14
Jerusalem mary hawi khumi cheng cheaungkhangchi
1 Areng my tara chih ai nai neng kani ly ang tym ai. Huna nai khala Jerusalem mary ly tiu lawm nai avum iy, tiura i nga nai vawnsaichi ai, nangchi i mo y my phy amji u ai.
2 Areng ly Jerusalem mary y tiu ai nai pangym iy hawi ai. Huni mary ai ly peang vui ai. Yhmchira i nai lawm vui ai i, neampachychi ai ly pajang u ai. Khumi phy ka-hyhrei ly pri pala naira avum u ai; huni bo i phy ka-hyhrei ly huni mary i nai asyh u ai ny y.
3 Naibaly Areng ly jangni neng khala i kamta theu iy, huni khumichi ai tiu ai.
4 Naibaly mymy ly Jerusalem mary nisi mang y awm nai olive mawi salo y angdo nai deaungkho y, olive mawi ly nidym, nisi phy nyhrei kawi thla iy leaunghawi pui lawm ai. Mawi seirei nai ly tosyh ngan mang y, takhra seirei nai ly tokalawi ngan mang y asyh vui ai.
5 Nangchi ly mawi aseih thla nai nyhrei, leaunghawi lam mang preang iy tleaung u ai; Juda samrang Uzia deung y kaleih theu nai thym khala, nangchi i amsi pajochi preang u pawn nai kamta, nangchi py preang u teang ai. Kai i Areng Tameuh ly mymy hawi vanrei, kani pri amtaw thauchi ai hawi iy ang jeu ai.
6 Huni neng tym nai khala savai nai, ti y baly kadam tla nai py awm ai ny y.
7 Kaveng py awm ai ny y, rengrang nai neng kani lawm ai. Vum y malawn py kani kangvang awm jojo ai. Hina nai kamta tym ai nai neng kani ly Areng my leaungrei naini pany khyh nai ne.
8 Huni neng kani ang tym nai khala y, Jerusalem mary i dengdairei micheaung tuichi leaung ai. Huni tui ka-hyhrei nai ly pangli kadei theung y, takhra ka-hyhrei nai ly Mrethe pangli theung y saneng jeungrei, kaseih y py, kanipui y py, leaung jo ai.Ref 14:8 Ezek 47:1; Jh 7:38; Amt 22:1
9 Naibaly khaileaung pri verei y Areng my peang ai. Khumi bawibawichi my py, mymy ai mychi i Tameuh palawn iy chiu ai i, huni amyn harei naini pany u ai.
10 Tosyh mang y awm nai Keba mary dengdairei, tokalawi mang y awm nai Rimon mary y khrairei, Jerusalem mary tengpang sahawi i khaileaungchi adyh ai nai padyh u ai nai tla. Jerusalem mary py tengpang sahawi i khaileaungchi tleaung y asang naimy awm ai. Hini mary ly Benjamin apai katheu dengdairei, katheu kangngym awm nai mary taki i apai katheu khrairei py, Hananela yhm ka-sang dengdairei, samrang i yhm, kreip athai nipra angawmchira y khrairei py awm ai.
11 Khumichi ly phra ai nai molam y pajei naira avum u y naimy, huni meingtymra y chymme naimy awm u ai.Ref 14:11 Amt 22:3
12 Areng ly Jerusalem mary ai tiu nai khumi cheng cheaungkhangchi tlang tleaung y, ka-jei awm nai no kanghawi tym hai ai. Nichi ly heng nai thym khala y my, ngan tlangchi veaung ai. Nichi i meichi hawi palaichi py veaung ai.
13 Huna nai khala y Areng ly khumichi ai khri pa-rei khrukhra hai iy jei hai ai i, khumi luteng ly mychi sahawi y avum nai khumichi ai tiu iy patiu u ai.
14 Juda khumichi ly Jerusalem mary i vui y amtang hai ai i, khumi cheng cheaungkhangchi i yhmtheaung katuichi napi nai muku tangka hawi ateaung alang neangneangchi ai, atiura i nga nai vawnsai palawn iy la pi pawn ai.
15 Paleung ka-e tairachi i keaungngo, kula-iu, keaungngo kano kasau napi nai tawnbawichi tlang tleaung y py, ka-jei awm nai no kanghawi tym hai ai.
16 Naibaly Jerusalem mary ai tiu u nai khumichi theung i, dei kamthum khumi bawibawichi ly ati cheaungkhang sa thai nai Areng i peang nai anui y awm u iy, mymy ai chiu u ai nai py, Taichy Pawi sa u ai nai py, huni mary y saneng tleirei tym u ai.Ref 14:16 Lev 23:39-43
17 Mani mo khumi cheng ly ati cheaungkhang sa thai nai Areng i peang nai anui y awm ai nai hawi, mymy ai chiu ai nai akhi u, huni khumi chengchi i pri ly kani khang ai.
18 Aikupta chengchi ly Taichy Pawi sa ai nai akhi u lawh teu baly, nichi ly huna nai akhi nai molam y, Areng my pato nai no kanghawi avum u ai.
19 Hini ly taichy pawi so y lawh baly Aikupta pri hawi takhra prichi avum ai nai pajeng naira ne.
20 Huni neng khala y keaungngochi ai namtleng tai nai salo y, “Areng teng y a-au bo” nanai cha lam tajiu iy khai ai. Achura yhmra y atiti theaung nai laawmchi ly maicham mo i rahumchi kamta, khri pa-rei chai ai.
21 Jerusalem mary hawi Juda pri vereichira y awm nai laawmchi py chai parai nai deaungkho y, ati cheaungkhang sa thai nai Areng ai chiu naira y khai takhra ai. Huni neng kani tym nai khala y ati cheaungkhang sa thai nai Areng i Achura yhm y, mani ka-jo ka-van sai nai khumi leaungrei py awm ai ny y.