LEU KACHENG
Leu Kacheng cha-iu ly khumichi i amhi amtlau nai leaungsai hawi, reita leaungsai patiu naichi ai kachu iy, thui achi nai leuchi hawi, leu kachengchi pangym achu nai cha-iu ne. Hini theung y nawi keh nai ly kani tleirei avum nai saichi hawi amtawn abi naichi ne. “Areng ai jei kaji naimy tahm khai nai ka-dawn ly cheng naira i pakeung sangum ne” (1:7), nanai leu patiu amteaung bo. Hini bo y reita leaungsai patiu nai khyh chang y i, amy i tau kacheng hawi py leu patiu nai ne. Tau cheng naira ka-dawn awm nai khumi ly mymy i avum nai rai naira ai ati mana pachai pajau mo, nanai sai molam y, hawi angym nai leu kachengra y thui pi bo. Hunichi ai khen baly jangni y Israela khumi kacheng i dawn patyp nai sai thiu parai nai pany pajau. Naibaly phyrei leu kachengchi ly yhm dengtheung amkawm nai sai hawi amtawn i, phyrei ly ka-sum ka-pai sa nai hawi abi; phyrei ly khumi tengtawi amkawm nai hawi amtawn; phyrei ly amymy ai amkyn hai nai ne. Tahm apanem nai, kham tanga nai, ngari kamtangchi ai pahen nai hawi, ahawichi tlang tleaung y ka-ym awm nai, nanai hawi nai ka-dawnchi ai patiu pi patyp nai ne.
1
Vang teng parai nai Leu Kachengchi
1 Samrang Davida i chapo, Israela samrang Solomon i leu kachengchi ne.Ref 1.1: 1 Areng 4.32
2 Hini leu kachengchi ly nang ai cheng naira hawi tau kahawichi nga hai iy, thiu parai nai leuchi pany praw thai ai nai ang sabawm ai mang.
3 Hini leu kachengchi my nang ai pany thai naira hawi, amhi amtlau thai ai nai py, leu meitang teaung iy adyh adawi naira awm ai nai py patiu pi pajau.
4 Hunichi ly pany nai sai angym y nai khumi ai dawn pany thai naira pei nai ne. Deaungdichi ai py tau cheng naira hawi leu meitang nga hai pajau.
5 Hini leu kachengchi ly khumi kachengchi ai, cheng tleaung cheng haira ai.
6 Prengja kawp nai khumichi ai py thiu parai nai leu maitawmchi awm nai sai thui pachai nai hawi, khumi kachengchi i pany hai nai rai nairachi ai py, pany pajau ai nai sabawm pi pajau nai ne.
Thawndeang deaungdichi i vui tau pei nai
7 Areng ai jei kaji naimy tahm khai nai ka-dawn ly tau cheng naira i pakeung sangum ne. Khumi hawi y naichi ly cheng naira ai tahm khai u y; amtiu ai nai py ngai u y.Ref 1.7: Job 28.28; Sam 111.10; Leu kacheng 9.10
8 Deang awi, nang i ngamhm ngampo my thui nai leu ai dawn ryhpatyh naimy tangai ba.
9 Apu parai nai lupeu hawi kaneaung akhen ly nang i mo-cha ai khen apu hai nai kamta, nang i ngamhm ngampo my ang thui ang parip naichi py, nang i kaja hawi tleaung y hawira ai.
10 Deang awi, kamngo sa naichi ly nang ai parawi nai khala, paleung apei moh.
11 Nichi ly “Jeu ly achi khumi padei ai nai hau u sina! kamngo by y nai khumichi teng i, atyhtyh naimy lawm u sina!
12 Vai, nichi ly no-na by y naimy heng u teu i py, nichi ai achi my padei vui nai khala ly tavau saleaung y tym u ai!
13 Achi ly vang kateng yhmtheaung katui amjy cheaungkhangchi nga u ai; achi i yhm theung y lawmra i nga nai vawnsaichi hawi kawi hai u sina!
14 Nang ly jeu iy, kaichi theung y abawi ba; kaichi my nga nai vawnsaichi kangngeng riri phy pi ai,” napi.
15 Deang awi, nang ly huna nai khumichi hawi vanrei abang moh; nichi i tako nai lam ly en vui.
16 Nichi ly hawi y nairachi sa ai nai panga y; nichi ly khumi padei ai nai avawrei angvei u rym nai ne.
17 Nang i patiu ai ngai nai tavo i mei ka-niu y deaung pateung pi nai ly atyhtyh teu.
18 Na i py nichi ly mychi i deaung y my man iy, dei u ai.
19 Atiu alawm nai ly atiu alawm nai khumi ai dei hai jojo reng. Hini ly hawi y sa naira y heng nai khumichi i avum reng nai khym taham ne.
Cheng naira my palau nai raawi
20 Tangai cham! cheng naira my ly lamchira py, seng meingtymchira py palau nai ne.Ref 1.20-21: Leu kacheng 8.1-3
21 Ni ly mary apai pa-khochira py, khumi akachu nai meingtymchi ra py, tao pajeng parai naimy palau nai ly
22 “Khumi ka-khumchi awi!, nangchi ly mana tanrei akhum naimy awm ai nai ngai u nai mo? Nangchi ly cheng naira ai mana tanrei mei aniu y nai sa iy, amo theu u ai mo? Nangchi ly mana khala py, ka-dawn pany u vau nai by y na mo?
23 Kaimy nangchi ai kang parip nai khala, tangai u; kai ly nangchi ai tau kahawi kang pei iy, kai i cheng naira py kang paji pi ai.
24 Kai ly nangchi ai aeu naimy kang palau teu i py, nangchi ly tangai ai nai ngai u y; kai i leu py tahm pateng u y bo.
25 Nangchi ly kai i tau kang pei nai bawibawichi py dawndan y i, kai i kang parip naichi py, nangchi ly ngai u y lawh.
26 Hunai deaungkho y nangchi ka-jeira avum nai khala, kai ly panui ai; nangchi jei hyn naira avum nai khala patang u ai i,
27 nangchi paleung ka-dawn phra u nai khala, kang panui hai ai.
28 Huna nai khala nangchi ly kai ai palau u ai. Na i py kai ly kang pathang pi ai ny y. Nangchi ly kai ai meingtym tleirei y, hau teu i py niu ai ny y.
29 Nangchi ly tau cheng naira ai mana khala py, ngai nai paleung by y; Areng i leu ai mana khala py tangai u vai y.
30 Nangchi ly kai i tau pei nai ai mana khala py aly ngai u y; kai i parip nai py tahm khai u y.
31 Hunai deaungkho y nangchi ly nangmychi i hawi y sa nai lai amtym u ai; nangchi i sa nai leaungsaichi my, nangchi ai no hai au ai.
32 Pany nai sai angym y nai khumichi ly cheng naira ai khai u su nai deaungkho y dei u ai. Khumi hawi y naichi ly ati sai py dawndan y naimy heng u rumrang nai y tama u nai ne.
33 Na i py kai i leu tangai nai khumi ly chymme naimy awm ai nai nga ai. Ni ly jei hyn naira by y naimy, tlamsa nai awm ai,” nanai ne.