8
Isu my khumi sang palyhreichi ai pacho nai
(Mt 15:32-39)
1 Huni neng khala y ly khumi mipui ka-teng ny y nai awm bi iy, nichi ly ati sai py cha ai nai by y i, mymy ly abangnaichi ai palau iy nichi teng y,
2 “Khumi mipuichi ly vai kai teng y kani thomrei awm i, nichi ly cha ai nai ati sai py by y nai deaungkho y kai ly nichi ai khri pa-rei pahen na;
3 biu hai naimy nichi i yhm y katako hai baly nichi ly lam sala y paha u ai; nichi theung i nai phyreichi ly kamlo parai ra i dengdairei jeu nai i,” napi.
4 Naibaly abangnaichi my ly, “Ami nai hinichi cha ai nai ka-lawn tako phi ly hini daichi ka-vym y ly ma mang i nai nga thai ai mo?”, nanai mymy ai pathang.
5 Naibaly mymy ly nichi teng y, “Tako phi majirei awm u mo?” nanai deng. Nichi my ly, “Phi saryhrei”, napi.
6 Naibaly mymy ly khumi mipuichi ai khaileaung y ateh ai nai leu pei; naibaly tako phi saryhrei la i, kawn nai leu thui pajau nai bo y theng baw theng baw i, nichi i mo y pawi pi ai nai abangnaichi teng y pei: naibaly nichi ly khumi mipuichi i mo y pawi pi.
7 Ngo katheang py maidenrei awm: mymy ly hunichi ai py amtheaung hai iy nichi i mo y pawi pi ai nai leu pei bi.
8 Hunaibaly nichi ly cha i, kajeu kawi u bo: nichi i cha nai kamthom akhui nai py saipa saryhrei awm.
9 Nichi ly sang palyhrei mo awm: naibaly mymy ly nichi ai amprei hai.
10 Naibaly mymy ly abangnaichi hawi vanrei paleaung y atang praw i, Dalmanutha pri tengtang y chei vui.
Pharisaichi my rengrang ka-ma-rachi takeng nai
(Mt 16:1-14)
11 Naibaly Pharisaichi ly theu iy mymy ai cham ai nai mymy teng y kani pri mang i dengdairei atiti ka-ma-ra hau naimy ni ai deng u.Ref 8.11: Mt 12.38; Lk 11.16
12 Naibaly mymy ly khri pa-rei taho sun i,“Ati mana nai vai deung i kangthauchi ly ka-ma-ra hau lawh mo? Meitang khyp kang thui pi, vai deung i kangthauchi teng y ly ka-ma-ra pipi patei ai ny y”, napi.Ref 8.12: Mt 12.39; Lk 11.29
13 Naibaly mymy ly nichi ai tako pi veng i, paleaung y atang bi iy, hu mang vai y angpeang.
Pharisaichi hawi Heroda i angbo
(Mt 16:5-12)
14 Naibaly abangnaichi ly tako syn ai nai tami veng i, tako phi harei chy ny y baly paleaung y ly takhra ha py by y.
15 Naibaly mymy ly nichi teng y, “Pharisaichi i angbo y hawi Heroda i angbo y py tau tleaung y awm u ly, amkym u”, napi cheng.Ref 8.15: Lk 12.1
16 Naibaly nichi ly mymychi tengtawi arum u iy, “Tako by y pasi lawh nai deaungkho y na a”, napi.
17 Naibaly Isu ly huna nai pany iy nichi teng y, “Ati mana nai tako by y nai deaungkho y arum u mo? Vai py nangchi pany y jojo rai a? Dawn nai py pany y jojo rai a? Nangchi i paleung kyh chawn veng bo a?
18 Mei awm nai iy niu u y a? Kano awm nai iy thai u y a? Pany u jo y nai sai a?Ref 8.18: Jer 5.21; Ezek 12.2; Mk 4.12
19 Kai ly sang pangreichi theung y tako phi pangrei theng baw theng baw nai khala y ly cha nai kamthom teaung kakawi majirei akhui u mo?”, napi. Naibaly nichi my ly mymy teng y,“Holai nyhrei”, napi.
20 “Naibaly sang palyhreichi theung y saryhrei nai khala y ly cha nai kamthom saipa kakawi majirei akhui u mo?”, napi. Nichi my ly mymy teng y, “Saryhrei”, napi.
21 Naibaly mymy ly nichi teng y, “Vai py nangchi ly dawn nai pany y jojo rai lo-oh?”, napi.
Isu my Bethsaida i mei kamju ai hawi sa pi nai
22 Naibaly nichi ly Bethsaida avang y tym. Naibaly mymy teng y mei kamju ai hawi u i, ni ai nam ai nai takeng.
23 Naibaly mymy ly mei kamju i kiu y amkhaw iy, avang i dengdairei pahawi; naibaly ni i mei y pachi pathawi i, ni i tlang tleaung y kiu tamam nai bo y, “Atiti niu thai a?”, nanai deng.
24 Naibaly ni ly dengtheang i, “Khumichi kaniu, dengkeaung tako nai kamta naimy kaniu”, napi.
25 Naibaly mymy ly ni i mei y kiu tamam bi: naibaly mymy ly chai pyn pa-rei niu iy hawi ryp i, ati cheaungkhang hawihai palai niu.
26 Naibaly mymy ly, “Avang y py kun moh”, nanai ni ai yhm y vawi hai.
Petera my Isu i satang pany hai nai
(Mt 16:13-20; Lk 9:18-21)
27 Naibaly Isu hawi abangnaichi py theu i, Philipi Kaisari ka-peang i avang takhra takhra y chei u; naibaly tako nai tarawi y mymy ly abangnaichi teng y, “Amichi my kai ai ami ang napi mo?”, nanai deng.
28 Naibaly nichi my ly,“Baptis sa nai keung Johan na a, ang napi; kalangchi ly Elija na a, ang napi; kalangchi ly amo ami mo na a, ang napi”, nanai thui pi.Ref 8.28: Mk 6.14–15; Lk 9.7–8
29 Naibaly mymy ly nichi teng y, “Tumbaly nangchi ly kai ai ami napi mo?”, nanai deng. Petera my ly mymy teng y, “Nang ly Krista ne”, napi nai pathang.
30 Naibaly mymy i satang ly ami teng y thui pi y ai nai nichi ai leu pei kheng.
Isu ly mymy patang ai nai hawi dei ai naichi thui pi nai
(Mt 16:21-28; Lk 9:22-27)
31 Naibaly Khumi i Chapo ly atiti neangneang patang ai nai saichi py, miteaung kehchi hawi, pathyp pi nai keung kalen kehchi hawi, Reita patiu nai keungchi my ngai y ai nai saichi py, ni ai padei ai nai saichi py, kani thomrei nai kha y angthau teang ai nai saichi py nichi ai patiu amteaung bo.
32 Mymy ly huni leu chai pyn pa-rei thui nai ne. Naibaly Petera ly mymy ai hawi takhra iy preng.
33 Na i py mymy ly hi iy abangnaichi ai khen i, “Setan, kai i nithun mang y anaw la, nang ly Tameuh i atitichi dawn y nai ly, Khumi i atitichi dawn lawh nai ne na a hi ly”, napi nai Petera ai preng.
34 Naibaly mymy ly khumi mipuichi ai ly abangnaichi hawi palau i nichi teng y, “Ami py kai teng y abang ai nai ngai baly amy i kangai khai su iy amy i kraws apu naimy kai teng y abang sy.Ref 8.34: Mt 10.38; Lk 14.27
35 Ati mana nai mo nabaly ami py amy i hengra apalawi ai nai ngai nai ngierei ly tama ai: ami py kaimy hawi Satang Kahawi deaungkho y amy i hengra tama nai ngierei ly apalawi ai.Ref 8.35: Mt 10.39; Lk 17.33; Jh 12.25
36 Ami py hini khaileaung pri bomrei nga iy amy i hengra tamo lawh sy, mymy i vui ati amran ai mo?
37 Ami my mymy i hengra i jeng y ati pei ai mo?
38 Ami py vai deung kangthau pajang sa nai hawi kamngo sa reng naichi theung y kaimy ai hawi kai i leu ai py kaji hai nai ngierei ly, Khumi i Chapo ly kani pri i amtaw thau naichi hawi mymy i Ampo i nang parai naira apu naimy ang jeu nai neng khala y ly, huni khumi ai ly ang kaji hai teang ai”, napi.