4
Isu ai parawi nai
(Mk 1:12-13; Lk 4:1-13)
1 Hunai pajau khala y Phailo ly Isu ai diabola my prawi ai nai daichi ka-vym y pahawi bo.Ref 4:1: Heb 2:18, 4:15
2 Naibaly mymy ly kani y kani vui palyhrei, vum y vum vui palyhrei biu hai nai bo y kajeu alam bo.
3 Naibaly parawi nai keung ly tym i mymy teng y, “Nang ly Tameuh i Chapo ne nabaly hini lengseaung ly tako lawn ai nai leu pei bei,” napi.
4 Na i py mymy ly,Ref 4:4: Leu 8:3
“Khumi ly tako harei khyh naira y ly heng y leang,
Tameuh i labeaung y theu nai leu cheaungkhang y heng ai khyh,”
nanai tajiu nai awm,” nanai pathang.
5 Huni pajau khala y diabola ly mymy ai avang kachai y hawi i,
achura yhm kalen pui saleung kamsui y angdo hai i, mymy teng y,
6 “Nang ly Tameuh i Chapo ne nabaly tabo kathiu;
‘Nang i molam y mymy i kani pri i amtaw thau naichi ai leu ang pei ai i,
Nichi i kiu my nang ai ang dawmkhawn ai,
Ti y baly nang i kheu ly lengseaung y thip lawh na,’ nanai tajiu nai awm lawh,” napi.Ref 4:6: Sam 91:11-12
7 Isu my mymy teng y,Ref 4:7: Leu 6:16
“Nang i Areng Tameuh ai ly cham moh, nanai tajiu nai awm teang,” napi.
8 Naibaly diabola my ly mymy ai mawi asang parai naira y hawi bi iy, khaileaung pri peang naira bawibawi hawi, hunichi i nang naira py patei;
9 naibaly mymy ly ni teng y, “Nang ly ambeu iy kai ai chiu baly hini bawibawi ly kang pei bebe ai,” napi.
10 Hunaibaly Isu my mymy teng y, “Setan, tako la! ‘Nang i Areng Tameuh ai phai chiu ly, mymy i kalop harei phai so khyh,’ nanai tajiu nai awm,” napi.Ref 4:10 Leu 6:13
11 Huni bo y ly diabola ly mymy ai khai su bo. Naibaly khen cham, kani pri i amtaw thau naichi ly jeu u iy Isu ai kry u bo.
Isu Kalili pri y kalop sa amteaung nai
(Mk 1:14-15; Lk 4:14-15)
12 Naibaly Johan ai patiu bo, nanai Isu ly pany baly Kalili pri y chei vui bo;Ref 4:12: Mt 14:3; Mk 6:17; Lk 3:19-20
13 naibaly Nazaret avang khai su i ang peang y awm nai Kapernaum avang y awm jo; huni ly Zebulon hawi Nephthalim tengtang ne;Ref 4:13: Jh 2:12
14 amo Isaia my,
15 “Jordan vai pangli mang y awm naiRef 4:15-16: Is 9:1-2
Zebulon pri hawi Nephthalim pri py,
Cheng Takhrachi i Kalili pri py,
16 kaveng y ateh naichi ly khri pa-rei kangvang niu u i,
Deira meingtym hawi ka-khui y ateh naichi i tlang
tleaung y kangvang theu bo,” nanai thui nai ly tym thai ai nai sa nai ne.
17 Isu ly huni kha i dengdairei, “Uikhei u! Kani pri my peang nai ly kasa bo,” nanai thui pi amteaung bo.Ref 4:17: Mt 3:2
Isu my ngo sara leaung palyhreichi ai palau nai
(Mk 1:16-20; Lk 5:1-11)
18 Naibaly mymy ly Kalili ang peang y pavai nai tarawi y amjo amnau leaung nyhrei, Simon(Petera napi nai) nini amjo amnau Andria hawi ang y paleu heng nai niu; nini ly ngo sara ne.
19 Naibaly mymy ly nini teng y, “Kai teng y abang hawi, hunabaly khumi patiu nai sara y kang palawn ai,” napi.
20 Naibaly nini ly paleu khai hawi su iy mymy teng y abang hawi praw ryp.
21 Naibaly mymy ly hu i nai tako veangveang iy, amjo amnau takhra leaung nyhrei, Zebedai i chapo Jakob hawi ni i amnau Johan ai ly ampo Zebedai teng y paleaung y paleupy pathyp nai niu; naibaly mymy ly nini ai py palau.
22 Naibaly nini ly paleaung py ampo ai py khai hawi su iy mymy teng y abang hawi praw ryp teang.
Leu patiu nai hawi no naichi ai hawi sa nai
(Lk 6:17-19)
23 Naibaly Isu ly Judachi i achura yhm takhra takhra y leu patiu i Tameuh i peang nai Satang Kahawi thui pi iy, khumichi theung y no nai cheaungkhang man nai hawi, ham y naira cheaungkhang hawi sa pi nai Kalili pri bawibawi amki prei bo.Ref 4:23: Mt 9:35; Mk 1:39
24 Naibaly mymy i satang ly Suri pri bawibawi y amthang bo; hunaibaly no naichi bawibawi, ham y naichi, cheaungkhang patang naichi, vawinam my nam naichi, kamthuchi, kamkhyn no naichi ai py mymy teng y hawi i, hawi sa pi bo.
25 Naibaly Kalili pri i dengdairei hawi, Dekapoli meingtym avang i dengdairei hawi, Jerusalem avang i dengdairei hawi, Judai pri i dengdairei hawi, Jordan vai mang i nai py khumi mipui ka-teng ny y nai mymy ai hui u bo.