3
Ruthi yhmtheaung sa nai
1 Neng kra kyh nai bo y Naomi my Ruthi teng y, “Nang ly nangmy i vui yhm hlau hawi awm ai nai yhmtheaung kang sa hai ai.
2 Nang hawi vanrei kalop sa nai neampachychi i yhmkeung Boaza ly achi hawi amjo amnau ka-bi ne chybo; vai kai i thui nai leu tangai ba. Ni ly vaidym chajai choh ati nai awm ai.
3 Naibaly nang ly tui ahiu chum baly rimuichi amthym iy, nang my i ateaung kahawichi amthyp ly ni i choh ati naira y chei; na i py ni cha nei nai pajau y ryrei ly nang hu y tym nai pany moh sy.
4 Ni i aseaung nai meingtym pany kheng; ni i ngym nai khala chei ly kanih lei iy ni i kheu keung y aseaung. Nang ai mana sa ai mo, nanai nimy ang thui pi ai mang,” napi.
5 Ruthi my, “Ni nangmy thui pi nai kamta kai sa ai mang,” napi.
6 Naibaly Ruthi ly choh ati nai meingtym y chei iy amni i thui pi nai kamta hawihai sa bo.
7 Boaza ly cha nei chum baly, paleung amo theu naimy chajai chohleng pakheng achu naira y chei i aseaung bo. Naibaly Ruthi ly ni teng y chei jyn iy, kanih lei i kheu keung y aseaung nai ne.
8 Anenghyh y Boaza ly tlenrei khyhmy i anglaw vau i, engleng nai khala kheu keung y neampachy aseaung nai niu baly,
9 “Nang ly ami mo?” nanai deng.
Ruthi my, “Kai ly Ruthi ne areng awi, ati mana nai mo nabaly nang ly kai hawi amtawn abi nai ne i, nang my kai ai kry ai nai ne. Hunai deaungkho y pahen parai naimy kai ai lo ba,” napi.
10 Naibaly Boaza my, “Areng my nang ai amtheaung hai sy, vai nang i sa nai sai ly vaichi khala ngamni tlang tleaung y sa nai tleaung y malawn py, nang i ka-ym awm nai sai amteng bo. Nang ly khumi kamawn, ti y baly khumi kanang thawndeang leaung leaungrei hawi yhmtheaung sa pajau teu i py so y.
11 Ruthi awi, vai ly paleung mawn moh, nang i thui nai kamta kai sa pi ai mang. Nang ly kaja hawi nai neampachy leaungrei ne, nanai mary vereichi my pany bawi nai ne.
12 Kai ly nang i amjy kypkyp ne iy, nang ai kry ai nai keungko py ne. Na i py kai tleaung y kypkyp keh nai leaungrei awm rai.Ref 3:12 Ruthi 2:20
13 Nang ly khutawi pa-rei hi y awm rai; nang i vui huni khumi my dawn hai na mo, dawn hai y na mo, nanai khutawi nai khala kaimy deng pi ai. Nimy dawn hai ai nabaly dawn hai na sy, ti y baly kaimy kang dawn hai nai, nanai Tameuh kangheng teng y kai vaineng abeu mang. Vai nang ly hi y khutawi pa-rei i rai,” napi.
14 Hunaibaly Ruthi ly khutawi pa-rei Boaza i kheu keung y aseaung bo. Na i py Boaza ly neampachy tym nai satang ami py pany hai ai nai ngai y nai deaungkho y, Ruthi ly khutawi y naimy i anglaw nai ne.
15 Boaza my neampachy teng y, “Nang i kanih lo ly hi y padai,” napi i ni ly padai bo; mymy ly chajai choh teaung nyhrei adi iy tapho pi i, Ruthi ly huni choh hawi mary theung y vawi jo bo.
16 Ni ly amni teng y tym nai kha y, amni my, “Mana ang sa pi mo ngaawi awi?” nanai deng.
Ruthi my Boaza i thui nai ngierei amni teng y amti pi.
17 Lengngo my, “Nimy kai ai beng tlairei vawi hai ai nai ngai hai y i, hini chajai choh ang pei nai ne,” napi.
18 Naomi my ni teng y, “Ngaawi awi, hini molam y leaungsai amny pa-rei paleung kasau atheu iy ajeng ai nai tla; Boaza ly hini molam amcheang y ryrei ly anawn vui y leang mang,” napi.