20
Rabah mary ai Davida my peang vui nai
(2 Sam 12:26-31)
1 Saneng pa-nyh nisa katheu, samrangchi tavai amsa reng nai neng khala, Juaba ly tavaimichi ai lu sa iy, Ammon pri mang y tavai thau nai Rabah mary ai katanmeuh bo. Davida ly Jerusalem mary y awm nai ne. Juaba ly Rabah mary ai katanmeuh nai tiu iy taphra vui bo. Ref 20.1: 2 Sam 11:1
2 Ammon chengchi i chiu nai Mole tameuh myn i lu tleaung y kaji sie 85rei awm nai muku areng lukhym awm. Huni areng lukhym ra y vang kateng lengseaung harei awm. Huni lengseaung ai Davida ly la iy, mymy i areng lukhym ra y tai bo. Ni ly Rabah mary i nga nai vawnsai neangneangchi py la vui nai ne.
3 Huni mary i khumichi ai hawi iy raw, phalava, atiuchi hawi sa ai tla nai kalop ramchi sa hai bo. Davida ly Ammon pri takhra marychi ra i khumichi ai py, hina nai kamta sa iy, mymy i tavaimichi hawi vanrei, Jerusalem mary y vawi ali teang bo.
Tleungtlang len nai Philistia chengchi hawi atiu naichi
(2 Sam 21:15-22)
4 Naibaly Keza mary y Philistia chengchi hawi tavai atiu bi bo. Hini tavai atiu naira y Husha mary i Sibekai ly Sipai napi nai tlang len nai sorai risa ai padei vui nai deaungkho y, Philistia chengchi ly tavai sum u nai ne.
5 Huni bo y Philistia chengchi hawi tavai atiu bi. Huni atiu naira y Ja-ira i chapo Elahanan ly kath mary i Koliatha i amnau Lahmi ai padei vui bo. Elahanan i tivi apheung ly pe cheaungkheu tirei len nai ne.Ref 20.5: 1 Sam 17:4-7
6 Huni bo y kath mary y tavai atiu bi nai ne. Huni atiu naira y, kiu makengrei y kiu pajeung tariurei hawi kheu pheirei y kheu pajeung tariurei awm iy, khri pa-rei tleungtlang len nai khumi leaungrei abawi. Ni ly tleungtlang len nai jangni i khumi kangpreang ne.
7 Ni ly Israela chengchi ai tahm khai y nai leuchi thui nai khala, Davida i amjo Shama i chapo Jonathan my ni ai padei vui bo.
8 Davida hawi ni i risachi my padei nai hini khumi leaung thomreichi ly kath mary i, tleungtlang len nai khumi kangpreang ne.