11
Israela chengchi tlang tleaung y Tameuh i pahen nai
1 Tumbaly Tameuh ly mymy i khumichi ai ly aphi vui a? Ny y leang. Kai py Israelacho, Abraham i kangpreang Benjamin cheng ne.Ref 11.1: Phil 3.5
2 Tameuh ly mymy i pany yb nai khumichi ai ly aphi y leang. Nangchi ly Tameuh i cha-iu y Elija i molam thui nai ly pany u y nai sai a?
3 Mymy ly Israelachi ai Tameuh teng y seu i, “Areng awi, nichi ly nang i amochi ai py padei bo; nang i maichamchi py panawi pawn bo; naibaly kaimy leaungrei awm khyh iy, kai ai py ang padei ai nai tau u bo,” napi.Ref 11.3: 1 Ar 19.10, 14
4 Na i py Tameuh ly mymy teng y mana pathang mo? Mymy ly, “Baala i mo y meung vai y nai khumi sang saryhreichi ai kaimy i vui kakhai nai awm rai,” nanai pathang.Ref 11.4: 1 Ar 19.18
5 Hunai kamta khyp teang, vai dymkhawn py pahenra deaungkho y vawi nai phyreichi awm rai.
6 Hunaibaly pahenra deaungkho y ne baly, atiti sa naira deaungkho y ny y leang; huna nai ny y baly pahenra ly pahenra lawn y leang bo.
7 Tumbaly mana ai mo? Israelachi ly mymychi i hau nai ly niu y, vawi naichi naini niu, takhra bawibawichi ly kyh chawn u veng bo.
8 “Tameuh my ly vaini khrairei mymychi teng y i kamhm ngam nai paleung pei iy, Niu pajau y nai mei hawi thai pajau y nai kano py pei,” nanai tajiu nai kamta.Ref 11.8: Leu 29.4; Is 29.10
9 Naibaly Davida my ly,Ref 11.8: Leu 29.4; Is 29.10
“Mymychi i pawi ly kathang hawi deaung hawi lawn sy,
Atlym naira hawi vawitheung tha naira py lawn sy;
10 Niu u pajau y ai nai mymychi i mei ly veng sy,
Nang ly nichi i nithun anam meung hai jojo kyh,” napi.
11 Tumbaly nichi ly atlym thai ai nai tliu charum charei nai a? Ny y leang:nichi ly tamang nai deaungkho y Cheng Takhrachi teng y paheng naira tym bo; huni ly Israelachi ai takho hai ai nai tym nai ne.
12 Hunaibaly nichi i tamang nai malawn py khaileaung pri ai nang hai naira ne i, nichi i eaung y naira malawn py Cheng Takhrachi ai nang hai nai ne teang baly, nichi i angym nai ly mana tanrei ne na mo!
Cheng takhrachi atleu naira nga nai
13 Hunaibaly nangchi Cheng Takhrachi teng y kang thui pi nai ne. Kai ly Cheng Takhrachi i amtaw thau nai ne nai deaungkho y,
14 kai i chengchi ai katakho hai pajau tanga ai nai hawi, nichi theung y phyreichi ai kapaheng pajau ai nai py kai i kry nai sai tahm kapasang nai ne.
15 Mymychi ai aphi vui nai malawn py khaileaung pri ai aly hai teang naira ne baly, mymychi ai kawn bi naira ly deira i nai heng bi naira ny y baly ati awm ai mo?
16 Katlen man nai tako kangheang phyrei ly chai nabaly, akawi bom verei ly hunai kamta ne teang; tangjyn py chai nabaly changpichi ly hunai kamta ne teang.
17 Na i py changpi phyreichi ai ly tleu hai iy, nang, olive karam ne i nichi theung y patawm iy, olive keung i tangjyn tuihau ahum teang chum nai ne baly, changpi takhrachi teng y ly amlyh reng moh;
18 nang ly amlyh teu iy py nang ly tangjyn ai kry nai keung ny y i, tangjyn ly nang ai ang kry nai keung ne lawh veng.
19 Naibaly nang ly, “Kai ai patawm thai ai nai changpichi ai ly ang tleu hai bo chy bo,” na lawh ngaw khyh chy.
20 Ne khyp; nichi ly ym naira by y nai deaungkho y nichi ai tleu hai veng, nang naini ym naira awm nai deaungkho y angdo nai ne. Am-e moh ly, jei phai jei.
21 Tameuh ly changpi tatangchi ai khai y baly nang ai py ang khai lawh y leang.
22 Hunaibaly Tameuh i neaung hawi nai sai hawi ryh patyh pa-rei ang parip nai sai ly dawn cham; atlym naichi i vui ly ryh patyh pa-rei ang parip nai ne; naibaly nang ly mymy i neaung hawi naira y awm jojo baly, Tameuh i neaung hawi nai sai naini nang i vui ne; ti y baly nang ai py ang do vui teang ai.
23 Naibaly nichi py ym y naira y awm jo y baly ang patawm teang ai: Tameuh ly nichi ai patawm bi pajau veng.
24 Nang ai ly amy i reita kamta awm nai oliv karam dengdairei ang do peu vui nai malawn py, reita kamta ny y naimy oliv keung kahawi y patawm naira awm baly, huni changpi tatangchi ai ly mymychi i oliv keung kypkyp y patwm nai mana tanrei ne ai mo?
Khumi cheng cheaungkhangchi ai Tameuh i pahen nai
25 Amjo amnauchi awi, Cheng Takhrachi ai angym hai y rai khala y Israela khumi phyreichi i tlang tleaung y ly kyh chawn veng naira tym bo, nanai hini leu kathiu ly nangchi pany y ai nai kangai y leang, ti y baly nangchi ly tahm apasang u lawh na.
26 Hunaibaly Israelachi bawibawi ly hengra nga ai:Ref 11.26: Is 59.20
“Paheng Keung ly Zion i dengdairei theu iy,
Jakob teng i dengdairei Tameuh ai dawn y naira
ang tama hai ai.
27 Nichi i kamngo kala pi veng nai khala y ly
Huni ly nichi teng y kai i leu maikawm ne,’
nanai tajiu nai kamta.Ref 11.27: Jer 31.33–34
28 Satang Kahawi mang y dawn baly nichi ly nangmychi deaungkho y paleung ka-e ne; vawi nai molam y dawn nai naini nichi ly pajochi deaungkho y ngai parai naichi ne.
29 Tameuh i jawm my pei nai sa thai naira hawi, palau nai molam y py paleung adawn ali ai nai by y leang.
30 Nangchi ly jangni y ly Tameuh i leu tangai u y, na i py vai ly nichi i leu tangai y nai deaungkho y nangchi ly pahen naira nga u chy bo;
31 hunai kamta teang vai ly Tameuh my nangchi ai ang pahen nai deaungkho y nichi py pahen naira nga u thai ai nai nichi py leu tangai u y leang bo he.
32 Tameuh my pahen bebe thai ai nai khumi bawibawichi ai ly leu tangai y naira y ang paeung bebe veng.
Tameuh i pahen nai ai palo nai
33 Aw! Tameuh i cheng naira hawi pany naira ly khri thiu na ly! Mymy i chih nairachi ly pipi pany pajau y, mymy i sa nai sai ly patawm pajau ai nai aveng!Ref 11.33: Is 55.8
34 Areng i paleung ly ami pany mo? Mymy ai ka-vo dawn hai ai nai py ami mo?Ref 11.34: Is 40.13
35 Mymy teng y heung teang ai nai py atiti ami pei man mo?Ref 11.35: Job 41.11
36 Mymy teng i dengdairei hawi, mymy deaungkho y hawi, mymy i vui py atiti bawibawi awm nai ne. Mymy teng y ly deungtasa khrairei palo naira awm jojo sy. Amen.Ref 11.36: 1 Kor 8.6