4
Isboseth ai padei nai
1 Sawla i chapo Isboseth ly Hebron mary y, Abana ai padei veng bo, nanai thai nai khala y, jei hyn nai ne. Israela mipuichi py jei hyn u bo.
2 Isboseth teng y tiu nai, lawm nai kamkawmchi i lu leaung nyhrei awm. Nini i amyn ly Baana hawi Rekhab ne i, Beroth mary i Benjamin cheng theaung Rimon i chapochi ne. (Beroth mary ly Benjamin khu theung y abawi.
3 Huni mary y awm angchei i khumichi ly Kitaim mary mang y preang u i, vaini khrairei hu y khuteng sa u jo nai ne.)
4 Sawla i chapo Jonathan ly Mephiboseth napi nai chapo leaungrei awm jo. Saneng pangrei awm nai khala y, deaungdi ai kry nai keung ly Jezarela mary y, Sawla nini Jonathan dei nai satang thai baly, deaungdi ai tapawm iy preang nai ne. Na i py angpreng hai kaliki nai deaungkho y, deaungdi ly tla praw i, kheu tabai vui bo.Ref 4.4: 2 Sam 9:3
5 Isboseth ly kani thun anawn nai thym khala, ni i yhm y Rekhab hawi Baana nini tym hawi.
6 Katheu pa-khora y awm nai neampachy py, chohnei alai naimy i kamhm ngam i, i vui bo. Naibaly Rekhab hawi Baana nini ly yhm angtheung y kun hawi jyn bo.
7 Nini ly yhm theung y kun phai kun baly, Isboseth i nai takun mang y kun iy, Isboseth ai padei hawi vui bo. Naibaly lu tameang iy, syn hawi naimy Jordan leaunghawi mang vum torei tako hawi.
8 Hebron mary y tym hawi nai khala, nini ly Davida teng y, “Nang ai padei ai hau nai, nang i paleung ka-e Sawla chapo i lu ne he. Vaini Areng ly nang ai, Sawla hawi katu chanauchi i tlang tleaung y, vawitheung tha ai nai pei nai bo,” napi iy Isboseth i lui talam pi bo.
9 Davida my, “Kai ai ka-jeira cheaungkhang i nai atleu pi nai, heng nai keung Areng i amyn y kai vaineng abeu bo!
10 Sawla dei nai satang Zikala mary y kaawm nai thym khala y, kai teng y jeu iy thui pi nai khumi ly my i syn nai satang ly satang kahawi palawn nai ne. Na i py kai ly ni ai patiu iy tleh vui bo. Hini ly my i pei nai satang molam y, huni khumi nga nai langseaung ne!Ref 4.10: 2 Sam 1:1-16
11 Amy i takun theung y i nem nai, kamngo by y nai khumi ai padei nai khumi hawi y naichi ai ly huni tleaung y pajeng ai nai avo na a! Huni kamngo by y nai khumi ai padei nai molam y vai, kai ly nang ni tlang tleaung y vawitheung kangtha ai. Nangni ai hini khaileaung salo i nai, kang pasym vui ai!,” napi.
12 Davida my leu pei nai deaungkho y tavaimichi ly Rekhab hawi Baana nini ai padei chum baly, nini i kiu kheuchi tameang iy Hebron tuikan sahawi y bang hau bo. Isboseth i lu ai ly Hebron mary y awm nai Abana i tapreaung y up nai ne.