20
Edom pri y tavai tiu nai
1 Neng kra kyh nai bo y Moba pri hawi Ammon pri i tavaimi kamkawmchi ly mychi hawi nai asa nai Meunit chengchi hawi vanrei, Juda pri y tavai tiu u bo.
2 Huni satang thai nai khumichi ly samrang Jehoshapha teng y jeu i ni teng y, “Khri pa-rei atho awm nai tavaimi kamkawm pui harei ly nang ai tiu ai nai pangli vai, Edom pri mang dengdairei ang jeu u bo. Nichi ly Hazazon Tamar mary nga vui bo,” napi. ( Huni amyn takhra ly Engkadi, napi)
3 Jehoshapha ly jei phi nai deaungkho y Areng teng y chiu sa. Naibaly ni ly Juda pri verei y biu hai ai nai kani khai pi bo.
4 Juda pri mary tleirei i khumichi ly Areng i lam patei nai hnei takeng ai nai, Jerusalem mary y tym u bo.
5 Naibaly nichi ly Jerusalem mary i khumichi hawi vanrei, apai theung i ly-um kangthara y angym u bo. Samrang Jehoshapha ly nichi i mo y jeu iy angdo;
6 Naibaly aeu naimy chiu sa nai ly “Aw kaichi amsi pajochi i Areng Tameuh, nang ly kani pri mang y awm iy khaileaung pri y awm nai khumi cheng cheaungkhangchi ai peang nai ne. Nang ly sa thai naira hawi nang parai naira kawi angym nai deaungkho y, ami py nang ai ka-awi so pajau y.
7 Nang ly kaichi i Tameuh ne. Nang i khumi Israela chengchi ly hini pri y kun nai thym khala, nang ly hini pri y awm yb nai khumichi ai patheu vui iy, hini pri ly nangmy i ahawi Abraham i kangpreangchi teng y deungtasarei amtym ai nai pei pi bo.Ref 20.7: Is 41.8; Jak 2:23
8 Nichi ly hini pri y awm iy nang ai tahm pasang ai nai Achura yhm sa u nai ne.
9 Tavai ka-jeira, chym thai nai no mi ka-jeira, takang ka-jeirachi napi nai, mani ka-jeira py ne sy, tym nai thym khala nichi ly nang ai chiu ai nai Achura yhm mo jeu iy angdo naimy chiu sa baly, nang ly tangai pi iy, nichi ai atleu pi ai, nanai kaichi ym.
10 “Vai ly Ammon khumi, Moba khumi hawi Edom khumichi ly kaichi ai tiu u bo. Kaichi i amsi pajochi Aikupta pri i dengdairei theu nai thym khala, amsi pajochi ai huni pri y kun ai nai nangmy pei y. Na i py nichi ly huni pri ai en vui iy taphra y naimy khai u bo.Ref 20.10: Tara 2:4-19
11 Hina nai sa nai molam y nichi my vawitheung tha teang i, kaichi ai nang i pei nai pri dengdairei patheu ai nai ang tym u bo.
12 Nang ly kaichi i Tameuh ne! Kaichi ly vai, ang tiu ai nai jeu nai tavaimi kamkawm pui ai kaichi ly amtang pajau y nai deaungkho y, mana sa ai mo, nanai dawn pajau y. Na i py kaichi ly sabawm naira nga ai nai, nang teng y angdeang u nai bo,” nanai tao pajeng parai naimy chiu sa nai ne.
13 Juda neampacho bawibawichi ly mymychi i aju chanauchi hawi vanrei, Achura yhm mo y angdo u bo.
14 Areng i phailo ly khumi humchi theung y awm nai Levi theaung leaungrei tlang tleaung y tym bo. Huni khumi ly Zekhariah i chapo Jahaziela ne. Ni ly Asap, Mattniah, Jeiela hawi Benaia kangpreang ne.
15 Jahaziela my, “Samrang hawi vanrei Juda khumichi, Jerusalem mary i khumichi awi, nangchi ly paleung phra atho di u moh. Hini tavaimi kamkawm pui hawi atiu ai nai jei u moh, nanai Areng my leu pei nai ne. Hini tavai ly nangchi i vui ny y, Tameuh i vui teu.Ref 20.15-17: Tara 20:1-4
16 Khawndam huni khumichi ly Ziza mary mawi sala lam mang ang lem heu nai khala, nichi ai tiu u. Nangchi ly Jeruela sahawi daichi ka-vym mang y chei nai leaunghawi katemra y, nichi hawi avum u ai.
17 Nangchi ly hini tavai atiu u ai ny y; meingtym naini la iy ajeng u. Areng my nangchi ai eaung naira pei nai niu u ai. Juda khumichi hawi Jerusalem mary i khumichi awi, paleung adi adiu nai awm u moh. Jei y naimy atiu u. Areng ly nangchi hawi vanrei awm ai!,” nanai leu pei nai thui pi bo.Ref 20.17: Theu 14:13-14
18 Huna nai khala samrang Jehoshapha ly khaileaung y abiri na pa-rei lu meung bo. Khumi mipuichi py samrang hawi vanrei ambeu naimy Areng ai chiu u nai ne.
19 Kohath hawi Korah nupaichi theung i Levi theaungchi ly angdo iy, Israela chengchi i Areng Tameuh teng y tao pajeng parai naimy chiu sa u bo.
20 Huni bo i kani khawn angthodyh khala, khumichi ly Tekoa sahawi daichi ka-vym mang y theu u. Theu u enten nai khala Jehoshapha my khumichi teng y, “Juda khumichi hawi Jerusalem mary i khumichi awi!, nangchi ly nangmychi i Areng Tameuh ai ym u baly, angdo u pajau ai. Mymy i amochi my thui nai leu ym u baly eaung naira nga u ai,” napi.
21 Samrang ly khumichi hawi leu adeng ahui pajau baly, katyn kapau beu kawp nai phyreichi ai khai takhra nai pawi kani khala, amthyp reng nai ateaungchi amthyp hai i, tavaimi kamkawmchi mo mang lyn hai iy, “Areng ai ly palo u! mymy i tamen nai ly deungtasarei ne!,” nanai khulym thui u ai nai leu pei bo.
22 Nichi khulym thui u amteaung nai thym khala, Areng ly tym dudu nai tavaimichi ai ahei hai phro bo.
23 Ammon tavaimichi hawi Moba tavaimichi ly Edom tavaimichi ai tiu nai pajau u chum baly, mychi tengtawi atiu nai atamyh u na.
24 Juda tavaimi kamkawm ly daichi ka-vymra i angdeangra y tym nai khala, paleung ka-echi mang y khen cham baly, leaungrei py tleaung y naimy dei bebe nai, khaileaung y atlymtla nai niu u bo.
25 Jehoshapha hawi ni i tavaimi kamkawmchi ly paleung ka-echi i vawnsaichi pakym ai nai tym u nai khala, si hawi beram neangneangchi, cha nei vawnchi, ateaungchi hawi takhra vang kateng vawnsaichi niu u nai ne. Nichi pakym nai vawnsaichi ly khri pa-rei nawi nai deaungkho y, kani thomrei pakym nai malawn py khei leila y.
26 Palyh kani y nichi ly Berakanote 20:26\xk Beraka: Hebrai leu y “palo nai” nanai sai ne. \x*leaunghawira angym u i, Areng i sa pi nai molam y mymy ai palo u bo. Huni deaungkho y huni leaunghawi ai ly Beraka, nanai palau u.
27 Jehoshapha ly eaung naira nga i, my i tavaimichi ai Jerusalem mary y pahawi teang bo. Ati mana nai mo na baly nichi i paleung ka-echi ai Areng my sum hai nai deaungkho y ne.
28 Nichi ly mary y tym nai khala tarochi, bawchi eng iy Achura yhm mang y tapai u.
29 Israela chengchi i paleung ka-echi ai Areng my tavai pasum bo, nanai thai nai khumi cheng cheaungkhangchi ly jei hyn u nai ne.
30 Hunai deaungkho y Jehoshapha ly tlamsa naimy peang ai nai nga. Tameuh my ni i pri meingtym tleirei y chymme naira awm hai bo.
Jehoshapha i peang nai sai kangtem
(1 Areng 22:41-50)
31 Jehoshapha ly saneng 35 rei awm nai khala Juda samrang y lyn i, Jerusalem mary y saneng 25 rei peang nai ne. Ni i amhm ly Shilahi i chaniu Azuba ne.
32 Ni ly my i ampo Asa kamta Areng i mo y hawi nai kalopchi sa.
33 Na i py myn chiu nai meingtymchi taphra y. Khumichi ly mymychi amsi pajochi i Areng Tameuh ai chiu ai nai paleung apei y nai ne.
34 Jehoshapha i samrang sa angchei nai dengdai tem khala khrairei, ni i sa nai leaungsai bawibawichi ai Israela samrangchi i cha-iu, Hanani i chapo Jehu i cha-iu theung y tajiu pi typ nai ne.
35 Tlenrei nai khala Juda samrang Jehoshapha ly hawi y nairachi neangneang sa nai Israela samrang Ahazia hawi miso vuinai asa hawi bo.
36 Nini leaung nyhrei ly Ezijokeba sampho khen naira y, Tashu mary mang y chei ai nai samphochi sa u nai ne.
37 Na i py Maresha mary i Dodavahu i chapo Elieza my Jehoshapha teng y, “Nang ly Ahazia hawi miso vuinai asa nai deaungkho y, Areng my vaichi khala sa nai samphochi taphra ai,” nanai thui nai kamta, huni samphochi ly phra iy, Tashu mary y chei pajau y bo.