15
Leu Maikawm Pawm tapyn ai nai angveirym nai
1 Davida ly mymy i vui yhmchi Jerusalem mary y sa bo. Tameuh i Leu Maikawm Pawm i vui py, meingtym hareira y Tai harei sa.
2 Naibaly samrang my, “Areng ly mymy i Leu Maikawm Pawm angjeaung ai nai hawi, mymy i kalop sa jojo ai nai Levi theaungchi ai naini khai takhra nai ne i, nichi naini Leu Maikawm Pawm angjeaung ai nai tla,” napi.Ref 15.2: Tara 10:8
3 Hunai deaungkho y Davida ly Leu Maikawm Pawm angjeaung ai nai Jerusalem mary y Israela khumichi ai pangym achu bo.
4 Naibaly samrang ly Aron i kangpreangchi hawi Levi theaungchi ai palau.
5 Kohath nupai theung i khumi leaung 120 reichi ai Uriel my lu sa,
6 Merari nupaichi theung i khumi leaung 220 reichi ai Asaiah my lu sa,
7 Kerashon nupaichi theung i khumi leaung 130 reichi ai Joela my lu sa,
8 Elizaphan Nupaichi theung i khumi leaung 200 reichi ai Shemaiah my lu sa,
9 Hebron nupaichi theung i khumi leaung 80 reichi ai Eliel my lu sa,
10 Uziela nupaichi theung i khumi leaung 112 reichi ai Aminada my lu sa iy jeu u nai ne.
11 Davida ly pathyp pi nai keungchi napi nai Zadok hawi Abiatha, Levi theaungchi napi nai Uriel, Asaiah, Joela, Shemaiah, Eliel hawi Aminadachi ai palau iy,
12 nichi teng y, “Nangchi ly Levi theaungchi i luchi ne. Kai i sa yb nai meingtym ra y, Israela chengchi i Areng Tameuh i Leu Maikawm Pawm angjeaung hai ai nai, nangchi ly nangmychi ai py, nangchi i amjo amnau Levi theaungchi ai py, kachai aso hai u.
13 Angchei i angjeaung nai thym khala nangchi abawi u y. Naibaly kaichi ly kaimychi i Areng Tameuh ai hawihai palai chiu y nai deaungkho y, mymy ly kaichi ai kamngo pajeng nai ne,” napi.
14 Huna nai khala pathyp pi nai keungchi hawi Levi theaungchi ly Israela chengchi i Areng Tameuh i Leu Maikawm Pawm tapyn ai nai mymychi ai apachai u bo.
15 Levi theaungchi ly Mosi teng y Areng my leu pei nai kamta, Leu Maikawm Pawm ai angjeaungrachi hawi angjeaung u. Ref 15.15: Theu 25:14
16 Samrang Davida ly Tarochi, sa-rachi beu iy amo theu ai hawi nai khulymchi thui ai nai, Levi theaung bawibawichi teng y kalop pei ai, nanai nichi i luchi teng y leu pei bo.
17-21 Nichi ly kheupaja sa-ra thip ai nai, khulym sara nupaichi theung i Joela i chapo Heman hawi, ni i amjo amnau Berekhia i chapo Asap hawi, Merari nupaichi theung i Kushaia i chapo Ethan ai vawi takhra u. Nichi ai sabawm ai nai taro raawi ka-sang beu ai nai Zekhariah, Jaziela, Shemiramot, Jehiela, Unni, Eliaba, Maseija hawi Benaia napi nai Levi theaungchi ai vawi takhra u bo.
Raawi ka-nem tarochi beu ai nai Matithia, Eliphelehu, Mineia, Azazia hawi Achura yhm tamcheaung Obed Edom hawi Jehielachi ai vawi takhra u bo.
22 Khenania ly katyn kapau beu naira y kawp keh nai deaungkho y, ni ai Levi theaung theung y katyn kapau beu kawp naichi i lu ra y vawi takhra bo.
23-24 Berekhia hawi Elakana nini ai Obed Edom, Jehia nini hawi vanrei, Leu Maikawm Pawm khai nai tai katheu pa-kho typ ai nai vawi takhra u bo. Pathyp pi nai keungchi napi nai Shebania, Joshapha, Nethanela, Amasai, Zekhariah, Benaia hawi Eliezachi ai, Leu Maikawm Pawm mo y baw eng ai nai vawi takhra u.
Leu Maikawm Pawm ai Jerusalem mary mang y tapyn nai
(2 Sam 6:12-22)
25 Hunaibaly Samrang Davida hawi vanrei, Israela luchi, tavailu arengchi ly Leu Maikawm Pawm angjeaung ai nai molam, Obed Edom i yhm y chei iy, apu parai nai pawi sa u.
26 Tameuh ly Leu Maikawm Pawm angjeaung u nai Levi theaungchi ai sabawm hai ai nai, Israela chengchi ly si katai saryhrei hawi beram saryhrei apathyp u bo.
27 Samrang Davida ly khri pa-rei apu parai nai kanih mai ka-syn amthyp. Hunai kamta katyn kapau beu kawp naichi, nichi i lu Khenania hawi Pawm angjeaung nai Levi theaungchi py amthyp u nai ne. Davida ly apathyp nai ateaung py amthyp.
28 Huna nai kamta Israela cheng bawibawichi ly amo theu parai naimy aeu iy, bawchi, sa-rachi hawi tarochi beu naimy, Jerusalem mary mang y Leu Maikawm Pawm angjeaung u nai ne.
29 Pawm ai mary theung y angjeaung nai thym khala, samrang Sawla i chaniu Mikhala ly thaibeng pa-kho mang khen i, amo theu parai naimy lam nai samrang Davida ai niu nai ne. Huna nai khala ni ly samrang i tlang tleaung y kaji paso bo.