29
1 Thui parip nai avaw avawrei avum i py, paleung kyhchaw asai nai khumi ly kanirei nai khala atlym ai i,ang thau ali teang pajau ai ny y.
2 Samrang kahawi my peang nai thym khala ly mipuichi ly amo theu u bo. Samrang hawi y naimy peang nai khala ly mipuichi paleung bi u nai ne.
3 Cheng naira ngai nai khumi ly mymy i ampo ai amo theu hai ai. Bimanuchi hawi amrawi nai khumi ly tangka pasum atyhtyh nai khumi ka-khum ne.
4 Adyh adawi naira ai ngai nai samrang ly mymy i pri ai sa thai naira nga hai ai. Na i py kahm tangka nga ai nai ngai khyh nai samrang ly mymy i pri phra hai ai.
5 Amy i ahawichi ai palo hawp reng nai khumi ly mymy i vui y deaung pateung nai khumi ne.
6 Khumi hawi y naichi ly mymychi i kamngo napi nai deaung y my man u reng. Na i py khumi kahawichi ly amo theu naimy khulym thui u reng nai ne.
7 Khumi kahawi ly khumi kamawnchi i nga ai avo naichi pany pi thai. Na i py khumi hawi y naichi ly huni amjychi pany thai y leang.
8 Kapahen paleung by y nai khumichi ly mary i khumichi ai khrukhra hai pajau. Khumi kachengchi ly adyh adawi hai nai ne.
9 Khumi kacheng ly khumi ka-khum ai jeung y seu nai khala, khumi ka-khum i panui hai nai hawi aeu iy josei nai avum reng.
10 Khumi ai padei nai khumi ly khumi kahawi ngiereichi ai niu ngai y nai ne. Na i py khumi kahawichi ly khumi kahawichi i hengra ai ama hai reng.
11 Cheng naira by y nai khumichi ly mychi i kado theu nai sai amteng hai reng nai ne. Na i py cheng nai khumichi ly paleung sau iy, kado katheu am-yh vui pajau nai ne,
12 Samrang ly teng y nai satang ai ym nai khumi ne lawh baly, ni i bangtangchi ly ka-chawi thui nai khumichi lawm u ai.
13 Kamawncho hawi ni ai ana nai khumi nini ly atawm nai sai harei awm. Huni ly Areng my nini leaung nyhrei ai mei kangvang pei nai ne.
14 Khumi kamawnchi i nga ai avo naichi ai, ama hai nai samrang ly deung sau ai.
15 Khyh pakhau iy thui parip nai ly cho chanauchi i vui y hawi nai ne. Deaungdi i aly parawi ala baly, huni deaungdi my amhm ai kangji pei ai.
16 Khumi hawi y naichi sa thai naira haiho awm nai neng khala, reita ai taphra nai nawi ra reng nai ne. Na i py khumi kahawichi ly huni khumichi i phra nai sai niu u ai.
17 Nang i deaungdi ai parip ba. Hunaibaly nang ly ni i molam y tahm awm, amlyh jojo pajau ai. Ni i molam y mana khala py, kangji nga ai ny y.
18 Tameuh i lam patei nai ai tangai y baly, huni pri ly phra seaungkhrang reng nai ne. Tameuh i leu pei nai ai atyp nai khumi ly khri pa-rei taham hawi na a!
19 Nang ly nangmy i miseaung ai leu hawi parip khyh nai ly ngo pajau y leang. Ni ly nang i leu ai pany thai teu i py, tahm ang khai pi ai ny y.
20 Tau cheng naira by y nai khumi ka-khum ly hawihai palai adawn pasym y naimy katheu reng nai khumi tleaung y, athang khai naira awm nai ne.
21 Nang ly nangmy i miseaung ai deaungdichy khala i dengdairei, ni i ngai nai cheaungkhangchi pei pi baly, kanirei nai khala nang i peang nai bawibawichi ly ni i kiu tleaung y tym vui ai.
22 Kado theu len nai khumi ly ka-jora tym hai reng. Hawi y naira cheaungkhang py sa nai ne.
23 Amlyh am-e parai nai khumi ly tahm by y ai. Na i py paleung apanem nai khumi ly tahm asang naira nga ai.
24 Kangviu hawi amkawm nai khumi ly kangviu sara i hawi y keh nai paleung ka-e ne. Ni ly tara jeung y leu kateng thui lawh teu baly, kangviu sara ly pajeng naira avum ai. Huna nai kamta thui y lawh baly, Tameuh my ni i tlang tleaung y amsawi lawi hai sy.
25 Amy i tlang tleaung y khumi takhrachi my ati mana dawn na mo, nanai paleung mawn nai khumi ly ka-jeira avum ai. Na i py Areng teng y abyh nai khumi ly chymme ai.
26 Khumi luteng ly samrang teng i meimai nga ai nai ngai. Na i py leu meitang adyh adawi naira ly Tameuh teng i naini nga pajau khyh nai ne.
27 Khumi kahawi ly khumi hawi y nai ai niu ngai y. Naibaly khumi hawi y naimy py, khumi kahawi ai niu ngai y teang nai ne.