23
Athalia ai tiu nai
(2 Areng 11:4-16)
1 Jehojada ly saneng tariurei ajeng nai bo baly, kalop sa ai nai neng tym bo, nanai adawn i, tavaimi miteaung keh leaung pangreichi napi nai, Jeroham i chapo Azariah, Jehohanan i chapo Ismaela, Obed i chapo Azariah, Adaiah i chapo Maseija hawi Zikhri i chapo Elishaphatchi hawi leu ka-dyh nga bo.
2 Nichi ly Juda mary tleirei y chei i, Levi theaungchi, nupai lu sa nai bawibawichi ai Jerusalem mary y hawi u.
3 Nichi ly Achura yhm theung y angym u iy, samrang i chapo Josha hawi Leu Maikawm asa u bo. Jehojada my nichi teng y, “Dei veng nai samrang i chapo hi y awm; Samrang Davida i kangpreangchi teng y Areng my adeu nai kamta, ni ly vai samrang lawm ai.Ref 23.3: 2 Sam 7:12
4 Achi ly mana sa ai mo, nanai kang thui pi ai. Anawn kani y kalop sa ai jeu nai Levi theaungchi theung i, phy thomrei y phyrei ly Achura yhm katheu pa-kho typ u ai nai tla.
5 Takhra phy thomrei y phyrei ly samrang i yhm y; huni bo i naichi ly keaungngo katheu pa-kho tym ai nai tla. Khumi bawibawichi ly Achura yhm apai theung i ly-um y akachu bawi ai nai tla.
6 Kalop tla nai pathyp pi nai keungchi hawi Levi theaungchi ny y baly, Achura yhm theung y ami py kun moh sy. Huni khumichi ly Areng i vui khai takhra yb naichi ne nai deaungkho y kun pajau. Na i py takhra khumi bawibawichi ly kun pajau y, angam mang y awm ai nai tla.
7 Levi theaungchi ly samrang sahawi y haisauchi pa iy kry ai nai tla. Samrang chei naira tleirei y abang ai nai tla. Achura yhm theung y kun ai nai atho sa nai ngierei ai ly padei ai nai tla,” napi.
8 Levi theaungchi hawi Juda mipui bawibawichi ly Jehojada i leu tangai u bo. Anawn kani y nichi ly mychi i kalop sa nai anawn i py, yhm mang y vawi ai nai ngo y. Hunai deaungkho y kalop pacheang nai keungchi ly kalop tla naichi hawi kalop anawn naichi ai palau iy kalop pataw pajau nai ne.
9 Jehojada ly Achura yhm theung y samrang Davida my khai nai tivichi hawi khopuichi ai, kalop amsi keungchi teng y au bo.
10 Ni ly mangleaung ai typ ai nai haisau pa nai risachi ai Achura yhm nisi mang y meingtym la hai bo.
11 Naibaly Jehojada ly Josha ai patheu iy, samrang lukhym amym hai i, samrang i reita cha-iu talam pi. Hina nai kamta Josha ai samrang palyn u nai ne. Pathyp pi nai keung Jehojada hawi ni i chapochi ly Josha ai asitui lei pi nai khala khumi bawibawichi my, “Samrang ly heng sau sy!,” nanai aeu u.
12 Athalia ly samrang ai khumichi my tahm pasang nai katyn thai nai deaungkho y, khumichi awm achu nai Achura yhm mang y tym tamangtang bo.
13 Naibaly tavai luchi hawi baw eng nai khumichi taki teungtareung naimy Achura yhm katheu pa-khora i leungcheng sahawi y, samrangchi i vui khai takhra nai meingtym y angdo nai samrang kangtha ai niu. Khumi mipui bawibawichi ly amo theu parai naimy aeu nai, bawchi eng nai, Achura yhm katyn kapau beu kawp naichi my py, mymychi i katyn kapauchi beu nai, samrang palyn nai pawi sa u nai ne. Huna nai khala Athalia ly my i ateaung sei iy, “Ang tiu nai bo na a! ang tiu nai bo na a hi ly!,” nanai aeu bo.
14 Jehojada ly Athalia ai Achura yhm apai theung y padei ai nai ngai y nai deaungkho y, “Ni ai tamcheaungchi theung i nai patheu u; ni ai sabawm nai khumi ai ly padei u pawn,” nanai tavai luchi teng y leu pei bo.
15 Nichi ly Athalia ai patiu iy, samrang yhm mang y pahawi i, keaungngo katheu pa-khora padei u nai ne.
Jehojada i sa palai vui naichi
(2 Areng 11:17-20)
16 Jehojada ly samrang Josha hawi vanrei khumi mipuichi ai, Areng i khumichi lawm hai ai nai mymy hawi Leu Maikawm asa bo.
17 Nichi ly Bala tameuh i achura yhm taphra u. Maichamchi hawi mynchi khei piupa iy, maichamchi mo y Bala pathyp pi nai keung Mattan ai padei u nai ne.
18 Jehojada ly pathyp pi nai keungchi hawi Levi theaungchi teng y, Achura yhm i kalopchi sa ai nai khai. Nichi ly samrang Davida my khai pi yb nai kalopchi sa iy, Mosi i Reita cha-iu theung y tajiu nai kamta, leng patlum nai kapathyprachi Areng teng y talam u. Nichi ly katyn kapau beu nai hawi pawi sa nai kalopchi py sa u ai tla.
19 Jehojada ly Achura yhm theung y reita tanyn hawi amlau y nai, chai y nai khumi leaungrei py kun y ai nai, katheu pa-khora y tamcheaungchi khai bo.
20 Tavai luchi, mary i miteaung kehchi, samrang i bangtangchi hawi takhra khumi mipuichi ly Jehojada nithun abang iy, samrang ai Achura yhm i dengdairei samrang yhm mang y, katheu pa-kho lam mang pahawi nai, samrang atehra bailang salo y ateh hai bo.
21 Athalia ai ly padei chum veng bo i, khumi mipuichi ly amo theu u i, mary verei awmnem u bo.