10
Samrang Solomon i leu kachengchi
1 Samrang Solomon i leu kachengchi ly anui mang ichi ne.
Cheng nai chapo ly ampo i amlyh ai naira ne. Chapo ka-khum ly amhm i vui paleung bi naira ne.
2 Li-tapawp iy nga nai yhmtheaung katuichi ly nang i vui kamran by y. Na i py neaung hawi naira my ly nang i hengra atleu pajau.
3 Areng ly khumi kahawichi ai kajeu kanglam khai ai ny y. Na i py khumi hawi y naichi i aly ngai naichi ai ly paka vui ai.
4 Khumi napjang ly kamawn acheang ai. Na i py angjeng nai khumi ly nang chawn ai.
5 Thengthai khulawnchi pakym achu nai neng khala, pakym achu nai khumi ly tau cheng nai khumi ne. Choh tyn nai neng khala, i nai khumi ly kaji ai hawi nai khumi ne.
6 Khumi kahawi ly amtheaung nairachi nga ai. Khumi hawi y nai i leu ly my i pahyp y nai paleung ai tamym reng nai ne.
7 Khumi kahawichi ai pany jo nai ly amtheaung naira harei ne; na i py khumi hawi y naichi ai ly kra y naimy tami veng ryp ai.
8 Tau kacheng awm nai khumichi ly tau kahawichi ngai u reng; ka-khum leu katheu reng nai khumichi ly phra u ai.
9 Neaung hawi nai khumichi ly chymme naimy awm ai nai nga u reng nai ne. Na i py neaung hawi y nai khumichi ly mychi i hawi y nai sai amteng ai.
10 Ami py ne sy, leu kateng katheu vai y nai khumi ly patang naira tym hai nai khumi ne. Na i py paleung y khai y naimy katheu nai khumi ly tlamsa naira sa pi nai khumi ne.
11 Khumi kahawi i leuchi ly hengra tuino hawi atawm; na i py khumi hawi y nai i leuchi ly khrukhra hai reng nai paleung ka-dawn ai taphum reng nai ne.
12 Niu ngai y nai sai ly ka-jo ka-thui kachyh nai ne; na i py tamen naira ly sa tamang naira bawibawichi ai pahen nai ne.Ref 10.12: Jakob 5.20; 1 Pet 4.8
13 Tau cheng nai khumichi ly vang teng nai leuchi katheu reng; na i py khumi hawi y naichi ly pajeng naira avum ai ataing nai khumichi ne.
14 Khumi kachengchi ly nga thai nai ryrei, cheng naira hau u reng; na i py khumi hawi y naichi i katheu nai ly patang naira avum ai nai kasa nai ne.
15 Yhmtheaung katuichi ly khumi kanangchi ai ama hai reng; kamawn nai sai ly khumi kamawn kateuchi ai, phra hai reng nai ne.
16 Kahawi sa reng nai khumi i kawn vang ly hengra ne. Na i py kamngo sa nai khumi i vui ly kamngo sa tleaung sa-ra reng nai ne.
17 Thui parip nai ai tangai nai khumi ly heng ai; na i py amymychi i katamang lai ahui y nai khumichi ly ka-jeira avum ai.
18 Amy i niu ngai y nai paleung apha vui nai khumi ly ka-chawi thui nai khumi ne. Thui preaung reng nai khumi ly khumi ka-khum ne.
19 Leu katheu nai nawi baly, tamang nai py nawi reng. Tau cheng nai khumi ly awm pypy nai ne.
20 Khumi kahawi i leuchi ly tangka tangcheng hawi atawm; khumi hawi y nai i ka-dawn ly vang teng y.
21 Khumi kahawi i leu ly khumi neangneangchi ai hawi hai ai. Na i py khumi hawi y nai ly amymy ai dei ai nai pa-rei tym hai pajau.
22 Areng i amtheaung hai nai saho y, nang ly nang chawn nai ne. Nang i angjeng atyp naimy ly huni tleaung y nang hai pajau y leang.
23 Khumi ka-khum ly kamngo sa naira y amo theu reng; tau cheng nai khumi ly cheng naira y paleung ano reng.
24 Khumi kahawichi ly mymychi i ngai naichi nga angym reng; nai py khumi hawi y naichi ly khri pa-rei ka-jeirachi avum u ai.
25 Ali kamchai theu nai khala, khumi hawi y naichi ly kamlora y, ahei pawn reng nai ne. Na i py neaung hawi nai khumichi ly chymme naira nga u jo ai.
26 Khumi napjang ai ly ati sai py kalop pataw moh; ni ly ho kyn hai reng nai thaitho hang kamta, mei pachau hai reng nai maikhyh kamta py, nang ai rai naira avum hai ai.
27 Areng ai tahm khai; naibaly nang ly heng sau ai. Khumi hawi y naichi ly mymychi i neng tym y naimy dei u ai.
28 Khumi kahawichi ly amo theu naira athang khai pajau; na i py khumi hawi y naichi ly ati sai py athang khai u pajau y.
29 Areng ly neaung hawi nai khumichi ai ama hai nai ne; na i py hawi y sa nai khumichi ai ly tama hai reng.
30 Khumi meitangchi ly chymme naira nga u jojo ai; na i py khumi hawi y naichi ly khaileaung pri y awm jo ai nai ngo y ai.
31 Khumi kahawichi ly cheng nai leuchi katheu u reng; na i py hawi y nai leu katheu reng nai labeaung ai ly tamym vui ai.
32 Khumi meitangchi ly kapahenra kawi angym nai leuchi katheu u reng; na i py khumi hawi y naichi ly no hai au nai leuchi katheu u reng nai ne.