31
Samrang ai tau pei nai leu
1 Hini ly samrang Lemuela ai amhm my thui pi nai parip nai leuchi ne.
2 “Nang ly kai i khrei nai chapo, kaimy chiu sa iy nga nai chapo ne. Kai ly nang ai ati kang thui ai mo?
3 Nang ly nangmy teng y awm nai atho haiho hawi, paisa tangkachi ai neampachychi hawi amo theu naira y pasum atyhtyh moh. Nichi ly samrangchi ai malawn py, phra hai vui nai ne.
4 Aw Lemuela awi, tangai ba. Samrangchi nanai ly kreip hang nei ai nai avo y. Mhm-rah ai ly paleung no ai nai avo y.
5 Nichi ly mhm-rah nei cha u nai khala, tara leu reita ai tami vui iy, khumi kamawnchi i nga ai avo naichi ai, dawndan pi y lawh nai ne.
6 Mhm-rah ly dei enten nai khumichi hawi, paleung si nai khumichi i vui ne.
7 Nichi ly mhm-rah nei u iy mychi i ngari kamtangchi hawi, paleung ka-dawn hawi y naichi ai tami u pawn na sy.
8 Mychi i vui leu katheu pajau y nai khumichi i jeng y nang ly katheu pi ba. Jeaungmang nai khumichi i nga ai avo naichi ai, amo hai ly kry pi ba.
9 Nichi i vui katheu pi iy, leu meitang y tara chih pi ba. Khumi kamawn kateuchi i, nga ai avo naichi ai amo hai ly kry pi ba.
Kabo kaja awm nai aju
10 Kaja awm nai aju ai hau iy, avum ai nai ly khri pa-rei rai parai na! Ni ly amia lengseaung tleaung y py, vang teng keh na a!
11 Ni i juvo ly ni ai ym nai deaungkho y, mana khala py kamawn acheang ai ny y.
12 Huni aju ly mymy deungrei, juvo i tlang tleaung y kahawi naini sa khyh. Mana khala py hawi y nai so vai y.
13 Ni ly beram mui ateaung hawi, kanih mai ka-synchi aneng jojo nai ne.
14 Ni ly ka-sum ka-pai sa nai samphochi kamta, kamlo i dengdairei teicha teineichi ai, yhm y vawi hai reng.
15 Ni ly khutawi y rai khala my ang thau iy, yhm dengtheungchi i vui teicha teineichi theaung pi iy, my i miseaungnuchi ai kalop pacheang pi reng.
16 Ni ly khaileaung kahawi khen hawihai iy,van bo; naibaly my i kalop sa naira i ko nai paisa tangka hawi kreip akho sa nai ne.
17 Ni ly kalop sa ham parai naimy atho sa nai khumi, no-na by y iy angjeng atyp nai khumi ne.
18 Ni ly my i sa nai vawnsaichi ai vang teng nai sai pany i, kani dym pa-rei py kalop sa nai ne.
19 Ni ly mymy naimy palo kalang kyn iy ateaungchi aneng bo.
20 Ni ly kamawn kateuchi ai leunghawi naimy pei reng.
21 Ni ly kadam tla nai neng khala, paleung mawn y leang. Ati mana nai mo nabaly mymy i yhm dengtheungchi ly bi-um nai ateaungchi awm nai deaungkho y ne.
22 Ni ly kanihchi aneng iy, ateaung kamngau ateaung reng.
23 Ni i juvo ly mary ai lu sa nai keung leaungrei ne i, amyn amthang nai khumi ne.
24 Ni ly ateaung alangchi hawi khobaichi aneng iy, ka-pai sa naichi teng y jo bo.
25 Ni ly atho py awm iy tahm py awm i, mo mang i vui mawnra by y.
26 Ni ly jypjypchy naimy cheng nai leu kahawi katheu iy, meitang naimy parip kawp nai ne.
27 Ni ly pjang nai py by y. Kalop sa nai tarawi y, my i yhm dengtheungchi i ngai naichi py, nga ai nai dawn ryhpatyh pi jojo.
28 Ni i cho chanauchi ly ni i sabawm nai molam y, ni ai amthang hai i, juvo ly ni ai palo nai ne.
29 Ni i juvo my, “Nang ly kahawi sa kawp nai aju, neampachy neangneangchi theung y, nang ly kawp keh,” nanai palo bo.
30 Paleung ka-dawn apei vui na pa-rei, apu parai naichi py tama pajau. Na i py Areng ai jei kaji naimy tahm khai nai neampachy ai ly palo ai ataing nai ne.
31 Huna nai sa nai neampachy ai tahm pasang ba. Ni ly khumi luteng my tahm khai ai ataing nai khumi ne.