12
Anawn kani kahm
(Mk 2:23-28; Lk 6:1-5)
1 Hunai thym khala y Isu ly Anawn Kani y choh bai y tako prei bo; naibaly abangnaichi ly kajeu alam nai, choh vui khei amteaung i cha u bo.Ref 12.1: Leu 23.25
2 Naibaly Pharisaichi ly huna nai niu i mymy teng y, “Khen cham, nang teng y abangnaichi ly Anawn Kani y so ngau y nai sa lawh ly,” napi.
3 Naibaly mymy ly nichi teng y, “Davida hawi mymy teng y abangnaichi ly kajeu alam nai khala y atiti sa nai ly phain u y nai sai a?Ref 12.3–4: 1 Sam 21.1–6
4 Huna nai mymy ly Tameuh i yhm y kun iy mymy hawi ni teng y abangnaichi py cho ngau y nai, pathyp pi nai keungchi harei cha ngau khyh nai khai takhra nai tako cha nai leu ly?Ref 12.4: Lev 24.9
5 Ti y baly Anawn Kani y achura yhm kalen pui i pathyp pi nai keungchi ly anawn Kani taphra iy py, hawi y naira abawi y, nanai nangchi ly Reita y phain u y nai sai a?Ref 12.5: Kati 28.9–10
6 Ati py ne sy achura yhm kalen pui tleaung y len keh nai leaungrei ly hi y awm, nanai kang thui pi.
7 Na i py, ‘Apathyp naira ngai y naimy pahen naira kangai,’ nanai awm nai sai pany u i khyly, nangchi ly kamngo so y naichi ai parip nai ny y.Ref 12.7: Mt 9.13; Hos 6.6
8 Khumi i Chapo ly Anawn Kani i Areng na a,” napi.
Kiu Makengrei dei nai khumi
(Mk 3:1-6; Lk 6:6-11)
9 Naibaly mymy ly hu i dengdairei tako i, nichi i achura yhm y kun.
10 Naibaly khen cham, kiu amkhyn nai khumi leaungrei awm. Naibaly nichi ly mymy ai seu u thai ai nai, “Anawn Kani y no naichi ai hawi sa ngau a?” nanai deng u.
11 Naibaly mymy ly nichi teng y, “Nangchi theung y ami py beram harei awm sy, huni ly Anawn Kani y angawm y tlo khyly, patawn iy ami mo atheu kalau y ai nai?Ref 12.11: Lk 14.5
12 Beram harei tleaung y khumi leaungrei ly mana tanrei teng keh na ly! Hunai deaungkho y Anawn Kani y hawi sa ngaungau,” napi.
13 Hunaibaly mymy ly huni khumi teng y, “Nang i kiu pataw,” napi. Hunaibaly ni ly pataw i makengrei mang kamta hawi teang bo.
14 Hunaibaly Pharisaichi ly theu iy mymy ai padei thai ai nai sai arum u bo.
Tameuh i vawi nai miseaung
15 Naibaly Isu ly huna nai pany i, hu i dengdairei tako vui bo.
16 Naibaly khumi neangneangchi ly mymy teng y abang i, mymy ly nichi bawibawi ai hawi sa pi: naibaly mymy i satang ly den py ahei y ai nai nichi teng y leu pei.
17 Amo Isaia i thui nai kamta,
18 “Khen cham, kai i miseaung kavawi nai,
Kai i ngai parai nai,
kai i paleung ly mymy i tlang tleaung y khrikhri pa-rei kawn parai;Ref 12.18–21: Is 42.1–4
mymy i tlang tleaung y kai i Phailo kadaw pi ai,
Hunaibaly mymy ly Cheng Takhrachi teng y tara chih nai leu thui pi ai.
19 Mymy ly aei py aei y ai, aeu py aeu y ai,
Lam y py ami py mymy i raawi thai y ai.
20 Mymy ly eaung ai nai tara chih nai ly tym hai y ryrei ly,
Kadi du nai satleung taphra y ai,
Teicha angveaung paijei nai py padei y ai,
21 Naibaly Cheng Takhrachi ly mymy i amyn y athang khai ai,”
nanai tym thai ai nai thui nai ne.
Isu hawi Beelzibula
(Mk 3:20-30; Lk 11:14-23)
22 Naibaly hunai thym khala y ly mei kamju leu katheu thai y nai, vawinam my nam nai leaungrei ai mymy teng y pahawi u i, mymy ly ni ai hawi sa pi: naibaly leu katheu thai y nai khumi ly leu katheu thai i, niu py niu thai bo.
23 naibaly khumi mipuichi bawibawi ly khri pa-rei lyh nai, “Hini ly Davida i Chapo ny y a? napi.
24 Na i py Pharisaichi ly huna nai thai iy, “Hini khumi ly vawinam areng Beelzibula ny y baly vawinamchi ai patheu nai ny y leang,” napi.Ref 12.24: Mt 9.34, 10.25
25 Naibaly Isu ly nichi i dawn naichi ly pany i nichi teng y, “Mani pri y py amy tengtawi atiu nai ngierei ly tama ai; naibaly mani avang y py dengtheung py amy tengtawi atiu nai ngierei ly awm thai ai ny y.
26 Naibaly Setan ly Setan ai patheu ryp baly amy tengtawi atiu ryp nai tla veng; hunaibaly mymy i peang naira ly mana awm thai ai mo?
27 Naibaly kai ly Beelzibula deaungkho y vawinamchi ai patheu nai teu nabaly nangchi i chanauchi ly ami deaungkho y patheu nai mo? Hunai deaungkho y nichi ly nangmychi ai chih ai nai keungchi ne ai.
28 Na i py kai ly Tameuh i Phailo deaungkho y vawinamchi ai patheu nai ne baly, Tameuh i peang nai ly nangchi teng y tym nai bo.
29 Hunai ny y baly ami my khumi atho kaawm ai kawm manme y baly, atho kaawm i yhm y kun iy mymy i yhmtheaung ly mana la pi thai ai mo? Hunai bo y naini la pi thai ai ngang.
30 Ami py kai mang y aso hai y nai ly kai ai tiu nai ne; ami py kai ai lo hai achu y nai ly ahei hai nai ne.Ref 12.30: Mk 9.40
31 Hunai deaungkho y kang thui pi, khumichi i kamngo hawi Tameuh ai thui tamawn nai cheaungkhangra y pahen pi ai, na i py Phailo y khrairei thui tamawn nai ly pahen pi y ai.
32 Naibaly ami py Khumi i Chapo ai cheh nai ngierei ai ly pahen pi ai; na i py ami py Phailo Kachai y khrairei cheh nai ngierei ai ly vai heng nai sala y py, neng tym ai nai khala y khrairei py pahen pi y ai.Ref 12.32: Lk 12.10
Keung hawi athai
(Lk 6:43-45)
33 “Dengkeaung ai ly kahawi palawn u makho baly athai py kahawi palawn ai nai tla; dengkeaung ai ly hawi y nai palawn u mako baly athai py hawi y nai palawn ai nai tla; ati mana nai mo nabaly dengkeaung ly athai y amny.Ref 12.33: Mt 7.20; Lk 6.44
34 Pavui i kangpreangchi awi! Nangchi ly kamngo awm iy leu kahawi mana thui u thai ai mo? Paleung y kawi palai nai ly labeaung y thui reng.Ref 12.34: Mt 3.7, 23.33, 15.18; Lk 3.7, 6.45
35 Khumi kahawi ly mymy i paleung i yhmtheaung kahawi i dengdairei atiti kahawi patheu reng; khumi kamngo ly mymy i paleung i yhmtheaung hawi y nai i dengdairei atiti hawi y nai patheu reng.
36 Naibaly kang thui pi, ami py leu avo y nai thui rumrang nai ngierei ly huni satang ly tara chih nai kani y thui pi ai nai tla.
37 Nang i leu my ly nang ai eaung hai ai i, nang i leu my ly nang ai ang pasum hai teang ai,” napi.
Rengrang ka-ma-ra hnei u nai
(Mk 8:11-18; Lk 11:29-32)
38 Hunai thym khala y ly Reita patiu nai keungchi hawi Pharisaichi theung i phyreichi ly mymy teng y, “Sara awi, kaichi ly nang teng i dengdairei ka-ma-ra niu ai nai ngai he,” nanai pathang.Ref 12.38: Mt 16.1; Mk 8.11; Lk 11.16
39 Naibaly mymy ly nichi teng y, “kamngo parai nai hawi pajang sa ryry nai deung kangthauchi ly ka-ma-ra hau u lawh, na i py amo Jona harei ny y baly nichi teng y ka-ma-ra pipi patei ai ny y.Ref 12.39: Mt 16.4; Mk 8.12
40 Jona ly ngo kalen pui i kajeu theung y kani kani thomrei vum vum thomrei awm nai kamta ly, Khumi i Chapo ly khaileaung theung y kani kani thomrei vum vum thomrei awm teng ai he.Ref 12.40: Jona 1.17
41 Ninevi avang i khumichi ly tara chih nai neng khala y ly vai deung i kangthauchi hawi vanrei angdo ai i, nichi ai sum hai ai; ati mana nai mo nabaly Jona my leu thui nai deaungkho y nichi ly uikhei u veng bo; naibaly khen cham, Jona tleaung y len keh nai ly hi y awm na a.Ref 12.41: Jona 3.5
42 Tokalawi mang i samrang nu ly tara chih nai neng khala y ly vai deung i kangthauchi hawi vanrei angthau ai i, nichi ai sum hai ai; ati mana nai mo nabaly mymy ly Solomon i cheng naira tangai ai nai malawn py khuteng taki i dengdairei jeu be; naibaly khen cham, Solomon tleaung y len keh nai ly hi y awm na a.Ref 12.42: 1 Ar 10.1–10; 2 Neng 9.1–12
Aso y nai vawinam vawi teang nai
(Lk 11:24-26)
43 “Naibaly vawinam ly khumi i taku theung i dengdairei theu nai bo y tui by y nai meingtym y aleaung ryry i, anawn naira hau nai ngo y.
44 Naibaly mymy ly, ‘Kai i theu nai yhm y ka-li teang khere ai,’ napi; naibaly tym kha y ka-keu pasi pan iy hawihai palum nai niu lawh.
45 Hunaibaly chei iy mymy tleaung y kamngo keh nai vawinam takhra saryhrei hawi i, hu y kun iy awm u jo ryp; naibaly huni khumi i kangkhym i awm nai sai ly angchei i tleaung y hawi y keh bo. Hunai kamta ly vai deung i kangthau kamngo parai naichi i tlang tleaung y tym ai,” nanai pathang.
Isu i amhm hawi amnauchi
(Mk 3:31-35; Lk 8:19-21)
46 Naibaly mymy ly khumi mipuichi teng y leu thui nai thym khala y ly khen cham, mymy i amhm hawi amjo amnauchi ly mymy hawi arum ai tau nai angam mang y angdo u bo.
47 Naibaly khumi leaungrei ly mymy teng y, “Khen cham, ngamhm hawi ngamjo ngamnauchi ly nang hawi arum ai tau nai angam mang y angdo u jo na a,” napi.
48 Na i py mymy ly thui pi nai keung teng y ly, “Kai i amhm ly ami mo? Kai i amjo amnauchi ly ami mo? napi nai pathang.
49 Naibaly mymy ly abangnaichi ai takhi pi iy,
50 “Khen cham, kai i amhm hawi kai i amjo amnauchi ly! Ati mana nai mo nabaly ami py kani pri mang i Ngaai i kangai sa nai ngierei ly kai i amjo amnau hawi, kai i tuicho hawi, kai i amhm py ne,” napi.