PA-NYH I
SAMUELA
Israela chengchi ly Samrang Davida i heng nai deung hawi, sa nai saichi tami pajau y i, cheng verei patang naira avum nai khala y, nichi i ngai nai samrang ly “Davida i chapo,” ti y baly Davida kamta, Davida kangpreang theung i ne ai, na u nai ne.
1
Davida ly Sawla dei nai satang thai nai
1 Sawla dei nai bo y Davida ly Amalek chengchi ai tiu pajau nai vawi ali teang i, Zikala mary y kani nyhrei awm.
2 Khawn khutawi baly Sawla i awm nai tavai taira i dengdairei, thawndeang leaungrei tym; ni ly my i baichu sei iy lu tleaung y spryh aphui naimy, paleung si nai sai amteng bo. Ni ly Davida teng y chei i, tahm khai nai khaileaung y meung.
3 Davida my ni teng y, “Nang ly manira i dengdairei jeu nai mo?,” nanai deng.
Ni my, “Kai ly Israela tavaimichi taira i preang nai ne,” nanai pathang.
4 Davida my, “Ati aly mo?,” nanai deng.
Ni my ly “Kaichi i tavaimichi ly tavai sum i, khumi neangneangchi ly dei u bo. Sawla hawi ni i chapo Jonathan ai py padei vui bo,” napi.
5 Davida my ni teng y, “Sawla hawi Jonathan dei nai ly nang mana pany mo?,” nanai deng.
6 Ni my, “Kai ly Kilabo mawi saleung y awm nai thym khala y, Sawla ly my i tivi cheaung naira y anghawi naimy awm nai ai py, paleung ka-echi i tavai ka-richi hawi keaungngo atang nai risachi ly ni i sahawi y tym dudu nai py kaniu.Ref 1.6-10: 1 Sam 31:1-6; 1 Neng 10:1-6
7 Huna nai khala y ni ly nithun mang y khen i, kai ai niu baly palau nai ne. Kaimy, “Kang tym bo areng awi!,” nanai pathang.
8 Samrang ly kai ai ami mo, nanai angdeang i, kai ly Amalek khumi napi.
9 Huna nai khala y Samrang ly “Kai ly khri pa-rei tamo nga nai y, dei ai bo. Hunai deaungkho y jeu iy kai ai padei ba!,” ang napi.
10 Na i py samrang ly atlym phai atlym baly dei ai nai teu bo, nanai kapany nai deaungkho y, kai ly ni ai kapadei vui bo. Naibaly samrang lukhym hawi kiuban y amchiu nai ka-si py leng iy, nang teng y kang syn pi nai ne areng awi,” napi.
11 Davida hawi my i khumichi ly paleung si nai deaungkho y, mymychi i baichuchi sei u bo.
12 Nichi ly tavai keung y Sawla hawi Jonathan py, Areng i khumi napi nai Israela chengchi neangneang dei nai deaungkho y, kani dym pa-rei biu hai naimy vo tangam u nai ne.
13 Davida my satang thai hai nai thawndeang teng y, “Nang ly mani pri i khumi mo?,” nanai deng.
Ni my, “Kai ly Amalek cheng khumi ne; na i py kai ly nang i pri theung y awm nai ne,” nanai pathang.
14 Naibaly Davida my, “Nang ly ati mana nai Areng my khai takhra nai samrang ai padei vam mo?,” napi.
15 Naibaly Davida ly my i khumi leaungrei ai palau i ni teng y, “Hini khumi ai padei vui!,” nanai leu pei i, huni Amalek khumi ai dei pa-rei tleh vui bo.
16 Davida my Amalek khumi teng y, “Hina nai tym nai ly nangmy i sa nai leaungsai ne; nang ly Areng my khai takhra nai samrang ai kapadei bo, nanai thui khyp nai deaungkho y, nangmy ai nangmy padei nai teu bo,” napi.
Sawla hawi Jonathan nini i vui y Davida i vo tangam nai
17 Davida ly Sawla hawi Jonathan nini i vui y, paleung si nai khulym hawi, hina nai vo hai bo.
18 Naibaly huni ai Juda mipuichi teng y py, patiu pi ai nai leu pei. (Hini satang ai Jasa i cha-iu theung y tajiu typ bo.)Ref 1.18: Josua 10:13
19 “Achi ai lu sa nai keungchi ly Israela mawichira y dei u veng bo!
Achi i sorai risachi chau be veng bo!
20 Huni satang ly kath mary theung y py,
Asakelon mary lamchira y py, thui u moh.
Philistia neampachychi amo theu ai nai ngo u moh sy;
Tameuh by y nai khumichi i chaniuchi, amo theu ai nai ngo u moh sy.
21 “Kilabo mawichira y kani nai moh, kadam py tlo moh sy;
huni mawichira i li, hlauchi ly deungrei amti amjang thawn moh sy!
Ati mana nai mo nabaly, huni meingtym ly tavaimi soraichi i khopuichi taham si iy,
Sawla i khupui ei cha naimy awm nai deaungkho y ne.
22 Atho awm nai khumichi ai ko naira y py, paleung ka-echi ai padei naira y py,
Jonathan i thailiho ly ham parai iy,
Sawla i haisau ly pahyp y nai ne.
23 “Lyh ai hawi parai iy paleung ka-no hawi nai Sawla hawi Jonathan nini ly
heng vanrei, dei vanrei,
Ahmtlau tleaung y rang iy, khrangsichi tleaung y atho awm keh.
24 “Israela neampachychi awi, Sawla i vui vo tangam u!
Ni ly nangchi ai tahm awm nai ateaung hawi amthyp hai iy,
vang kateng lengseaung, muku ateaungchi hawi ateaung hai bo.
25 “Tavaimi soraichi ly dei u be bo.
Nichi ly tavai keung y dei u nai ne.
Jonathan ly mawichira y atlym i, dei jo bo.
26 “Kai i amnau Jonathan awi, kai ly nang i vui paleung si parai bo;
kai ly nang ai khri pa-rei tamen na a!
Kai i tlang tleaung y nang i tamen nai ly lyh ai nai hawi parai i,
neampachychi i tamen nai tleaung y py ty keh.
27 “Tavaimi soraichi ly dei u be bo;
nichi i tavai ateaungchi ly aphi su iy, teaung ai nai ngo y leang bo,”