7
Israela luchi i katalamrachi
1 Mosi ly Tabynako sa pajau nai kani y, Tabynako i vui ateaung alangchi ai py, maicham i vui ateaung alangchi ai py, tahm palyn nai asitui leih iy Areng teng y talam bo.
2 Naibaly amyn la naira y lu sa nai Israela cheng theaung i nupai miteaung kehchi ly
3 Areng teng y katalamrachi syn u bo; Lu sa nai leaungrei y si katai ha harei hawi, lu sa nai leaung nyhrei nai y ka-ri ha harei, bawibawi ka-ri tariurei hawi si katai holai nyhrei syn u iy Areng teng y talam u bo. Nichi talam u chum baly,
4 Areng my Mosi teng y,
5 “Nang ly Tabynako i vui kalop sa ai nai hini katalamra vawnsaichi talam pi ba; Levi theaungchi sa ai nai kalop ka-thui ka-thui nyp iy nichi teng y pei pi,” napi.
6 Hunaibaly Mosi ly ka-richi hawi si kataichi ai Levi theaungchi teng y au pi bo.
7 Mosi my karashon nupaichi teng y ka-ri nyhrei hawi si katai palyhrei pei pi,
8 Merari nupaichi teng y ka-ri palyhrei hawi si katai tajarei pei pi nai ne. Nichi bawibawi ly sa ai awm nai kalop ngireichi ai Aron i chapo Ithama my pacheang nai kamta sa u bo.
9 Na i py Mosi my ka-richi hawi si kataichi kohath nupaichi teng y pei pi y leang; ati mana nai mo na baly nichi ly mymychi kry nai Tabynako i ateaungchi ai angjeaung ai tla nai deaungkho y ne.
10 Israela lu sa naichi ly maicham khai takhra naira y py, katalamrachi syn u nai ne. Nichi ly maichamra y talam nai vawnsaichi talam ai nai angveirym nai khala,
11 Areng my Mosi teng y, “Maicham ai khai takhra nai i vui y lu sa nai leaung holai nyhreichi ly leaungrei y kani kanirei amymychi i katalamra vawnchi talam hai ai nai tla,” napi.
12-83 Hunaibaly nichi ly mychi i katalamrachi ai hina nai kamta ka-thui ka-thui talam u nai ne.
Nichi leaung leaungrei i talam nai kapathyprachi ly atawm riri nai ne. Hunichi ly prichi priteaung kaji neh nai y, sie pangrei awm nai tangka khau harei hawi, sie thomrei tahm kaji awm nai tangka rahum harei, (teicha teinei katalam nai i vui y asitui katlen nai tako dei ly huni nyhreira y kawityh nai ne.) Rimui mui katui sie nyhrei ai phy palyhrei y phyrei kaji awm nai muku samtang harei, leng patlum nai kapathypra i vui y si katai beaungjeaung harei, beram katai harei hawi sanengrei awm khyh nai beram cho harei, kamngo pahen nai kapathypra i nai vui y mi-i harei, leunghawi katalamra i vui y si katai nyhrei, beram katai pangrei, mi-i pangrei hawi sanengrei awm khyh nai beram cho pangreichi ne.
84-88 Maicham khai takhra naira y Israela lu sa nai leaung holai nyhreichi my syn nai katalamra vawnsaichi ly hinichi ne.
- Kaji bawibawi sie vui tariu saryh tajarei awm nai tangka khau holai nyhrei hawi tangka rahum holai nyhrei
- Rimui mui katui kawityh nai kaji bawibawi sie palyhrei awm nai muku samtang holai nyhrei
- Leng patlum nai kapathypra i vui y si katai holai nyhrei, beram katai holai nyhrei, sanengrei awm khyh nai beram cho holai nyhrei hawi, hunichi i vui teicha teinei katalamrachi
- Kamngo pahen nai kapathypra i vui y mi-i holai nyhrei
- Leunghawi katalamra i vui y si katai apom phai palyhrei, beram katai vui tariurei, mi-i vui tariurei, sanengrei awm khyh nai beram cho vui tariureichi ne.
89 Mosi ly Areng teng y hnei takeng ai nai Tabynako theung y kun nai khala, Leu Maikawm Pawm khym salo i kheruben myn nyhrei mang y Areng my leu pei nai raawi thai bo.