18
Ami len keh mo?
(Mk 9:33-37; Lk 9:46-48)
1 Hunai thym khala y ly abangnaichi ly Isu teng y chei u iy, “Kani pri y len keh nai ly ami mo?” napi.Ref 18.1: Lk 22.24
2 Naibaly mymy ly deaungdichy leaungrei ai palau i, nichi theung y angdo hai iy,
3 “Meitang khyp kang thui pi, nangchi ly adawn ali teang iy deaungdi chychi kamta lawn y baly kani pri y kun u ai nai ly aveng.Ref 18.3: Mk 10.15; Lk 18.17
4 Hunaibaly ami py hini deaungdichy kamta tahm apanem nai ngierei ly huni kypkyp ly kani pri y len keh nai ne.
5 “Naibaly ami py kai i amyn deaungkho y hini deaungdichy kamta leaungrei ai kawn nai ngierei ly kaimy ai kawn nai ne.
Kamngo parawi nairachi
(Mk 9:41-48; Lk 17:1-2)
6 Na i py ami py hini kai ai ym nai keung theangchi chy naichi theung y leaungrei ai py atlym hai nai ngierei ai ly, mymy i kaneaung y choh nip naira lengseaung kalen pui awi hai iy, pangli tui kathiura y pala i khyly mymy i vui hawi keh alam ai.
7 “Atlym hai nairachi deaungkho y khaileaung pri ly taham si! Atlym hai naira awm ai nai angchi yb nai teu, na i py atlym hai naira tym hai nai keung ly taham si!
8 Naibaly nang i kiu my mo, nang i kheu my mo nang ai atlym hai baly tameang ly, aphi la: kiu kheu angym naimy deungtasarei mai y aphi nai tleaung y kiu angym y nai mo, kheu tabai nai mo heng naira y kun ai nai nang i vui hawi keh alam.Ref 18.8: Mt 5.30
9 Naibaly nang i mei my nang ai atlym hai baly takhawi piu ly, aphi la: mei angym iy ngari angawm mai y aphi nai tleaung y ly , mei makengrei awm iy heng naira y kun ai nai nang i vui hawi keh alam.Ref 18.9: Mt 5.29
Beram tama nai ai pata nai
(Lk 15:3-7)
10 “Hini khumi theangchichy naichi theung y leaungrei ai pate y ai nai amkym u; nichi i kani pri i amtaw thau naichi my ly kani pri mang i Ngaai i meimai ly niu u jojo, nanai kang thui pi nai bo he.
11 [Khumi i Chapo ly tama naichi ai hau ai nai ang jeu nai ne.]
12 Nangchi ly mana dawn u mo? Khumi ami py beram chungvairei awm iy, hunichi theung y harei preang vui sy, vui takaw ho ngan takawreichi ai daw jo iy, preang vui nai ai ly hau ai nai mawi y chei y ai a?
13 Meitang khyp kang thui pi niu ali teang i khyly preang vui y nai vui takaw ho ngan takawreichi tleaung y ly huni ai mymy ly kawn keh ai.
14 Hunai kamta khyp teang hini khumi theangchichy naichi theung y leaungrei tama ai nai py kani pri mang i Ngampo i kangai ny y leang.
Amjo amnau i kamngo sa nai
15 “Naibaly ngamjo ngamnau my nang i tlang tleaung y atiti hawi y nai sa baly chei ly, ni hawi nangmyni leaung nyhrei ka-thai y ni i tamang nai dawn hai; ni ly ang tangai baly ngamjo ngamnau ai ly nangmy nga teang nai bo.Ref 18.15: Lk 17.3
16 Nai i py mymy ly tangai y baly leu cheaungkhang ly pany nai keung leaung nyhrei mo leaung thomrei mo i labeaung y khaw thai ai nai, khumi takhra leaungrei mo leaung nyhrei mo nang teng y hawi.Ref 18.16: Tara 19.15
17 Naibaly mymy ly hunichi i leu py tangai ngai y baly, palau takhra kamkawmchi teng y tym hai: naibaly mymy ly palau takhra kamkawchi i leu py tangai ngai y baly, ni ly nang i vui Cheng Takhra khumi hawi akeu cheaung nai keung kamta awm sy.
Kawm nai hawi su nai
18 Meitang khyp kang thui pi, khaileaung pri y nangchi my ati py kawm nai ngierei ly kani pri mang y kawm teang ai; khaileaung pri y nangchi my ati py su nai ngierei ly kani pri mang y su teang ai.Ref 18.18: Mt 16.19; Jh 20.23
19 Kang thui pi bi ai, khaileaung pri y nangchi theung y khumi leaung nyhrei myni i atiti hnei naira y myni paleung adyh baly, kani pri mang y awm nai Ngaai my sa pi ai mang.
20 Naibaly mani meingtym y py leaung nyhrei mo leaung thomrei mo kai i amyn y achu baly mychi theung y kaawm ai,” napi.
Kamngo pahen y nai miseaung hawi pata nai
21 Hunai thym khala y ly Petera chei i mymy teng y, “Areng awi, kai i amjo amnau my kai i tlang tleaung y atiti hawi y nai tleng ma-jirei sa iy kaimy pahen ai nai tla mo? Tlen saryhrei a?” napi.Ref 18.21–22: Lk 17.3–4
22 Isu my ly ni teng y, “Tlen saryhrei kang tapi y leang; tlen saryhrei meingtym vui saryhrei, kang napi.Ref 18.22: AA 4.24
23 “Huni nai deaungkho y kani pri my peang nai ly samrang ami mo mymy i miseaungchi teng y yhmtheaung kry nai sai deng ai tau nai hawi pata nai ne.
24 Naibaly mymy ly deng angchei nai khala y, khumi leaungrei, talent meaung kateaungrei kalai awm nai ai ly mymy teng y hawi u bo.
25 Naibaly mymy ly pei ai ati sai py by y nai deaungkho y yhmkeung my ly mymy hawi aju hawi chanauchi hawi, mymy i ati awm nai bawibawi py jo iy, pe ai nai leu pei bo.
26 Hunaibaly miseaung my ly, ‘Areng awi, kai ai kaneu kyh rai, ki pa-rei kang pe ai mang,’ napi nai ambeu iy chiu bo.
27 Hunaibaly miseaung i yhmkeung my ly mymy ai khri pa-rei pahen nai patleaung i, mymy i kalai ly lawi hai bo.
28 Na i py huni miseaung ly theu iy mymy i miseaung ahawichi theung y pia vui pangrei nai tangka cho chungvairei mymy ai pe ai awm nai leaungrei ai niu bo: naibaly mymy ly ni ai patiu iy, ‘Nang i kalai ly pe jau; ‘napi nai ni ai tao y taau bo.
29 Hunaibaly mymy i miseaung ahawi ly ambeu iy, ‘Kai ai kaneu kyh rai, kang pe ai mang,’ napi nai khri pa-rei takeng bo.
30 Na i py mymy ly ngai y i, ni i kalai ki y ryrei ly theaung y paeung bo. Hunaibaly mymy i miseaung ahawichi ly mymy i atiti sa naichi ly niu iy khri pa-rei paleung mawn nai,
31 mymy i atiti sa naichi bawibawi ly mymychi i yhmkeung teng y thui pi bo.
32 Hunaibaly yhmkeung my ly ni ai palau i mymy teng y, ‘Miseaung kamngo nang ly kai teng y hnei ryry nai deaungkho y nang i kalai bawibawi kang palawi chy bo;
33 kaimy kang pahen nai kamta nang py miseaung ahawi ai pahen teang ai nai tlo y a?’ napi.
34 Naibaly ni i yhmkeung ly khri pa-rei kado theu nai, ni i kalai bawibawi ki y ryrei ly patang hai nai keungchi teng y au bo..
35 Nangchi leaung leaungrei ly nangchi i paleung y ngamjo ngamnauchi ai hawihai palai pahen y baly kani pri mang i Ngaai my py nangchi i tlang tleaung y hunai kamta ang sa teang ai,” napi.