JOHAN TENG Y ISU KRISTA I
AMTENG HAI NAI LEU
1
1 Hini ly Isu Krista i Amteng Hai Nai Leu ne. Huni ai ly Tameuh my ni i miseaungchi teng y neangneang kra y nai sala y atiti tym ai naichi i satang thui pi ai nai ni teng y pei bo; naibaly ni ly mymy i kani pri i amtaw thau nai ai pato iy,
2 mymy i miseaung Johan ai huni leu thai hai bo; naibaly mymy ly Tameuh i leu hawi, Isu Krista i thui pi nai leu hawi mymy i atiti niu nai bawibawi py pany hai bo.
3 Hini thui yb nai leu sai phain nai keung hawi, hini theung y tajiu nai leu sai thai iy patawm nai keungchi py taham hawi, ati mana nai mo nabaly neng ly kasa bo.
Palau takhra saryhreichi teng y kawn nai leu thui nai
4 Johan my ly Asia pri i palau takhra kamkawm saryhreichi teng y ly:
Vai awm nai hawi, jangni i dengdairei awm nai hawi, vai momang y awm ai nai keung teng i dengdairei hawi, mymy i areng atehra mo y awm nai Phailo saryhreichi teng i dengdairei hawi,
5 pany hai nai keung ka-ym Isu Krista, deira i tapen man nai hawi khaileaung pri i samrangchi ai tara chih nai keung teng i dengdairei py pahenra hawi awmnem naira ly nangchi teng y awm sy.Ref 1.5: Is 55.4; Sam 89.27
6 Achi ai tamen i mymy i thi y achi i kamngo nairachi pachai chum nai, achi ai mymy i Tameuh hawi Ampo i vui y peang naira hawi pathyp pi nai keungchi y palawn nai keung teng y ly nang parai naira hawi aly peang naira py deungrasarei awm sy. Amen.Ref 1.6: Theu 19.6; Amt 5.10
7 Khen u cham, mymy ly khupanym theung y ang jeu ai bo; naibaly mei bawibawi hawi, ni ai thun naichi py mymy ai niu ai; naibaly khaileaung pri cheng cheaungkhangchi ly mymy deaungkho y vo hang u ai. Ne sy. Amen.Ref 1.7: Dan 7.13; Mt 24.30; Mk 13.26; Lk 21.27; 1 Thes 4.17; Zek 12.10; Jh 19.34, 37
8 Vai awm nai hawi, jangni i dengdairei awm nai hawi, vai momang y awm ai nai Atiti py Sa Thai Nai Keung Areng Tameuh my ly, “Alpha hawi Omeka kai ne,” napi.Ref 1.8: Amt 22.13; Theu 3.14
Krista ai paleung mei y niu nai
9 Kai Johan, nangchi i amjo amnau hawi, Isu y patang naira hawi, peang naira hawi, kham tanga naira py vanrei amtawm hai nai keung my ly Tameuh i leu hawi Isu Krista i thui pi nai leu deaungkho y py Patmosa napi nai tlawn y ly kaawm bo.
10 Kai ly Areng i kani y ly Phailo y kalawn bo, naibaly kai i nithun mang y baw katyn ka-tawm raawi pajeng parai nai ly,
11 “Nang i atiti niu nai ly cha-iu y tajiu iy, palau takhra kamkawm saryhrei, Ephesi avang hawi, Smurna avang hawi, Perkamon avang hawi, Thuatira avang hawi, Sardisa avang hawi, Philadelphia avang hawi, Leiodikeia avang teng y py pa,” nanai kathai.
12 Naibaly kai ly arum hai nai raawi khen ai nai amhi.
13 Naibaly amhi iy muku maisi khai naira saryhrei kaniu; naibaly maisi khai naira theung y ly ami mo khumi i chapo kamta, kheu y tym pa-rei kanih akhiu nai, tangtaang y muku khobai y akawm nai ai kaniu.Ref 1.13: Dan 7.13, 10.5
14 Naibaly my i lu hawi sam ly beram mui antapo kamta kaleung nai ne, ji kamta kaleung;Ref 1.14–15: Dan 7.9, 10.6
15 mymy i mei ly mai ka-veang kamta ne; mymy i kheu ly mai y pachai chum nai kheupaja amchai nai kamta ne; naibaly mymy i raawi ly pangli tui kamsau katyn kamta ne.Ref 1.15: Ezek 1.24, 43.2
16 Naibaly ni ly mymy i lamtang mang i kiu y ka-si saryhrei syn i, my i labeaung dengdairei haisau kachiu bo nyhrei awm nai theu bo; naibaly mymy i meimai ly kanito kangvang sadi pa la nai kamta ne.
17 Naibaly mymy ai kaniu khala y mymy i kheu keung y dei nai kamta ka-tlym mawp. Naibaly ni ly mymy i lamtang mang i kiu y kai ai nam iy,Ref 1.17: Is 44.6, 48.12; Amt 2.8, 22.13
18 “Jei moh; kai ly kangman keh nai hawi kangkhym keh nai hawi, heng nai keung py ne; kai ly dei i, na i py khen cham, deungtasarei i vui y kai ly heng teang nai ne, deira hawi tavaukho i sawchi py kai teng y awm.
19 Hunaibaly nang i atiti niu chum naichi hawi, vai atiti awm naichi hawi, vai momang y atiti awm ai naichi i satang py tajiu;
20 kai i lamtang mang i kiu y ka-si saryhrei i awm nai sai aneng nai ly hini ne he:ka-si saryhrei ly palau takhra kamkawm saryhrei i kani pri i amtaw thau naichi ne: naibaly maisi khai naira saryhrei ly palau takhra kamkawm saryhreichi ne.