23
1 Balam my Balek teng y, “Hini meingtym y kai i vui maicham saryhrei so pi ly si katai saryhrei hawi beram katai saryhrei py jeu hai,” napi.
2 Balek ly Balam i thui pi nai kamta sa i, nini ly maicham ha harei tleaung y si katai ha harei hawi beram katai ha harei talam bo.
3 Naibaly Balam my Balek teng y, “Nang ly leng patlum nai maicham sahawi y angdo; Areng ly kai hawi ka-vum sa ai nai jeu ai mo, jeu y ai mo, nanai khen ai. Areng my kai teng y leu pei nai ngierei , nang teng y kang thui pi ai mang,” napi. Naibaly ni ly mymy tlairei mawi saleung y lyn kalau jo bo;
4 Naibaly Tameuh ly ni hawi ka-vum sa ai nai satla kathiu bo. Huna nai khala y Balam my Areng teng y, “Kai ly maicham saryhrei sa iy maicham tleireira y si katai ha harei hawi beram katai ha harei py talam bo,” napi.
5 Areng my Balam teng y, Balek ai thui pi ai nai leu saichi thui pi iy pato ali teang bo.
6 Hunaibaly Balam ly samrang Balek teng y ali teang nai khala, samrang ly Moba chengchi i lu sa nai keungchi hawi vanrei, maicham sahawi y angdo nai niu.
7 Naibaly Balam ly hina nai kamta amo leu thui pi nai ne:
“Moba pri samrang Balek my
Suria pri nisi mang i mawi aheungchi dengdairei kai ai ang palau bo.
Samrang my, ‘jeu ly Jakob i kangpreangchi ai pasawi ba,’
‘jeu ly Israela chengchi ai thui tamawn ba,’ ang napi.
8 Tameuh my pasawi y nai khumichi ai, kai ly mana pasawi ai mo?
Areng my Tara chih y nai khumichi ai kai ly mana Tara chih ai mo?
9 Kai ly lengseaung puichi saleung mang nichi ai kaniu;
kai ly mawi aheungchi mang nichi ai kaniu.
Nichi ly mychi tlairei awm nai cheng vuijyn harei ne;
Nichi ly khumi cheng bawibawichi tleaung y amtleh takhra nai khumichi ne.
Takhra khumichi tleaung y malawn py amtheaungra nga keh naichi ne, nanai nichi apany u.
10 Israela kangpreangchi ly nawi parai nai deaungkho y,
spryh ai kati pajau y nai kamta ly nichi ai kati pajau y.
Tameuh i khumi leaungrei kamta deung tlum ai nai kangai.
Khumi kahawichi kamta tlamsa naimy dei ai nai kangai,” napi.
11 Naibaly samrang Balek my Balam teng y, “Nang ly kai ai mana sa vui lawh mo? Kai i paleung ka-echi ai pasawi ai nai kang palau nai ne i py, nang ly nichi ai amtheaung hai lawh ly” napi.
12 Balam my, “Kai ly Areng my thui hai ai ngai nai kamta naini thui thai khyh,” napi.
Balam i pa-nyh amo leu
13 Naibaly Balek my Balam teng y, “Israela cheng phyreichi ai naini niu thai nai meingtym mang y kai hawi abang hai; hu mang dengdairei nichi ai pasawi pi,” napi.
14 Hunaibaly samrang Balek ly Balam ai Piska mawi salo i Zophim adym mang y chei hai bo. Huni meingtym y py ni ly maicham saryhrei sa iy maicham tleirei y si katai ha harei, beram katai ha harei talam nai ne.
15 Balam my samrang Balek teng y, “Nang ly leng patlum nai kapathypra sahawi y angdo; kai ly Tameuh hawi ka-vum sa ai nai chei ai,” napi.
16 Areng my Balek teng y amti pi ai nai leu thui pi chum baly, Balam ai Balek teng y pato ali teang bo.
17 Naibaly Balam ly samrang Balek teng y vawi ali teang nai khala, samrang ly Moba cheng lu sa nai keungchi hawi vanrei, leng patlum nai kapathypra sahawi y angdo jo rai nai niu. Balek ly Areng my ati mana leu pei mo, nanai deng.
18 Naibaly Balam ly hina nai kamta amo leu thui pi:
“Zipor i chapo Balek awi,
kai teng y jeu ly kaimy kang thui pi ai nai leu tangai ba.
19 Tameuh ly khumi kamta ka-chawi leu thui y leang;
mymy ly khumi kamta paleung ali vui y leang.
Mymy ly leu adeu nai kamta sa khyp;
mymy i leu pei nai kamta py ne khyp.
20 Amtheaung hai ai nai kai ai leu ang pei;
Tameuh my pei nai amtheaungra ai ly paka vui thai y leang.
21 Israela chengchi ly vai mo mang y py patang naira,
taham si nairachi avum ai nai kai niu y.
Nichi i Areng Tameuh ly nichi hawi vanrei awm;
Areng ly nichi i samrang ne, nanai amthang hai bo.
22 Tameuh ly nichi ai Aikupta pri i dengdairei pahawi nai ne;
nichi ly salen katai kamta atho ham.
23 Atam kakawpchi, uimiu khawn kawp naichi i kasabawmra hawi
Israela chengchi ai ami py tiu pajau y leang.
Tameuh my Israela chengchi tlang tleaung y sa pi nai sai ly
lyh ai hawi parai!,’’ nanai thui achi nai awm ai.
24 Israela pri ly atho ham nai khrangsi hawi atawm;
mawi kei y, thi pajawp y baly
khrangsi ly awm py ai ny y,” napi.
25 Naibaly samrang Balek my Balam teng y, “Nang ly Israela chengchi ai pasawi moh, na i py nichi ai amtheaung hai moh!” napi.
26 Balam my, “Kai ly Areng i leu pei nai kamta sa ai nai tla khyh, nanai nang teng y kang thui pi y nai sai a?” napi.
Balam i pa-thom amo leu
27 Naibaly Samrang Balek my Balam teng y, “Meingtym takhra mang y abang rai; nang ai huni mang dengdairei nichi ai pasawi ai nai, Tameuh my aly ngai tan ngai lym ai,” napi.
28 Hunaibaly ni ly Balam ai daichi ka-vym ai niu pajau nai Peor mawi saleung y hawi bo.
29 Balam my samrang teng y, “Hini meingtym y kai i vui maicham saryhrei so pi ly si katai saryhrei hawi beram katai saryhrei py syn pi,” napi.
30 Samrang Balek ly Balam i sa hai nai kamta sa iy maicham tleirei y si katai ha harei hawi beram katai ha harei py talam nai ne.