11
Davida hawi Bathaseba
1 Huni saneng nisa theu nai, samrangchi tavai atiu reng nai neng tym nai khala y, Davida ly Juaba ai my i tavai luchi hawi, Israela tavaimi kamkawmchi ai pato i, nichi ly Ammon khumichi ai tiu nai pajau iy Rabah mary ai taki meuh vui bo. Na i py Davida ly Jerusalem mary y awm jo nai ne.Ref 11.1: 1 Neng 20:1
2 Kanirei nai khala y Davida ly kani thun y i nai anglaw i, samrang yhm amphu salo y lyn kalau iy aleaung nai thym khala y, neampachy leaungrei tui ahiu nai niu; huni neampachy ly khen nai mo-cha khri pa-rei hawi parai nai ne.
3 Naibaly Davida ly khumi pato i, ami mo nanai deng hai. neampachy ly Eliam i chaniu, Hiti cheng Uriah i aju Bathaseba ne, nanai pany bo.
4 Samrang ly khumi pato i, huni neampachy ai palau hai iy nihawi i ahawi bo. (Bathaseba ly neampachychi i tlangchai tym i, pachai pyn chum nai neng ne.) Naibaly neampachy ly yhm mang y vawi ali teang bo.
5 Huni bo y neampachy ly deaungdi aniu i, Davida teng y satang thai hai nai ne.
6 Huna nai khala y Davida ly Juaba teng y, “Hiti cheng Uriah ai kai teng y pato,” napi ai nai khumi pato. Hunaibaly Juaba ly Uriah ai Davida teng y pato bo.
7 Uriah tym nai khala y Davida ly Juaba hawi tavaimichi i noso satang hawi, tavai atiu nai satangchi deng.
8 Naibaly samrang ly Uriah teng y, “Yhm mang y vawi ly amdaw nem ba,” napi. Uriah theu jo nai khala y Davida ly yhm mang y langseaung tha pi bo.
9 Na i py Uriah ly yhm mang y vawi y naimy, tamcheaung tym naichi hawi vanrei, samrang i yhm katheu pa-khora y i nai ne.
10 Davida my Uriah ly yhm mang y vawi y nai satang thai i ni teng y, “Nang ly khuleaung kamlora i vaimy tym nai ne i py, ati mana nai yhm mang y vawi y lawh mo? nanai deng.
11 Uriah my, “Israela khumichi hawi Juda khumichi ly kamlo paraira y, tavai atiu naimy awm u nai ne. Leu Maikawm Pawm py nichi hawi vanrei awm. Kai i tavailu areng Juaba hawi tavai luchi py, angdym angdengra y tai u nai ne. Ati mana nai y kai ly yhm y vawi iy cha nei naimy, aju hawi amo theu i pajau ai mo? Kai ly huna nai so y ai, nanai vaineng abeu bo!,” nanai pathang.
12 Naibaly Davida my, “Tuna baly hini meingtym y my, vaini amdaw rai, khawndam ly kang pato teang ai,” napi. Naibaly Uriah ly huni kani hawi khawn pa-nyh ryrei, Jerusalem mary y awm.
13 Davida ly ni ai dym biu cha ai nai palau i, pavui pa-rei nei cha hai bo. Na i py Uriah ly huni dym py yhm y vawi y naimy, samrang yhm tamcheaung typ naichi i meingtym y kanih bai iy i nai ne.
14 Khawn mang y Davida ly Juaba teng y cha harei tajiu i, Uriah nithun pa.
15 Tajiu nai cha ly “Tavai ho keh nai mo mang y Uriah ai pato. Naibaly dei hai ai nai nang ly anaw veng,” nanai ne.
16 Naibaly Juaba ly mary ai katanmeuh nai thym khala y, Uriah ai atho awm parai nai paleung ka-echi mang y pato bo.
17 Paleung ka-e tavaimichi ly mary i nai theu iy, Juaba i tavaimichi hawi atiu u i, Davida i tavau lu phyreichi dei nai ne. Huna nai dei naira y Uriah py abawi teang.
18 Naibaly Juaba ly Davida teng y tavai atiu nai satang pa i,
19 savai teng y, “Tavai atiu nai satangchi samrang teng y amti pi chum nai khala y,
20 samrang ly kado theu naimy, ‘Nangchi ly paleung ka-echi ai tiu ai nai mary sahawi y ati mana nai chei u lawh mo? Paleung ka-echi my mary apai salo mang dengdairei, thailiho hawi ang ko ai, nanai pany u y nai sai a?
21 Kideon i chapo Abimelek ly ati mana dei mo, nanai pany u y nai sai a? Thebe mary i neampachy leaungrei ly mary apai salo mang dengdairei, choh nip naira sum hawi, ni ai pala hai ka bo. Ati mana nai deaungkho y nangchi ly mary apai sahawi mang y chei u lawh mo?’ nanai angdeang baly ni teng y, ‘Nang i tavailu Uriah py dei bo’ nanai amti pi,” napi. Ref 11.21: Tara 9:53
22 Naibaly savai ly Davida teng y tym i, Juaba i leu pei nai kamta amti pi bo.
23 Ni ly samrang teng y, “Paleung ka-echi ly kaichi tleaung y atho awm i, kaichi ai tiu ai nai mary theung i dengdairei, mary angam mang y theu u. Na i py kaichi ly nichi ai mary apai pa-kho y tym teang pa-rei tiu bo.
24 Naibaly nichi ly mary apai salo mang dengdairei thailiho hawi ang ko i, nang i tavailu phyreichi dei, nang i tavailu Uriah py dei bo,” nanai amti pi.
25 Davida my savai teng y, “Tavai keung y ly ami dei ai mo, nanai ami py thui khyp thai y. Hunai deaungkho y Juaba teng y paleung phra y ai nai, atho pei nai leu thui pi. Ham parai naimy atho sa teang iy, huni mary tiu vui pajau ai nai py thui pi,” napi.
26 Bethaseba ly my i juvo dei nai satang thai nai khala y, paleung si vo tangam bo.
27 Vo tangam nai neng tem nai khala y, Davida ly ni ai samrang i yhm y palau hai i, samrangnu ra y palyn iy chapo tapen bo. Na i py Areng ly Davida i sa nai sai khrei pi y nai ne.