2
Tameuh i tara chih naira
1 Hunai deaungkho y nai awi, nang ly cheh nai keung ami py ne teu iy py, nang ly den py akhira ngo y leang; nang i khumi takhra ai cheh nai kypkyp my ly nangmy naimy apasum ryp nai chy bo; nang, cheh nai keung my py hunai kamta atitichi sa ryp teang lawh.Ref 2.1: Mt 7.1; Lk 6.37
2 Naibaly hunai kamta atiti sa reng nai keungchi i tlang tleaung y ly Tameuh i cheh nai ly teng, nanai achi pany.
3 Aw, hunai kamta atiti sa reng naichi ai cheh nai khumi awi, nang ly hunai kamta sa ryp teang lawh i, Tameuh i cheh naira ai en vui ai nai athang khai nai sai a?
4 Ti y baly Tameuh i hawi naira my uikhei ai nai ang pahawi, nanai pany y naimy, mymy i hawi naira nawi nai sai hawi, amnym pajau nai sai hawi, kham pajau nai sai ai ly nang ly pate nai sai a?
5 Na i py nang i atangai y nai hawi uikhei y nai paleung awm nai deaungkho y kado theu naira hawi, Tameuh i tara chih naira hawi parai nai amteng ai nai kani i vui ly, nang i tlang tleaung y kado theu naira pateung achu amang nai ne.
6 Mymy ly khumi leaung leaungrei ai mymy i atiti sa nai kamta chih pi ai;Ref 2.6: Sam 62.12; Lkch 24.12
7 atiti kahawi sa naira y kham pajau iy, nang parai naira hawi tahm asang naira hawi, veaung thai y naira hau nai keungchi teng y ly deungtasarei hengra pei ai;
8 na i py amy i kangai sa akhikan iy leu meitang patawm y naimy, hawi y naira patawm lawh nai keungchi i tlang tleaung y ly kado theu naira hawi, paleung yhyh na naira py,
9 patang naira hawi khri pa-rei paleung mawn naira py tym ai, ami py atiti kamngo sa nai ngierei i tlang tleaung y tym ai i, Judachi teng y tym manme ai, naibaly Krikchi teng y py tym teang ai;
10 na i py atiti kahawi sa nai keung ngierei teng y ly nang parai naira py, tahm asang naira py, awmnem naira py tym ai; Judachi teng y tym manme ai i , krikchi teng y py tym teang ai;
11 ati mana nai mo nabaly Tameuh ly khumi ai patle takhra nai by y leang.Ref 2.11: Leu 10.17
12 Ami py reita by y naimy atiti kamngo sa nai ngierei ly reita by y naimy tama vui ai; naibaly ami py reita anui y awm naimy atiti kamngo sa nai ngierei ai ly reita anui y tara chih ai.
13 Reita thai jo khyh naichi ly Tameuh i mei ka-niu y khumi kahawi lawn y leang: reita patawm naichi naini khumi kahawi palawn ai:
14 reita by y nai Cheng Takhrachi ly mymychi i paleung tapen ahawi nai deaungkho y reita i atitichi sa u baly, nichi ly reita by y nai teu i py mymychi kypkyp ly amychi i vui reita ne;
15 ati mana nai mo nabaly, kai i Satang Kahawi thui pi nai kamta Tameuh my Isu Krista i saho y khumchi i leu kangviu tara chih nai kani y ly, nichi ly mymychi i paleung y reita i atiti sa nai tajiu nai ne, nanai patei reng,
16 mymychi i hawi nai hawi y nai pany naira my pany hai iy mymychi i dawn naira my apasum py apasum lawh ai, ti y baly akhi py akhi hai lawh ai.
Juda chengchi hawi Reita
17 Na i py nang ly Juda amyn apu makho iy Reita ai ym i Tameuh ai amlyh;
18 naibaly nang ly mymy i kangai pany iy Reita leu y patiu nai awm nai deaungkho y nang ly atiti hawi parai nai ly teng, napi;
19 naibaly nang ly Reita y ly pany naira hawi leu meitang nga nai deaungkho y,
20 nangmy kypkyp ly mei kamjuchi ai pahawi nai keung, kaveng theung y awm naichi ai angvang hai nai keung, khumi cheng y naichi ai cheng hai nai keung, deaungdi chymplei naichi ai patiu nai keung ne, nanai athang akhai baly;
21 tumbaly nang, khumi takhra ai patiu nai keung ly nangmy ai apatiu y lawh a? Nang, paviu y ai nai thui nai keung ly, nang ly paviu ryp lawh a?
22 Nang, pajang so y ai nai thui pi nai keung ly nang ly pajang sa ryp lawh a? Nang, myn y niu ngai y nai keung ly, nang ly myn y chiu nai yhm i atitichi ly paviu ryp lawh a?
23 Nang, Reita ai amlyh nai keung ly, nang ly Reita ai taphra nai deaungkho y nang ly Tameuh i amyn taphra ryp lawh a?
24 Tameuh i amyn ly nangchi deaungkho y Cheng Takhrachi theung y taphra nai bo he, nanai tajiu nai kamta.Ref 2.24: Is 52.5
25 Nang ly Reita patawm nai keung ne baly, lengkhym takip nai ly chawn tatang nai bo; na i py nang ly Reita taphra nai keung ne lawh baly, nang i lengkhym takip nai ly lengkhym takip y nai kamta lawn bo.
26 Hunai deaungkho y lengkhym takip y nai khumi ly Reita i leu patawm baly, mymy i lengkhym takip y nai ly lengkhym takip nai kamta dawn y ai a?
27 Naibaly amymy i tapen nai sai y lengkhym takip y nai my ly Reita patawm angym baly, nang, cha-iu leu hawi lengkhym takip nai reita awm iy py, Reita taphra nai keung ai ly ang cheh y ai a?
28 Salo ryrei y Juda khumi ne khyh nai ly Juda tatang ny y leang; salo i tlang ryrei lengkhym takip khyh nai py lengkhym takip tatang nai ny y leang.
29 Na i py paleung theung y Juda khumi ne nai ly Juda tatang ne; naibaly lengkhym takip tatang nai ly paleung y takip nai ne, cha-iu leu y ny y naimy, phailo y ne; huni ly khumi i palo naira ngo y naimy, Tameuh i palo naira nga lawh.