2
Isu Krista y ka-ym awm nai tavaimi risa
1 Hunaibaly kai i chanau awi, nang ly Krista Isu y awm nai pahenra deaungkho y ham naira nga ryh nga ryh nai awm ba.
2 Naibaly pany nai keung neangneangchi i mo y kai labeaung i leu atiti nang thai nai ly ka-ym awm nai khumi, khumi takhrachi ai patiu pateang pajau ai naichi teng y au.
3 Krista Isu i tavaimi hawi parai nai kamta patang naira y kai kamta kham kyh ba.
4 Tavai mi ami py ni ai tavaimi y awm ai nai vawi nai keung ai ly kawn hai ai nai, atiu nai thym khala y ly vai i heng nai sala kani tleirei i sa nai sai amymy ai paka ai nai pei y.
5 Naibaly ami my angpreng acham naira y angpreng teu i py, reita kamta angpreng y baly ni ai areng lukhum amym hai ai nai awm vai y leang.
6 Hlau sa akawm nai keung ly athai nga man nai keung lawn ai nai tla.
7 Kai i leu thui nai ly dawn cham:Areng my ly ati cheaungkhangra y pany thai naira ang pei ai.
8 Kai i Satang Kahawi leu thui nai kamta, Davida i kangpreang i nai theu nai, kadeich theung i dengdairei angthau bi nai Isu Krista ai ly pany jo;
9 kai ly huni Satang Kahawi deaungkho y atiti hawi y sa nai keung kamta kawm ai ka-lawn pa-rei patang naira kakham nai ne; na i py Tameuh i leu ly kawm nai ny y leang.
10 Hunai deaungkho y vawi takhra naichi ly Krista Isu y paheng naira ly deungtasarei nang parai naira hawi vanrei nga u thai ai nai, nichi deaungkho y kai ly ati cheaungkhang kakham.
11 “Achi ly mymy hawi dei chum nai awm baly,
Achi ly mymy teng y heng teang ai,
12 Achi ly kham baly,Ref 2.12: Mt 10.33; Lk 12.9
Achi ly mymy hawi vanrei peang ai;
Achi ly mymy ai apha baly
Mymy py achi ai apha teang ai;
13 Achi ly ka-ym by y nai awm teu i py,
Mymy ly ka-ym awm nai awm jojo,
Mymy ly amymy ai apha pajau y,”
nanai leu ly ka-ym awm nai ne.
Tameuh i kangai kalop sa nai keung kahawi
14 Huni atiti leu ly nichi ai dawn hai vau; ati sai py chawn y naimy, tangai nai keungchi ai taphra ai nai leu rumrang naira aei u y ai nai Areng i mei ka-niu y leu pei.
15 Leu meitang hawi parai naimy teaung nai, kalop sa nai keung kaji ai tlo y nai kamta, sa avo nai keung y Tameuh teng y apei ai nai hawihai adawn.
16 Na i py Tameuh ai tahm khai y nai leu thui rumrang nai ai ly hi pi veng; hunai kamta thui naichi ly Tameuh ai dawn y naira mang y ty ra ty ra ai i,
17 mymychi i leu ly angvawi hawi y parai nai kamta angdai ryh angdai ryh ai; mymychi theung y Humenai nini Phileta abawi hawi nai ne;
18 nini ly “Angthau bi nai ly vai py ne palai veng bo,” na hawi iy, leu meitang lam ai ly tako hawi akawi veng i, phyreichi i ym naira ai ly atlym hai bo.
19 Na i py Tameuh i lengseaung leng nai kakhaw my ly awm jojo iy, hini pajawp typ nai ka-ma-ra ne i, “Areng ly mymy i khumichi ai ly ang pany,” nanai hawi, “Areng i amyn palau nai ngiereichi ly hawi y sa naira aheng u sy,” nanai py ne.Ref 2.19: Kati 16.5
20 Na i py yhm kalen pui y ly muku hawi tangka laawmchi harei khyh ny y naimy, dengkeaung hawi alai laawmchi py awm teang; phyrei ly tahm asang ai nai awm iy, phyrei ly tahm anem naira y awm teang.
21 Hunai deaungkho y ami py huni atitichi ra y apachai baly, mymy ly tahm asang nai laawm, khai takhra nai,yhmkeung my teaung ai avo nai, atiti sa ai nai cheaungkhangra y angvei rym nai awm khyp ai..
22 Hunaibaly thawndeang thym khala i ngai phi teng y nairachi ai ly angpreng veng, naibaly paleung kamchym y Areng ai palau nai ngiereichi hawi vanrei hawi naira hawi, ym naira hawi, tamen naira hawi, aly naira py hui jojo.
23 Na i py aei atyhtyh naira hawi cheng y naira y ly abawi ai nai ngai moh; hunichi ly ajo nairachi tapen lawh veng, nanai nang pany.
24 Areng i miseaung ly ajo ai nai tlo y i, khumi bawibawichi i tlang tleaung y neaung hawi iy patiu nai sai kawp i,
25 hawi y sa naira y kham pajau nai, mymy i patiu nai leu ngai y naichi ai leu anui parai naimy nichi ai patiu lawh ai nai tla;
26 hunaibaly Tameuh my nichi ai leu meitang pany angym ai nai uikhei hai baly nichi ly diabola deaung i nai theu u pajau lawh na: ni ly mymy i ngai nai kamta nichi ai patiu chum veng bo.