6
Solomon my mipuichi teng y leu thui nai
(1 Areng 8:12-21)
1 Samrang Solomon ly
“Aw Areng, nang ly nangmy awm ai nai tamai hawi kaveng ai vawi takhra bo.
2 Vai kai ly nang i awm ai nai Achura yhm,
nang my deungtasarei awm ai nai meingtym sa nai ly cheang bo,” nanai chiu sa nai ne.
3 Israela khumi mipui bawibawichi ly huni meingtym y angdo u. Samrang ly hunichi mang y motha iy, nichi ai Tameuh my amtheaung hai ai nai takeng.
4 Naibaly samrang my, “Israela chengchi i Areng Tameuh ai palo u! Mymy ly kai i ampo Davida teng y adeu nai leu ly khaw hai bo.Ref 6.4-9: 2 Sam 7:1-13; 1 Neng 17:1-12
5 ‘Nichi ai Aikupta pri i kapahawi nai neng dengdai vaini khrairei, kai ly mani Israela marychi ai py, kai ai chiu nai meingtym palawn ai nai vawi takhra y leang. Mani khumi ai py kai i khumi Israela chengchi ai lu sa ai nai vawi takhra y leang.
6 Na i py vai kai ly Jerusalem mary y kai ai chiu ai nai meingtym palawn nai py, kai i khumichi ai peang ai nai keung y nang Davida ai kang vawi takhra nai ne,’ nanai leu pei bo,” napi.
7 Naibaly Solomon my thui bi nai ly “Kai i ampo Davida ly Israela chengchi i Areng Tameuh ai chiu naira Achura yhm sa ai nai paran teu i py,
8 Areng my ni teng y, ‘Nang ly kai i vui Achura yhm sa ai nai paleung ka-dawn awm nai ly amlau parai nai ne.
9 Na i py nang ly sa ai nai ngo y leang. Sa ai nai keung ly nangmy i chapo kypkyp ne,’ napi.
10 “Vai Areng ly mymy i adeu nai kamta sa bo. Kai ly ngaai i meingtym amtym iy, Israela chengchi i Areng Tameuh ai chiu ai nai Achura yhm sa nai pajau bo.
11 Kai ly Israela chengchi hawi Areng asa nai Leu Maikawm lengseaung phei awm nai Leu Maikawm Pawm py, Achura yhm theung y khai bo,” nanai mipuichi teng y thui pi nai ne.
Solomon i chiu sa nai
(1 Areng 8:22-53)
12 Naibaly Solomon ly khumichi i mei ka-niu y maicham mo y angdo nai kiu pheu iy chiu sa bo.
13 (Solomon ly jeng miu pangrei, kah miu pangrei, ka-sang miu thomrei awm nai kheupaja bailang sa iy, huni ai ly apai theung i ly-um y khai bo. Samrang ly huni bailang salo y lyn iy khumichi my niu pajau naira y kheukhu di naimy kiu pheu.)
14 Mymy ly hina nai chiu sa, “Aw Israela chengchi i Areng Tameuh, kani hawi khaileaung salo y nang hawi atawm nai tameuh by y. Nang i khumichi ly nang i leu ai takhawi y naimy tangai u nai khala, nang ly nichi hawi asa nai Leu Maikawm taphra y naimy, nichi ai tamen nai ne.
15 Nang ly kai i ampo Davida teng leu adeu nai ly khaw hai bo. Nangmy leu pei nai kamta, vaini angym hai bo.
16 Aw Israela chengchi i Areng Tameuh, nang ly kai i ampo Davida teng y, ‘Nang i kangpreangchi ly nang kamta reita leu hawihai palai tangai baly, Israela pri y nang i samrang kangpreang mana khala py avaw by ai ny y,’ nanai leu adeu nai py khaw hai ba.Ref 6.16: 1 Areng 2.4
17 Hunai deaungkho y aw Israela chengchi i Areng Tameuh, nang i miseaung, kai i ampo Davida teng y adeu nai ngierei, vai tym hai ba.
18 “Na i py aw Tameuh, nang ly khaileaung salo i khumi neampacho, neampachychi theung y awm pajau na a? Kani khusang malawn py nang awm ai nai akeaung y na baly, kai i sa nai Achura yhm ly mana akeaung ai mo?Ref 6.18: 2 Neng 2.6
19 Aw kai i Areng Tameuh, Kai ly nang i miseaung ne. Kai i chiu sa nai tangai pi kyh ba. Kai i hnei takeng nai pei ba.
20 Hini Achura yhm ai vum, kanithun kry pi ba. Hini meingtym y nang ai chiu ai nai tla, nanai nangmy leu pei nai deaungkho y, hini Achura yhm mang y motha naimy, kai chiu sa nai khala tangai pi kyh ba. Ref 6.20: Tara 12:11
21 Kai i chiu sa naichi py, hini meingtym mang y motha iy nang i khumichi chiu sa nai py tangai pi kyh ba. Nang i awm nai kani pri mang dengdairei, kaichi i hnei takeng naichi tangai pi iy, kaichi i kamngochi pahen pi kyh ba.
22 “Khumi leaungrei ly takhra khumi leaungrei ai sa tamang, nanai seu iy, mymy ly kamngo by y, nanai hini Achura yhm nang i maicham mo y vaineng abeu nai khala,
23 aw Areng, kani pri mang tangai iy, nang i miseaungchi ai tara chih ba. Kamngo by y nai ai ly lawi hai iy mychi i ngai nai kamta, kamngo awm nai khumichi ai ly pasum ba.
24 “Nang i khumi Israela chengchi ly nang i tlang tleaung y kamngo sa nai molam, paleung ka-echi kiu y sum u nai deaungkho y, nichi ly mychi i kamngo lawira nga ai nai nang teng y ali iy, Achura yhm y chei ai nai paleung apanem naimy chiu sa nai khala,
25 kani pri mang dengdairei nichi i chiu sa nai tangai pi kyh ba. Nang i khumichi i kamngo pahen pi iy, nichi hawi nichi i amsi pajochi teng y, nangmy pei ai nai pri mang y pahawi ba.
26 “Nang i tlang tleaung y nang i khumichi my sa tamang nai molam y kani khang hai nai khala, nichi ly uikheih iy hini Achura yhm mang y motha nai paleung apanem naimy chiu sa lawh baly,
27 aw Areng, kani pri mang dengdairei tangai pi kyh ba. Nang i miseaung Israela khumichi i kamngochi pahen pi kyh ba. Nichi ai lam kateng mang y pahawi ba. Nang i khumichi teng y pei nai pri y kani nai hai pi teang kyh ba.
28 “Hini pri y takang theu nai khala py, chym thai nai no michi tym nai khala py, amti amjangchi ali kabi avum nai, mipo avum nai, ti y baly akhutama kanghuchi tym miu nai molam y phra nai khala py, nang i khumichi ai paleung ka-echi my tiu nai khala py, nichi teng y ka-jeira, no mi ha harei tym nai khala py,
29 nichi i chiu sa nai tangai pi kyh ba. Nang i khumi Israela cheng phyreichi ly khri pa-rei paleung si naimy, hini Achura yhm mang y kiu pheu iy chiu sa u lawh baly,
30 nichi i chiu sa nai tangai pi kyh ba. Nang i awm nai kani pri mang dengdairei tangai pi iy, nichi i kamngo pahen pi ba. Nang naini nichi i dawn pasym nai pany pi bo. Khumi leaung leaungreichi ai avo nai kamta, tara chih pi ba.
31 Huna khala naini nang i khumichi ly amsi pajochi teng y pei nai pri y awm nai sala ryrei, nang ai tahm khai naimy leu tangai u ai.
32 “Nang ly mana tanrei len na mo, mana tanrei sa thai naira awm na mo, nang i kiuban hawi mana sa nai mo, nanai kamlo ra i cheng takhra khumi leaungrei ly thai nai deaungkho y, hini Achura yhm y jeu iy chiu sa nai khala,
33 nangmy awm nai kani pri mang dengdairei tangai iy, huni khumi i hnei nai kamta so pi ba. Huna khala naini khaileaung pri y awm nai khumi bawibawichi ly nang i khumichi kamta, nang ai pany iy nang i leu tangai u ai. Naibaly nichi ly nang i vui kai i sa nai Achura yhm ly nang ai chiu nai meingtym ne, nanai pany u ai.
34 “Nang i khumichi ly paleung ka-echi ai tiu ai nai nangmy leu pei nai khala, nichi ly mani meingtym y py awm sy, nangmy vawi takhra nai hini mary hawi, nang i vui kaimy sa nai hini Achura yhm mang y motha iy chiu sa u baly,
35 kani pri mang dengdairei tangai pi ly nichi ai eaung naira pei ba.
36 “Kamngo so y nai khumi ly leaungrei py by y. Na i py nang i khumichi ly nang i tlang tleaung y kamngo sa u ai. Huna nai khala nang ly kado theu nai, nichi ai paleung ka-echi kiu y sum hai iy, pri takhra mang y hawi hai pawn ai. Huni pri ly khri pa-rei palo teu i py,
37 nang ly nangmy i khumichi i chiu sa nai tangai pi ai. Nichi ly huni pri y uikheih iy mychi mana tanrei kamngo sa tamang u mo, mana tanrei hawi y na mo, nanai apany iy, nang teng y chiu sa u lawh baly, aw Areng, nichi i chiu sa nai tangai pi kyh ba.
38 Nichi ly huni pri y uikheih tatang naimy, mychi i amsi pajochi teng y nangmy pei nai pri, nangmy vawi takhra nai hini mary pui, kai i sa nai hini Achura yhm mang y motha iy chiu sa u lawh baly,
39 nangmy i awm naira kani pri mang dengdairei tangai iy, nichi ai pahen ly nang i khumichi i kamngo pahen pi kyh ba.
40 “Aw kai i Tameuh, vai kaichi ai khen iy, hini meingtym y chiu sa naichi tangai pi kyh ba.
41 Aw Areng Tameuh, vai ang thau iy, nang i sa thai nai ka-ma-ra Leu Maikawm Pawm hawi vanrei, Achura yhm theung y jeu ly deungtasarei awm jo ba. Nang i khumichi ly mymychi nga nai pahen naira molam y, amo theu u sy.Ref 6.41-42: Sam 132:8-10
42 Aw Areng Tameuh, nangmy vawi takhra nai samrang ai ly khai su moh kyh ba. Nang i miseaung Davida i tlang tleaung y tamen nai ly pany pi jo kyh ba,” nanai chiu sa nai ne.