11
Jerusalem mary y awm nai khumichi
1 Lu sa naichi ly Jerusalem mary y awm u; takhra khumichi ly yhm dengtheung horei y deaung deaungrei, Jerusalem mary kachaira y hawi, huni bo i khumichi ly takhra mary katheang kalenchira y py, awm hai ai nai tambe va u bo.
2 Jerusalem mary y mymychi alyly naimy awm nai khumichi ai khumi mipuichi my lyh u nai ne.
3 Takhra mary katheang kalenchira y ly Israela chengchi, pathyp pi nai keungchi, Levi theaungchi, Achura yhm y kalop sa naichi, Solomon i miseaung kangpreangchi ly mymychi sa nai yhmchira y awm u nai ne.Ref 11.3: Neh 7:73
Naibaly Jerusalem mary y awm nai Juda pri khu ka-peang miteaung kehchi i amynchi thui pi ai:
4 Juda cheng theaungchi:
Zekhariah i katu, Uziah i chapo Athaiah. Ni i kangpreangchi theung y Juda i chapo Perez i kangpreang Amariah, Shephatiah hawi Mahalalelchi ne.
5 Kolahozeh i katu, Baru i chapo Maaseiah ne; ni i takhra amsi pajochi theung y Shela i chapo Juda i kangpreang Hazaia, Adaiah, Jojari hawi Zekhariahchi ne.
6 Perez i kangpreangchi theung i sorai risa 468 reichi ly Jerusalem mary y awm u bo.
7 Benjamin theaungchi:
Joeda i katu, Meshulam i chapo Sallu. Ni i takhra amsi pajochi theung y Pedaiah, Kolaiah, Maaseiah, Ithiela hawi Jesaiachi abawi.
8 Sallu i amjo amnau kypkypchi ly Kabai hawi Sallai ne.
Benjamin theaung 928 reichi ly Jerusalem mary y awm u.
9 Zikhri i chapo Joela ly nichi i lu ne i, Hasenua i chapo Juda ly pa-nyh lu ne.
10 Pathyp pi nai keungchi:
Jojari i chapo Jedaiah hawi Jakhin ne.
11 Meshulam i katu, Hilkia i chapo Seraiah. Ni i amsi pajochi theung y Zadok, Meraitho hawi pathyp pi nai keung kalen keh Ahitubchi abawi nai ne.
12 Hini nupai theung i khumi 822 reichi ly Achura yhm y kalop sa u.
Pelaliah i katu, Jeroham i chapo Adaiah. Ni i amsi pajochi theung y Amazi, Zekhariah, Pashura hawi Malakhijahchi abawi nai ne.
13 Hini nupai theung i khumi 242reichi ly yhm dengtheungchira y lu sa naichi ne.
Ahazi i katu, Azarela i chapo Amasai. Ni i amsi pajochi theung y Meshelemo hawi Immera nini abawi.
14 Hini nupaichi theung y atiu kawp keh nai sorai risa 128 rei awm. Nichi i lu ly yhm dengtheungchira y lu sa nai Zabadiel ne.note 11:14 yhm dengtheungra y lu sa nai Zabadiel; ti y baly Hakadolim i chapo ne.
15 Levi theaungchi:
Azarikam i katu, Hashu i chapo Shemaiah. Ni i amsi pajochi theung y Hashabiah hawi Bunni nini abawi.
16 Achura yhm angam mang y kalop pacheang nai keung Levi theaung miteaung kehchi ly Shabethai hawi Jozaba nini ne.
17 Zabdi i katu, Mika i chapo Mattniah, ni ly Asap i kangpreang ne. Ni ly kawn nai leu thui nai chiu sa achu khala khulym thui nai, Achura yhm khulym kamkawm ai lu sa nai keung ne.
Mattniah i bangtang ly Bakabukiah ne.
Kalala i katu, Shammua i chapo Abda, ni ly Jeduthun i kangpreang ne.
18 Levi theaung 284reichi ly Jerusalem mary kachai theung y awm u nai ne.
19 Achura yhm tamcheaung typ nai risachi:
Akkub, Talamon hawi ni i amjo amnau bawibawi ly 172 rei awm nai ne.
20 Huni bo i Israela chengchi, pathyp pi nai keungchi hawi Levi theaungchi ly takhra Juda mary katheang kalenchi theung i, mymychi amtym nai khaileaung meingtymchira y awm u.
21 Achura yhm y kalop sa nai khumichi ly Jerusalem mary Ophel, napi nai meingtym y awm iy, Ziha hawi Kisapa nini i lu sa nai anui y awm.
22 Jerusalem mary y awm nai Levi theaungchi ai lu sa nai keung ly Hashabiah i katu, Bani i chapo Uzi ne. Ni i amsi pajochi theung y Mattniah hawi Mika nini abawi. Ni ly Achura yhm y chiu sa nai khala, katyn kapau beu kawp naichi i lu Asap i nupai kangpreang ne.
23 Huni nupai kangpreangchi ly Achura yhm theung y katyn kapau beu ai nai kani tleirei ami my lu sa ai mo, nanai pany hai ai nai samrang my pacheang yb nai awm.
24 Juda theaung Zarah nupai Meshezabela i chapo Pethahiah ly Israela chengchi i vui molam y Pasia samrang teng y kalop sa pi nai ne.
Takhra mary katheang kalenchira y awm nai khumichi
25 Khumi neangneangchi ly mymychi li hlau sahawi i marychira y awm u bo. Juda theaungchi ly Kiria Araba mary, Dibon mary hawi Jekazela marychira y py, huni mary sahawi i avangchira py awm u.
26 Nichi ly Jeshua, Molada, Bethpelet,
27 Hazashuala, Berasheba mary hawi huni marychi sahawi i avangchira y py awm u nai ne.
28 Nichi ly Zikala mary, Mekona mary hawi huni mary sahawi i avangchira y py,
29 Enrimmon mary, Zorah mary, Jamuth mary,
30 Zanoah mary, Adulam mary hawi huni marychi sahawi i avangchira y py, Lakhisa mary hawi huni sahawi i li hlauchi, Azeka mary hawi huni sahawi i avangchira py awm u bo. Sangum y thui ai na baly Juda pri i khumichi ly tokalawi mang i Baraseba mary hawi, tosyh mang i Hinnom leaunghawi sala i khu ka-peang theung y awm u nai ne.
31 Benjamin theaungchi ly Keba mary, A-i mary, Bethela mary hawi huni sahawi i avangchira y py,
32 Anatho mary, Noba mary, Ananiah mary,
33 Hazo mary, Ramah mary, Kittai mary,
34 Hadi mary, Zeboim mary, Nebalat mary,
35 Loda mary, Ono mary hawi kupe kakawp leaunghawira py awm u.
36 Juda khu ka-peang theung y awm u nai Levi theaung phyreichi ly Benjamin theaungchi hawi vanrei awm u nai ne.