa shid re- myid phyid too"- Nyang: gi ngoo hau: voogung moo bain ju" yhe: thang: ri Roma voomoo" khyoo: we' ngoo ju" lo" yu" ca" ga: tid. 22 Houg: yoomo Polu gi nyang: ri bo pang" da" Timothi yo' Erastu ri Makedoni mung" khyoo: nhang: kaid lho: nyang: gi Asia mung" moo dayo, daboin: theung: nyid jo, da. 23 Hau: ayo, moo Aseing Yesu gang mo Ephesu voogung moo yau: khe" khyoo: azeing bue" thu' loo bye:. 24 Demetri ga: da" ngei sheing: shau, da" lo, moo" zei: su: dayug gi Atemi yu phara" myhi' da" ngei yhoem: soolhoo: nu" joem shoin" lho: nya: moozoo" yoomo lo, moo" zei: bang: ri ngei gye" yo" shoo: nhang: nyid. 25 Houg: yoomo nyang: gi nya: moozoo" moo lo, moo" zei: mo, dangain" bang: ri we' nyangnu" yo' dakhyoo" lo, moo" zei: zoo: bang: gootu: dangain" bang: ri we' khe: zheung" yu lho: wigi byen, cang" yi we"- ngoonu gi he: da" lo, moo" zei: lho: nyid gi yab, ge nyid ziri nanu" nyang: si' gu nghoid abye: go". 26 Akhid" gi hau: da" Polu ga: su: gi ce: noem koid nyid da" khyoo: ri nanu" nyang: shoug" gyoo: bye: ziyo' hau: zigi myang nyid gu nghoid ago". Nyang: tid zigi byu lo, wigi koid da" yu phara" soolhoo: joem gi Mangsoo anghoid ga: tid wigi He: Ephesu voogung bang: yo' Asia mung" goin" moo nyid mo, alug dangain" ziri yo" loem" jeing" sho' tid oung: too" bye:. 27 Houg: yoomo hid: ngoonu" da" moozoo" ri myeing ze" shoin' pyam wa zi gyug ca". Houg: za: we' anghoid shi" gyi: sheung: da" yu phara" yhoem: gi ci" we' anghoid khari" loo: wa. Houg: lang" Asia mung" bang: dangain" yo' mougmyid goin" mo, coem goeb pid nyid da" yu phara" myhi' da" phung" yoeb, ri phue: lo" byug nhang: wa zi nghoid- ga: tid. 28 Hau: da" dang: joem ri zheung: shoug" gyoo: lang" hau: lo, moo" koid zo: nyid mo, gi nheig zheung: gyo: yo: lo wigi ?Ephesu voobyu yi da" Atemi gi gyi: sheung: jo, zi nghoid? ga: nyho: lo ago". 29 Hau: mo lu: fu: go" lo da" khyoo: gi voogung goin" moo byeung" lo wigi byu yi gi Polu yo' gyung: soo" byen, cang" nghoid da" Makedoni mungbyu- Ge-u yo' Aristaku eig yug ri myheug yu lho: Pui" mo goo" jang: khyoo: myab, myab, shu" vang yhe: lo" ago". 30 Polu nyang: gi mung" byu yi da" shidkhoin" khyoo: yhi: nau, nghoid loug we'-Loem" jeing" bang: gi nyang: ri ayhi: nhang: nghoid ago". 31 Polu nya: bidnoem yi zheung: nghoid da- mungdain moo amyeung" yoo" mo, dayham" we' pui" mo, goo" jang: moo ayhe: nyid shug wa shid re byu nhang: kaid wigi Polu ri mho' tid boem. 32 Hau: ayo, moo byu yi gi houg: su" lu: fu: go" nyid boem yoomo mungbyu yi gi dayham" daja: ga: nyhoo: go" nyid boem. Nyangnu" mo myoo" sho' bang: gi nyangnu" ce: noem koid lu: fu: go" nyid da" khyoo: rilang" asi shi" nghoid ago".

33 Yuda byu yi gi Alesandru mungbyu yi da" shidvhu" khyoo: yhi: nhang: kaid yoomo mungbyu yi dayham" gi Alesandru we' bue" lo da" khyoo: yo' sen: wigi nghoid wa"- ga: jho: ago". Houg: lang" Alesandru gi mungbyu yi ri sam" zoo: nyid boem wa shid re- lo, tu' tu' lho: nyang: ashoid da" khyoo: ri tid phid: yu wa shid mo, yoem: kaid nyid. 34 Nghoid loug we' nyang: gi Yuda byu nghoid da" khyoo: ri mungbyu yi zheung: se' yu" boem lang" gi Ephesu voogung da" Atemi gi gyi: sheung: jo, ga: eig na: yi: koo: nyangnu" dangain" mo, dage" za: zheung: nyho: nyid boem ago". 35 Lo" thang jang" moo gi voogung moo" voin phoo' gi mungbyu yi ri sam" zoo: tam" too" nhang: lho: Ephesu voobyu yi we' Ephesu voogung gi gyi: sheung: da- Atemi yu phara" yhoem: yo' mougkhung: mo gyoo" re" da" lug zeing ri zoem: ci: da" voogung nghoid ziri yug khang" moo" se' ago". 36 Hang" we' he: da" khyoo: rigi ayo" ngeug pyam nghoid ago"- houg: yoomo nanu" gi sam" zoo: nyid ri gi bye:- daja: ja: ri anau, yu" loo: koid wa zigi a eung: nghoid da. 37 Nanu" gi he: eig yug ri yu phara" yhoem: ri lhoid zo: zi we' anghoid- Nanu" da" yu phara" myhi' ri tid gei sang: pyam byid: zi we' anghoid zi he: joyoo khyoo: dashu" re" ago". 38 Demetri yo' nya: lo, moo" zei: mo, gi dayug yug ri yooboo foin: nau, nghoid rigi tarha" yung" phang to" ziyo' amyeung" ci: bang: we' nyid nyid ago"- tarha" yung" moo yooboo ri ge tid da. 39 Nghoid loug we' nanu" gi hau: tho' je" je" wigi- daja: ja: ri da tid noug shigo" nghoid rigi mungbyu yi da" tarha" vang zoebphoung: moo" moo tid phyed yu boem ca" wa nghoid. 40 Khasu" wim gari- akhid" nyid" bue" lo da" mo, thei" mo, yug lu: fu: go" da" moozoo" gang: mo ngoonu" ri yooboo foin: loo wa ziri gyug ca". Hid: yhang: ti" mo, thei" mo, yug lu: fu: go" da" khyoo: gi Ce: noem yoomo bue" lo da" khyoo: ri toin" shid wa ziyo' akhyoo" jhug jhug za: zei: wa khyoo: ngoonu" ayoo"- ga: tid. 41 He: da" dang: bain tid thang: ri nyang: gi mungbyu yi ri phang: loo" nhang: kaid.