31
Hezekia my Reita leaungsaichi palai vui nai
1 Pawi lui nai bo y Israela cheng bawibawichi ly Juda pri mary tleirei y chei iy, lengseaung leungchengchi hawi tameuhnu Asherah i tamkhawnchi taphra u. Maichamchi hawi myn chiu nai maichamchi py panawi u bo. Nichi ly Juda khu ka-peang, Benjamin khu ka-peang hawi Manase khu ka-peangchira py, hina nai kamta sa u chum baly, mymychi i yhm mang y vawi u nai ne.
2 Samrang Hezekia ly pathyp pi nai keungchi hawi Levi theaung kamkawm sa palai teang iy, nichi leaung leaungrei i vui kalopchi phy pi patyp bo. Huni kalopchira y leng patlum nai kapathypra hawi amkawm teang nai kapathyprachi talam nai, Achura yhm theung y chiu sa naira abawi nai, Achura yhm meingtym tleirei y palo nai hawi kawn nai leu thui naichi abawi nai ne.
3 Samrang ly Areng i Reita leu y awm yb nai kamta, kani tleirei khawn mang py, dym mang py, anawn kani, lo si pawi kani hawi takhra pawi kanichi khala y leng patlum ai nai aly ngai nai si hawi beramchi ai, mymy hai theung i pei pi nai ne.Ref 31.3: Kati 28.1—29:39
4 Huni bo y pathyp pi nai keungchi hawi Levi theaungchi ly Areng i Reita leu pei nai kamta, neng tleirei sa akheng pajau ai nai nichi i aly ngai nai atitichi ly Jerusalem mary i khumichi my syn u ai nai leu pei bo.Ref 31.4-5: Kati 18:12-13, 21
5 Leu pei nai thai phai thai baly Israela khumichi ly choh, kreip hang, olive asitui, khawi hang hawi takhra li hlaura i amti amjang athai chuluchinote 31:5\xk athai chuluchi: Athai chuluchi ly pathyp pi nai keungchi i vui ne, horei y harei ly Levi theaungchi i vui ne. \x* py, nichi teng y awm nai vawnsaichi horei y harei py, syn u nai ne.
6 Juda marychira y awm nai khumi bawibawichi py, mymychi i si, beram horei y harei hawi talam nai langseaung neangneangchi py syn u iy, Areng teng y talam u bo.
7 Huni talam nai vawnsaichi ly pa-thom lo dengdai palyh lo ryrei, hu y pateung u achu nai ne.
8 Samrang Hezekia hawi miteaung kehchi ly pateung achu nai vawnsaichi niu nai khala ly Areng ai palo iy, mymy i khumi Israela chengchi ai py palo u bo.
9 Samrang my huni talam nai vawnsaichi molam y, pathyp pi nai keungchi hawi Levi theaungchi teng y leu pei nai khala ly
10 Zadok i kangpreang pathyp pi nai keung kalen keh Azariah my, “Mipuichi my hini talam nai vawnsaichi Achura yhm y syn pi nai dengdairei, kaichi cha nei ai nai aleu palai nai ly kamlai awm nai ne. Hina tanrei kaichi nga nai ly Areng my mymy i khumichi ai amtheaung naira pei nai deaungkho y ne,” nanai thui pi.
11 Samrang i leu pei nai kamta Achura yhm apai theung y, vawnsaichi khai ai nai takunchi sa iy,
12 huni vawnsaichi hawi horei y harei talam nai vawnsaichi khai u bo. Nichi ly vawnsai khaira takunchi kry ai nai Levi theaung Konania ai lu sa ai nai py, ni i amnau Shimei ai ni i bangtang sa ai nai py khai u.
13 Nini i anui y kalop sa ai nai Levi theaung leaung horei napi nai Jehiela, Azazia, Nahath, Asahela, Jerimoth, Jozaba, Eliel, Ismakhia, Mahath hawi Benaiachi ai py khai bo. Hini kalopchi ai samrang Hezekia hawi pathyp pi nai keung kalen keh Azariah nini my khai nai ne.
14 Levi theaung Imanah i chapo, nisi katheu pa-kho typ nai keung Kore ly pei talam nai vawnsaichi kry nai hawi paji nai keung ne.
15 Pathyp pi nai keungchi awm nai takhra marychira y takhra Levi theaungchi napi nai Eden, Miniamin, Jesua, Shemaiah, Amariah hawi Shekaniachi py awm. Nichi ly Kore i tlang tleaung y ka-ym awm naimy sabawm pi naichi ne. Nichi ly mymychi i amjo amnau Levi theaungchi teng y,
16 nupai ka-thui ny y naimy nichi i sa nai kalopchira y, huni talam nai vawnsaichi phy paji pi. Achura yhm theung y kani tleirei kalop sa nai saneng phairei hawi leng awm nai khumichi ly phy ha harei nga u nai ne.
17 Pathyp pi nai keungchi ly mymychi nupai ka-thui kalopchi sa u iy, saneng apomrei hawi leng awm nai Levi theaungchi ly kalop kamkawmchi ka-thui sa u nai ne.
18 Huni khumi bawibawichi ly mymychi i vui khai pi nai kalopchi sa ai nai angveirym naichi ne i, aju chanauchi hawi vanrei takhra khumi ka-vangchi hawi amyn pakun bawi ai nai tla.
19 Aron i kangpreangchi i vui meingtym khai pi nai marychi ra y py ne sy, huni marychi hawi amtawn nai sui tlai naira y py ne sy, pathyp pi nai keungchi vui cha nei vawn phy paji pi nai luchi awm. Nichi ly pathyp pi nai keungchi i yhm dengtheung neampacho ngiereichi ai, cha nei vawn paji pi nai ne.
20 Samrang Hezekia ly Juda pri verei y kahawichi py, mymy i Areng Tameuh i kangaichi py sa nai ne.
21 Ni ly Achura yhm i vui sa nai kalopchira py, Reita leu pei nai ai kry naira py, mymy i Tameuh teng y paleung hawi tlang apei naimy sa nai deaungkho y eaung naira nga nai ne.