4
Juda i kangpreangchi
1 Hini ly Huda i kangpreang phyreichi ne. Hunichi ly Perez, Hezaron, Kami, Hura hawi Shobalachi ne.
2 Shobala i chapo ly Reaiah, Reaiah i chapo ly Jaha, Jaha i chapo ly Ahumai hawi Lahad nini ne. Nini leaung nyhrei ly Zorath y awm u nai khumichi i amsi pajo ne.
3-4 Hura ly ampo kaleb i aju Ephrath i tapen nai chapo chalu ne i, ni i kangpreangchi ly Bethlehem mary sa palum u bo. Hura ly Etam, Penuel hawi Eza napi nai chapo leaung thomrei awm. Etam ly Jezarela, Ishama hawi Idaba napi nai chapo leaung thomrei hawi, Hazeleponi napi nai chaniu leaungrei awm. Penuel ly Kedo mary ai palum iy, Eza ly Husha mary ai palum nai ne.
5 Tekoa mary ai palum nai Ashura ly Hela hawi Naarah napi nai aju leaung nyhrei awm.
6 Naarah ly Ahuzam, Hepha, Teman hawi Hahashatari napi nai chapo leaung palyhrei tapen.
7 Hela ly Zeret, Izaha hawi Ethanan napi nai chapo leaung thomrei tapen nai ne.
8 Koza ly Anub hawi Zobebah nini i ampo ne iy, Harum i chapo Aharela kangpreang cheng theaungchi i amsi pajo ne.
9 Huni meingtym y Jabe napi nai khumi leaungrei awm. Ni ly my i yhm dengtheungchi theung y tahm khai keh nai khumi ne. Amhm my ni ai Jabe, nanai amyn pathi. Ati mana nai mo na baly ni ai tapen nai thym khala, amhm ly khri pa-rei patang naira avum nai deaungkho y ne.
10 Na i py Jabe ly Israela chengchi i Tameuh teng y, “Aw Tameuh, kai ai amtheaung hai iy khaileaung neangneang pei ba. Kai hawi vanrei awm hai ba. Kai i tlang tleaung y patang naira tym hai ai nai, hawi y naira cheaungkhang ra i nai lawi hai kyh ba,” nanai chiu sa nai deaungkho y, Tameuh ly Jabe i hnei takeng naichi pei pi nai ne.
Takhra yhm dengtheung charangchi
11 Shua i ampro kaleb ly Mahira napi nai chapo leaungrei awm. Mahira i chapo ly Eshaton ne.
12 Eshaton ly Berapha, Paseah hawi Tehinah napi nai chapo leaung thomrei awm. Tehina ly Nahash mary ai palum nai khumi ne. Ni i katu chanauchi ly Rekah meingtym y awm u.
13 Kena ly Othniela hawi Seraiah napi nai chapo leaung nyhrei awm. Othniela py Hathat hawi Meonothai napi nai chapo leaung nyhrei awm.
14 Meonothai i chapo ly Ophra ne.
Seraiah i chapo ly kupe kawp nai leaunghawi palum nai keung Juaba ne. Huni leaunghawira y awm nai khumi bawibawichi ly kupe kakawp khumichi ne.
15 Jephunna i chapo kaleb ly Iru, Elah, hawi Naam napi nai chapo leaung thomrei awm. Elah i chapo ly Kena ne.
16 Jehalelela ly Ziph, Zipha, Tiria hawi Asarela napi nai chapo leaung palyhrei awm.
17-18 Ezara ly Jether, Mered, Epher hawi Jalon napi nai chapo leaung palyhrei awm. Mered ly Aikupta samrang i chaniu Bithia hawi apom iy, Miriam napi nai chaniu leaungrei hawi, Shalmai, Ishaba napi nai chapo leaung nyhrei nga nai ne. Ishaba ly Esatemo mary ai palum. Mered ly Juda neampachy leaungrei hawi py apom. Nini ly Kedo mary palum nai Jered, Sokoh mary palum nai Heba hawi, Zanoah mary palum nai Jekuthila napi nai chapo leaung thomrei awm nai ne.
19 Hodiah ly Naham i tuicho hawi apom. Nini i katu chanauchi ly Keilah mary y awm nai Maakath cheng theaungchi ai py palum.
20 Shimon ly Amanon, Rinnah, Benhanan hawi Tilon napi nai chapo leaung palyhrei awm.
Ishi ly Zoheth hawi Benzohe napi nai chapo leaung nyhrei awm nai ne.
Shela i kangpreangchi
21 Shela ly Juda i chapo leaungrei ne. Ni i katu chanauchi ly Leka mary ai palum nai Era hawi, Maresha mary ai palum nai Ladah py, Beth Asheba mary y awm u nai kanih mai ka-syn aneng nai nupaichi py,
22 Jokim hawi Kozeba mary y awm u nai khumichi py, Moba neampachychi hawi yhmtheaung sa iy, Bethlehem mary y awm u nai Josha hawi Sarapchi py abawi u nai ne. (Hini ly jangni i leu ne.)
23 Josha hawi Sarap nini ly samrang i kalop sa pi nai laawm beu nai keungchi ne iy, Netaim hawi Kaderah marychi ra y awm u bo.
Simeon i kangpreangchi
24 Simeon ly Nemuela, Jamin, Jarib, Zerah hawi Shola napi nai chapo leaung pangrei awm.
25 Shola i chapo ly Shalum, ni i katu ly Mibasam, ni i katei ly Mishama ne.
26 Mishama dengdai amteaung iy Hamuela, Zakura hawi Shimei khrairei kangpreangchi ne.
27 Shimei ly chapo leaung holai tariurei hawi, chaniu leaung tariurei awm. Na i py ni i amjo amnauchi theung y cho chanau thawn y nai deaungkho y, Simeon i kangpreangchi ly Juda i kangpreangchi kamta, peung y nai ne.
28 Simeon i kangpreangchi ly samrang Davida deung tym pa-rei, anui mang i marychi ra y awm u nai ne. Berasheba, Molada, Hazashuala,Ref 4.28-33: Josua 19:2-8
29 Bilaha, Ezem, Tola,
30 Bethuela, Horama, Zikala,
31 Betmakabo, Hazasusim, Betbiri hawi Sharaim marychi ne.
32 Huni bo y nichi ly Etam, Ain, Rimon, Tokhen hawi Ashan napi nai mary pangreichi hawi vanrei,
33 nidym ngan mang Bala mary khrairei, tengpang sahawi avangchi ra py awm u nai ne. Hini ly mymychi yhm dengtheung hawi mymychi i awm nai meingtymchi satang record ra y tajiu typ naichi ne.
34-38 Huni khumichi i cheng theaung lu sa naichi ly:
Meshoba, Jamaleh, Amazia i chapo Josha, Joela,
Jehu (Joshibia i chapo, Seraiah i katu, Asiela i katei)
Elioenai, Jakobah, Jeshohaia, Asaiah, Adiela, Jesimiela, Benaia,
Ziza (Jedaih, Shemaiah hawi Alon kangpreang Shiphi i chapo ne.)
Ati mana nai mo na baly huni khumichi i yhm dengtheungchi ly peungra peungra nai deaungkho y,
39 nidym ngan mang Kera mary sahawi tym pa-rei ahei na i, huni mary leaunghawi nisi mang y beramchi ai teicha patlai u nai ne.
40 Nichi ly tlamsa nai adym ra y sui tlaira kahawi niu u bo. Huni meingtym y awm nai khumichi ly Hamite chengchi ne.
41 Juda samrang Hezekia i deung y, salo mang i khumichi ly Kera mary y chei iy, Hamite chengchi ai nichi i yhmchi hawi vanrei, taphra pi pawn chum baly huni meingtym y khuteng sa iy awm u nai ne. Ati mana nai mo na baly nichi ly mymy i beramchi vui sui tlai naira hawihai palai nga u nai deaungkho y ne.
42 Simeon i nupai khumi leaung chungvai pangreichi ly nisi ngan Edom pri mang y chei u bo. Nichi ai lu sa nai khumichi ly Pelatiah, Neriah, Rephaia hawi Uzielachi ne. Nichi ly Ishi i chapochi ne.
43 Nichi ly awm rai nai Amalek chengchi ai padei iy, huni meingtym y vaini khrairei awm u bo.