3
Kiu Makengrei amkhyn nai leaungrei i satang
(Mt 12:9-14; Lk 6:6-11)
1 Naibaly mymy ly achura yhm y kun bi i, hu y ly kiu amkyn nai khumi leaungrei awm.
2 Naibaly nichi ly mymy ai seu u thai ai nai Anawn Kani y hawi sa pi ai mo, so pi y ai mo nanai khen u paryp.
3 Naibaly ni my ly kiu amkhyn nai khumi teng y, “Sala y angdo ba,” napi.
4 Naibaly mymy ly nichi teng y, “Anawn Kani y hawi sa ai nai mo, taphra ai nai mo, paheng ai nai mo, padei ai nai mo sa ngau a?” napi.
5 Na i py nichi ly sai py katheu y. Naibaly nichi i paleung kyh chawn veng nai sai ly mymy ai khri pa-rei paleung mawn hai i, mymy ly kado theu naimy nichi ai khen akiprei nai bo y huni khumi teng y, “Nang i kiu pataw,” napi. Hunaibaly ni ly pataw i, kiu ly hawi teang bo.
6 Naibaly Pharisaichi ly theu u iy, mymy ai padei u thai ai nai sai Heroda kamkawmchi hawi arum u praw ryp.
Ang peang y awm nai khumi mipuichi
7 Naibaly Isu ly mymy teng y abangnaichi hawi ang peang y chei vui: naibaly Kalili pri i dengdairei khumi mipui ka-teng ny y nai abang bo:
8 naibaly mymy i atiti sa nai lyh awm parai nai satang thai iy, Judai pri i dengdairei hawi, Jerusalem avang i dengdairei hawi, Idumai pri i dengdairei hawi, Jordan vai i dengdairei hawi, Tura hawi Sidon avang tengtang i dengdairei py khumi mipui ka-teng ny y nai mymy teng y chei teang.
9 Naibaly khumi mipui nai deaungkho y mymy i vui paleaung chy khai pi rym ai nai abangnaichi teng y thui pi, “Ti y baly kai ai i meimeaung lawh na,” napi.Ref 3.9–10: Mk 4.1; Lk 5.1–3
10 Ati mana nai mo nabaly mymy ly khumi neangneangchi ai hawi sa pi bo; hunaibaly no awm nai ngiereichi ly mymy ai nam thai ai nai ni ai tabawm mang na.
11 Naibaly vawinamchi py mana khala y py mymy ai niu baly, mymy i mo y ambeu naimy, “Nang ly Tameuh i Chapo ne,” nanai aeu u ryry.
12 Naibaly ni ly mymy ai amthang hai y ai nai nichi teng y leu pei kheng rypryp.
Isu my abangnai leaung holai nyhreichi ai vawi takhra nai
(Mt 10:1-4; Lk 6:12-16)
13 Naibaly mymy ly mawi y chei kalau iy, mymy i ngai nai ngiereichi ai ly palau i, nichi ly mymy teng y chei u.
14 Naibaly mymy teng y awm thai ai nai hawi, nichi ai leu thui ai nai pato thai ai nai hawi,
15 vawinamchi ai patheu ai nai aly peang hai ai nai py leaung holai nyhreichi ai vawi takhra:
16 Simon Petera pathi teang nai py, Zebedai i chapo Jakob nini Jakob i amnau Johan py,
17 mymy ly nini ai Boanerzi pathi teang, huni ly Kani Pajyh nai i chapo nini, napi nai sai ne:
18 naibaly Andria py, Philipa py, Bartholomai py, Matthai py,
19 Thoma py, Alphai i chapo Jakob py, Thadai py, Kanan pri i khumi Simon py, mymy ai patiu hai nai keung Iskariota Juda py, hinichi ne.
Isu hawi Beelzibula
(Mt 12:22-32; Lk 11:14-32; 12:10)
20 Naibaly mymy ly yhm y kun. Naibaly khumi mipuichi ly jeu achu bi, hunaibaly nichi ly tako khrairei cho ra y na bo.
21 Naibaly mymy i ahawichi ly huna nai thai i, “Pathu na a tu ly,” napi nai mymy ai patiu ai tau nai theu u.
22 Naibaly Jerusalem i dengdairei kathiu nai Reita patiu nai keungchi my ly, “Ni teng y Beelzibula awm na a hi ly,” napi nai hawi, “Vawinam areng nai deaungkho y na a vawinamchi ai patheu reng nai ly,” napi teang bi.
23 Naibaly mymy ly nichi ai palau i, pata nai leu y nichi teng y, “Setan ly Setan ai mana patheu ryp thai mo?
24 Pri py amy tengtawi atiu ryp baly, huni pri ly awm thai y leang.
25 Dengtheung py amy tengtawi atiu ryp baly, huni dengtheung ly awm thai y leang.
26 Setan py amy tengtawi atiu iy amprei phro phra baly awm thai y ai i, tama lawh ai.
27 Ami my khumi atho kaawm ai kawm manme y baly, atho kaawm i yhm y kun iy, mymy i yhmtheaung ly mana la pi thai ai mo? Hunai bo y naini la pi thai ai ngang.
28 Meitang khyp kang thui pi, Khumichochi ai ly mymychi i kamngo bawibawichi hawi Tameuh ai thui tamawn nai atiti thui tamawn nai py ne sy pahen pi ai:
29 na i py Phailo Kachai y khrairei thui tamtawn nai keung ly mana khala y py pahen naira ngo y ai i, deungtasarei kamngo asa nai bo,” napi: nichi ly,Ref 3.29: Lk 12.10
30 “Vawinam na a tu ly,” napi nai deaungkho y huna nai thui pi nai ne.
Isu i amhm hawi amnauchi
(Mt 12:46-50; Lk 8:19-21)
31 Naibaly mymy i amhm hawi amjo amnauchi jeu i angam mang y angdo iy, mymy ai palau ai nai khumi pato u bo.
32 Naibaly mymy i ahawi y ly khumi mipuichi ateh mang; naibaly nichi ly mymy teng y, “Khen cham, angam mang y ly ngamhm hawi ngamjo ngamnauchi ly nang ai ang hau na a,” napi.
33 Naibaly mymy ly nichi teng y, “Kai i amhm hawi kai i amjo amnauchi ly amichi mo?” napi nai pathang.
34 Naibaly mymy i ahawi tengtang y ateh naichi ai khen akiprei iy, “Khen cham, kai i amhm hawi kai i amjo amnauchi ly!
35 Ami py Tameuh i kangai sa nai ngierei ly huni kypkyp ly kai i amjo amnau hawi, kai i tuicho hawi, kai i amhm py ne,” napi.