SAM 109
Patang naira avum nai khumi leaungrei i chiu sa nainoteHebrai cha lu Davida i thui nai Sam.
1 Aw Tameuh, kai ly nang ai kang palo bo; sabawm y naimy awm vui moh ba!
2 Khumi aso y naichi hawi tapawp nai khumichi ly kai ai tiu u bo;
nichi ly kai i satang ka-chawi naimy thui u nai ne.
3 Nichi ly kai ai atyhtyh naimy tiu iy,
kai i hawi y nai satangchi ai amthang hai u bo.
4 Kai ly nichi ai tamen nai sai patei naimy, nichi i vui chiu sa pi i py,
nichi ly kai ai ka-jo hau u bo.
5 Nichi ly kai i hawi sa naichi ai hawi y naira mang y,
kai i tamen naira ai niu ngai y naira mang y, vawitheung tha u lawh nai ne.
6 Kai i paleung ka-echi ai tara chih ai nai,
un cha nai tara chih keung ai, khai takhra pi kyh ba;
ni i paleung ka-e leaungrei my, ni ai seu hai ba.
7 Ni ai chih iy kamngo nai sai amteng hai sy;
ni i chiu sa nai malawn py, kamngo lawm sy!
8 Ni i heng nai ly kra y naimy tem vui iy,Ref 109.8: Amt 1.20
ni i kalop ai khumi takhra leaungrei my amtym vui sy!
9 Ni i cho chanauchi ly nuro chochi lawm u iy,
ni i aju ly lumai lawm sy!
10 Ni i chanauchi ly yhm hlau amny y nai, cheaung nai khumichi lawm u iy,
mychi awm nai yhm kaphrachira i nai, patheu pawn nai avum u sy!
11 Kalai keungchi ly ni i yhmtheaung awm nai ngiereichi ai la pi pawn iy,
cheng takhrachi ly ni i kalop sa naira i ko nai atitichi py. lo pi pawn sy.
12 Mana khala py ni ai pahen ai nai khumi,
ni i nuro chochi ai kry pi ai nai, khumi leaungrei py awm moh sy.
13 Ni i kangpreang ly myh bebe sy;
ni i amyn ly mo mang kangpreangchi teng y malawn py tamo veng sy.
14 Ni i amsi pajochi i hawi y sa nai saichi, Areng ly pany jo sy;
ni i amhm i sa nai kamngo ai py pahen pi moh.
15 Areng ly nichi i kamngochi ai pany jo sy;
na i py nichi i amyn ly khaileaung pri i nai tamo veng kalei sy!
16 Huni khumi ly mana khala py, pahen ai nai ka-dawn by y;
ni ly khumi kamawnchi, kamawn katichi hawi
jeaungmang naichi ai pahyp y naimy ana iy padei nai ne.
17 Ni ly amsawi si nai ne i, mymy ly amsawi lawi kalei sy!
Ni ly ami ai amtheaung naira pei ai nai ngai y i, ami py ni ai amtheaung hai moh sy!
18 Ni ly amsawi ai leu lam palawn i, ni i vui nina lawm bo;
ni i amsawichi ly tui kamta, ni i ngan theung y py,
asitui kamta ni i hiu theung y py, num bebe sy!
19 Huni amsawi saichi ly ateaung kamta ni ai khiu iy,
khobai kamta ly kawm thleng jojo sy!
20 Aw Areng, kai i hawi y nai satangchi ai hei nai keung,
kai i paleung ka-echi ai hina nai kamta pajeng pi kyh ba.
21 Na i py aw Areng, kai i Tameuh,
nangmy i adeu nai kamta, kai ai sabawm kyh ba;
nang i tamen nai saho y kai ai atleu kyh ba.
22 Kai ly kamawn kati cho ne;
paleung pakawi theung y no-ei naimy awm bo.
23 Kai ly dym mang i ka-khui kamta tama ai nai kasa bo;
mipo kamta ali my hm iy, akheang vui nai ne.
24 Kai ly teicha teinei avaw nai molam y, kai i kheukhuchi ly atho di bo;
kai i tlang ly hiu hawi peih awm khyh bo.
25 Khumichi ly kai ai niu nai khala y, panui hai u bo;Ref 109.25: Mt 27.39; Mk 15.29
nichi ly lu heang u naimy, tahm khai u y nai ne.
26 Aw kai i Areng Tameuh, kai ai sabawm kyh ba!
nang i khaw parai nai tamen naira molam y, kai ai atleu kyh ba!
27 Kai ai atleu nai keung ly nang ne, nanai
paleung ka-echi ai pany hai ba.
28 Nichi my kai ai pasawi u teu i py, nang ly amtheaung naira pei ai;
kai ai ana nai khumichi ly sum u na sy;
nang i miseaung kai ly amo theu sy.
29 Kai i paleung ka-echi ly tahm awm u moh sy;
nichi ly angji ngailai nai hawimy, mychi ai kanih kamta khiu na sy.
30 Kai ly tao pajeng parai naimy, Areng teng y kawn nai palo ai;
mipuichi theung y nang ai palo ai.
31 Ati mana nai mo nabaly nang ly khumi kamawnchi ai ama hai iy,
ni ai dei ai nai pa-rei pasum u nai khumichi kiu i, atleu pi nai deaungkho y ne.