TITA
TENG Y PAWLA I
CHA PA NAI
1
1 Pawla, Tameuh i miseaung hawi, Tameuh i vawi naichi i ym naira hawi, nichi i Tameuh ai dawn ryhryh nai leu meitang pany nai sai py angym hai ai nai Isu Krista i amtaw thau nai ne: naibaly deungtasarei hengra nga ai nai athang khai nai ly huni i sangum ne:
2 ka-chawi thui vai y nai Tameuh my ly kani khaileaung palum y rai kha y my huni ai adeu yb veng bo;
3 naibaly neng angym khyp nai khala y achi ai Paheng nai Keung Tameuh i leu pei nai kamta ly kai teng y ang au nai i saho y mymy i leu amteng hai bo;
4 ym sangum naira y kai i chanau kypkyp Tita teng y ly: Ampo Tameuh hawi achi ai Paheng Keung Krista Isu teng i nai pahenra hawi awmnem naira py awm sy.Ref 1.4: 2 Kor 8.23; Kal 2.3; 2 Tim 4.10
Krit tlawn y Tita i kalop sa nai
5 Kai i leu pei nai kamta ly, nang ly vai khrairei nichi i angym pa-rei so y naichi sa hai thai ai nai hawi, avang tleirei y miteaung kehchi ai vawi takhra ai nai py Krit tlawn y kang daw pi bo;
6 cheh ai naira by y nai, aju leaungrei awm khyh nai, mymy i chanauchi ly ym naichi ne iy saw vai y nai hawi leu tangai y nai awm vai y nai ne baly khai ai nai tla.Ref 1.6–9: 1 Tim 3.2–7
7 Ati mana nai mo nabaly palau takhra kamkawm peang nai keung my ly Tameuh i yhmthaeung kry nai keung ne nai deaungkho y, cheh naira by y nai pa-rei awm ai nai tla; ni ly amy i ngai nai harei dawn khyh nai hawi, kado theu praw nai hawi, kreip athai hang pavui nai hawi,khumi ai tabeang nai hawi, kamran hau reng nai khumi py ne ai nai tlo y.
8 Huna ny y naimy ni ly angvynchi ai kawn reng nai hawi, atiti kahawi ngai parai nai hawi, amkym thai nai hawi, paleung kahawi hawi, khumi kachai hawi, amy i ngai nai sai apeang nai khumi py ne lawh ai nai tla;
9 ni ly patiu naira lam kateng y pachei thai ai nai hawi, aei nai keungchi ai sum naira nga hai thai ai nai py,reita kamta patiu nai leu ka-ym awm nai patawm thleng nai khumi ne teang ai nai tla.
10 Leu tangai y naimy atiti thui rumrang nai hawi tapawp nai khumi neangneang awm: lengkhym takip naichi ly ty keh:nichi i labeaung tamym ai nai tla;
11 nichi ly kamran hau reng i patiu ngau y nai leu patiu iy, dengtheung vereichi ai atlym hai.
12 Nichi theung i nai leaungrei, mymychi i amo kypkyp ly, “Krik tlawn khumichi ly ka-chawi thui naichi, mawi kasichi , biu ha nai deaungkho y atho kasichi ne,” nanai thui khyp bo.
13 Huni leu thui pi nai ly kateng ne. Hunai deaungkho y nichi ly Judachi i leuchi hawi, leu meitang mang i nai hi vui naichi i leu pei naichi dawndan y naimy,
14 ym naira y khaw pa-rei awm thai ai nai nichi ai ryhpatyh pa-rei parip.
15 Khumi kachai i vui ly ati cheaungkhang chai jo; na i py chai y nai hawi ym y naichi i vui ly ati ra y py chai naira awm vai y leang; nichi i dawn naira py, hawi nai hawi y nai pany naira py chai y bo.
16 Nichi ly, “Kaichi Tameuh ai pany,” na naimy asa u bo; na i py nichi ly amso awm nai hawi, leu tangai y nai hawi, atiti kahawi sa naira y pipi chawn y nai khumi py ne nai deaungkho y, nichi i atiti sa nai ly mymy ai apha u lawh.