6
1 Tameuh i amyn hawi ni i patiu nai leu ly thui tamawn nai awm y ai nai, miseaung i langvui savan apatli nai ngiereichi ly mymychi i yhmkeungchi ai ati cheaungkhangra y palo ai ataing nai palawn u sy.
2 Naibaly nichi i yhmkeung ly ym nai khumi ne i, amjo amnau ne nai deaungkho y tahm panem u moh sy: na i py chawn naira nga naichi ly ym nai keung hawi ngai parai nai keung ne nai deaungkho y, nichi i kalop sa nai tleaung y so pi u ra sy.
Teng y nai reita hawi tlamsa naira tatang
Huni satang patiu py patiu, pachei py pachei.
3 Ami py patiu naira takhra patiu iy, leu meitang (achi i Areng Isu Krita i leu) hawi, Tameuh ai dawn ryhryh ai nai lam y patiu naira y py ym y baly,
4 ni ly am-e i, ati sai py pany y; huni tleaung y ly aei nai hawi leu aly y naira y ly pathu nai kamta ne;
5 huni amjy dengdairei paleung no nai hawi, ajo nai hawi, thui preaung nai hawi, hawi y naira mang y ym nai hawi, aei si naira py theu lawh veng; hunai kamta aei kasi nai khumichi ly paleung patheng nai hawi leu meitang by y nai, Tameuh ai dawn ryhryh nai ly amran naira mo na lawh nai khumi ne.
6 Na i py Tameuh ai dawn ryhryh naira ly paleung hawi naira abawi baly khri pa-rei amran naira ne;
7 ati mana nai mo nabaly achi ly khaileaung pri y ati sai py kun hai y leang, achi ly ati sai py theu py theu hai pajau y leang;
8 na i py cha ai nai hawi ateaung ai nai nga iy, hunira y achi ly paleung hawi ai,
9 Na i py nang ai tau naichi ly parawi naira y hawi, deaung y hawi, taphra atyhtyh thai nai ngai phi teng y naira neangneangchira y atlym u iy, hunichi ly phra naira y hawi, tama naira y py khumichi ai tup hai.
10 Tangka yhmtheaung ai khri pa-rei ngai nai ly kamngo neangneang i pakeung ne; phyreichi ly huni ai paleung no i ym naira ai ly khai su iy, amymy ai paleung mawn naira khri pa-rei nawi nai my ly athun krai veng lawh.
Amymy i kalop molam leu pei nai
11 Na i py nang, Tameuh i khumi awi, huni atitichi ai ly angpreng veng! Hawi naira hawi, Tameuh ai dawn ryhryh naira hawi, ym naira hawi, tamen naira hawi, kham pajau naira hawi, leu anui naira ai py hui veangveang.
12 Ym naira i atiu naira y ly atho so; deungtasarei heng naira ai ly amkhaw, huni nga ai nai ang palau chum bo i, nang ly pany nai keung neangneangchi i mo y thai hai nai leu hawi parai nai thui pi bo.
13 Ati cheaungkhangchi ai hengra pei nai keung Tameuh hawi, Pontia Pilata i mo y thai hai nai leu hawi parai nai thui nai keung Krista Isu i mei ka-niu y py leu kang pei.Ref 6.13: Jh 18.37
14 Achi i Areng Isu Krista amteng y ryrei ly chai parai nai hawi, cheh ai naira by y pa-rei my leu ang pei nai ly patawm: huni ai mymy ly neng khyp nai khala y amteng hai ai.
15 Ni ly palo ai ataing nai Aly Peang nai Keung leaungrei awm khyh nai, samrangchi i Samrang, arengchi i Areng ne:
16 mymy leaungrei dei thai y nai sai awm khyh, ni ly kangvang chei kasa pajau ai nai vuilam ny y naira y ly awm nai, mymy ai ly ami py niu vai y, niu py niu pajau y; mymy teng y tahm pasang naira hawi, deungtasarei aly peang naira py awm sy. Amen.
17 Hini khaileaung pri y nang naichi ly am-e y ai nai hawi, khaw y nai yhmtheaung ai ny y naimy, atiti bawibawi kawn ai nai khri pa-rei ang pei reng nai keung Tameuh ai athang khai ai nai pachei.
18 Nichi ly atiti kahawi sa iy, hawi naira my kawi sy; atiti paawh y iy sabawm ai nai ngai praw nai keung py awm u sy:
19 nichi ly hengra tatang patawn u thai ai nai, tym ai nai neng i vui ly lengseaung leng nai kakhaw khai u rym ai nai pachei.
20 Aw Timothei awi, nang teng y ang au nai ly hawihai palai kry:Tameuh ai tahm khai y nai leu thui rumrang nai hawi, “pany naira” nanai pathi atyhtyh nai aei naira ai ly hi vui;
21 phyreichi ly huni ai ly nga bo, nanai thui iy ym naira ai ly tako u akawi vui bo.
Pahenra ly nang teng y awm sy.