10
Aju juvo akhai nai kahm
(Mt 19:1-12; Lk 16:18)
1 Naibaly mymy ly angthau i hu i dengdairei Judai pri tengtang y hawi, Jordan vai mang y chei; naibaly khumi mipuichi ly mymy teng y achu bi i, mymy i sa reng nai reita kamta nichi ai leu patiu bi.
2 Naibaly Pharisaichi ly mymy teng y chei iy, mymy ai cham ai nai, “Khumi ami my aju akhai ngau ngau a?” napi nai deng.
3 Naibaly mymy ly nichi teng y, “Mosi my mana leu ang pei mo?” napi nai pathang.
4 Naibaly nichi ly, “Mosi my ly akhai nai cha tajiu pi iy akhai ai nai pei,” napi.Ref 10.4: Leu 24.1–4; Mt 5.31
5 Na i py Isu my nichi teng y, “Nangchi i paleung kyh chawn veng nai deaungkho y chy bo huni leu pei nai ang tajiu pi nai ly.
6 Na i py khaileaung palum angchei khala i dengdairei mymy ly neampacho hawi neampachy nini ai sa.Ref 10.6: AA 1.27, 5.2
7 Hunai deaungkho y neampacho ly mymy i amhm ampo ai khai su ai i, mymy i aju ai amkhaw ai:Ref 10.7–8: AA 2.24
8 hunaibaly nini leaung nyhrei ly ngan bomrei lawn ai: hunaibaly nini ly leaung nyhrei ny y i, ngan bomrei lawn bo.
9 Hunai deaungkho y Tameuh my patawm nai ly khumi my taprei moh sy,” napi.
10 Naibaly yhm y abangnaichi ly huni leu deng bi.
11 Naibaly mymy ly nichi teng y, “Ami py amy i aju ai khai iy neampachy takhra ai la nai ngierei ly mymy i aju ai pajang sa pi nai bo;Ref 10.11–12: Mt 5.32; 1 Kor 7.10–11
12 ni py mymy i juvo ai khai iy, takhra mang nang vui baly pajang sa nai ne teang,” napi.
Deaungdichychi ai amtheaung hai nai
(Mt 19:13-15; Lk 18:15-17)
13 Naibaly mymy nam ai nai deaungdi chychi ai mymy teng y hawi u bo: naibaly abangnaichi ly nichi ai jo.
14 Na i py Isu my ly huna nai niu iy khri pa-rei paleung hawi y i abangnaichi teng y,“Deaungdi chychi ai kai teng y jeu ai nai pei u, paka u reng moh: Tameuh i peang naira ly hina naichi i vui teu.
15 Meitang khyp kang thui pi, ami py Tameuh i peang nai ly deaungdichy my kawn nai ka-tawm kawn y nai ngierei ly theung y kun ai nai ly aveng,” napi.Ref 10.15: Mt 18.3
16 Naibaly mymy ly nichi ai takawi i, nichi i tlang tleaung y kiu tamam iy amtheaung hai.
Khumi kanang
(Mt 19:16-30; Lk 18:18-30)
17 Naibaly mymy ly tako ai nai theu nai thym khala y khumi leaungrei ly mymy mang y angpreng naimy, mymy i mo y ateh chakrym i mymy teng y, “Sara kahawi, deungtasarei hengra kanga thai ai nai mana kasa ai mo?” nanai deng.
18 Naibaly Isu my ni teng y, “Ati mana nai kai ai kahawi napi mo? Leaungrei ny y baly ami py kahawi by y, huni ly Tameuh ne.
19 Leu pei naichi ly nang pany be: khumi ai padei moh, Pajang so moh, Paviu moh, Seu rumrang moh, Tapawp moh, Ngamhm ngampo ai tahm khai, nanaichi ly,” napi.Ref 10.19: Theu 20.12–16; Leu 5.16–20
20 Naibaly mymy ly ni teng y, “Sara awi, huni leu bawibawi ly kai deaungdichy khala i dengdaireikapatawm nai bo,” napi.
21 Naibaly Isu ly ni ai khen iy tamen i mymy teng y, “Nang ly lamrei takhawi rai; chei ly, nang i awm nai ngierei jo ly, kamawnchi teng y pei, hunaibaly nang kani pri y yhmtheaung nga ai: naibaly jeu ly, kai teng y abang,” napi.
22 Na i py ni ly yhmtheaung neangneang awm nai khumi ne nai deaungkho y, huni leu y meimai takhui sui na i, khri pa-rei paleung mawn naimy tako vui bo.
23 Naibaly Isu ly khen akiprei i abangnaichi teng y, “Yhmtheaung nang naichi ly Tameuh i peang naira y kun ai nai mana tanrei rai na mo?” napi.
24 Naibaly abangnaichi my mymy i leu thui nai ly khri pa-rei lyh na i, Isu my pathang bi i nichi teng y, “Bechi awi, yhmtheaung ai ym naichi i vui ly Tameuh i peang naira y kun ai nai mana tanrei rai na mo!
25 Khumi kanang Tameuh i peang naira y kun ai nai tleaung y ly kula-iu saprym kho y a-i praw ai nai rai y keh,” napi.
26 Naibaly nichi ly khrikhri pa-rei rengrang tlai napi i mymy teng y, “Huna nabaly heng naira ami nga pajau ai mo?” napi.
27 Isu ly nichi ai khen i, “Huni ly khumichi i vui ly sa pajau ai nai aveng, Tameuh i vui ly so pajau y nai ny y: ati mana nai mo nabaly Tameuh i vui ly ati cheaungkhang sa pajau na a,”napi.
28 Naibaly Petera my ni teng y, “Khen cham, kaichi ly ati cheaungkhang khai su iy nangteng y abangbo,” napi.
29 Isu ly, “Meitang khyp kang thui pi, ami py kaimy deaungkho y hawi Satang Kahawi deaungkho y py yhm mo, amjo amnauchi mo, tuichochi mo, amhm mo, ampo mo, chanauchi mo, hlau mo khai jo nai ngierei ly,
30 vai heng nai sala y my py ana naira hawi vanrei yhm py, amjo amnauchi py, tuichochi py, amhmchipy, chanauchi py, hlau py meingtym harei y meingtym chungvairei peung y ai nai leaung py by y i,neng tym ai nai khala y deungtasarei hengra py nga bi ai.
31 Na i py kangman keh y awm nai khumi neangneangchi ly kangkhym kangtem y awm ai; kangkhym kangtem y awn naichi ly kangman keh y awm ai,” napi.Ref 10.31: Mt 20.16; Lk 13.30
Isu ly mymy dei ai nai tlen pa-thom pany hai nai
(Mt 20:17-19; Lk 18:31-34)
32 Naibaly nichi ly Jerusalem avang y kalau ai nai lam y awm u i, Isu ly mo mang y tako nai nichi ly khri pa-rei lyh na; nichi teng y abang nai khumichi py jei.
33 Naibaly mymy ly holai nyhreichi ai hawi takhra bi i, “Khen cham, achi ly Jerusalem avang y kalau ai i, Khumi i Chapo ai ly pathyp pi nai keung kalenchi hawi Reita patiu nai keungchi teng y py patiu hai ai; naibaly nichi my ly mymy i tlang tleaung y dei ai nai leu atlym hai iy, Cheng Takhrachi teng y au ai;
34 naibaly nichi my ly mymy ai panui hai ai i, pachi pathawi u iy, chip i padei ai: naibaly mymy ly kani thomrei kani y angthau teang ai,” nanai mymy i tlang tleaung y atiti tym ai nai saichi lynichi teng y thui pi.
Jakpb nini Johan i takeng nai
(Mt 20:20-28)
35 Naibaly Zebedai i chapo Jakob nini Johan ly mymy i ahawi y chei hawi i, mymy teng y, “Sara awi, kaini i nang teng y hnei nai ngierei ly sa pi i khyly ngai,” napi.
36 Naibaly mymy ly nini teng y, “Nangni i vui ati kang so pi khyly ngai mo?” napi.
37 Naibaly nini ly mymy teng y, “Nang i nang parai naira y ly nang i lamtang mang y leaungrei, nang i langvawi mang y leaungrei ateh thai ai nai kaini ai pei kyh,” napi.
38 Na i py Isu ly nini teng y, “Nangni i hnei hawi nai ly nangni ly pany y. Kai i khau nei ai nai ly nangni nei pajau thai a? Kai i baptisma nga ai nai py nangni py nga pajau thai a?” napi.Ref 10.38: Lk 12.50
39 Naibaly nini ly mymy teng y, “Pajau chy,” napi. Isu ly nini teng y, “Kai i khau nei ai nai ly nangni ly nei hawi ai mang; kai i baptisma nga ai nai py nangni ly nga hawi teang ai mang:
40 ngna i py kai i lamtang mang y mo, langvawi mang y mo ateh ai nai leu ly kai i pei ai nai ny y i, sa pi rym naichi i vui ne,” napi.
41 Naibaly leaung horeichi ly huni satang thai iy Jakob nini Johan i tlang tleaung y khrikhri pa-rei paleung hawi y na.
42 Naibaly Isu ly nichi ai palau i nichi teng y, “Cheng Takhrachi i tlang tleaung y peang ai nai keung y khai naichi ly nichi i tlang tleaung y khri pa-rei atho sa na; nichi i khumi kalenchi py nichi i tlang tleaung y khri pa-rei aly peang, nanai nangchi pany.Ref 10.42–43: Lk 22.25–26
43 Na i py nangchi theung y ly hunai kamta awm ai nai tlo y: na i py ami py nangchi theung y khumi kalen lawn ai ngai nai ngierei ly nangchi ai sabawm nai keung y awm ai nai tla:Ref 10.43–44: Mt 23.11; Mk 9.35; Lk 22.26
44 ami py nangchi theung y kangman keh lawn ai ngai nai ngierei ly nangmychi i miseaung y awm ai nai tla.
45 Khumi i Chapo malawn py mymy ai sabawm ai nai hau nai ny y i, kalangchi ai sabawm ai nai hawi, khumi neangneangchi ai atleu ai nai mymy i hengra pei lawh ai nai py ang jeu nai ne,” napi.
Isu my mei kamju Batimai ai hawi sa pi nai
(Mt 20:29-34; Lk 18:35-43)
46 Naibaly nichi ly Jeriko avang y tym; naibaly mymy ly abangnaichi hawi khumi mipui ka-teng ny y naichi hawi Jeriko i dengdairei theu nai thym khala y, cheaung nai mei kamju, Timai i chapo Bertimai ly lam teng y ateh nai ne.
47 Naibaly Nazaret Isu ne, nanai pany baly, “Isu Davida i chapo awi, kai ai pahen kyh,” nanai aeu amteaung.
48 Naibaly katheu y ai nai khumi neangneangchi my ni ai jo: na i py ni ly, “Davida i chapo awi, kai ai pahen kyh,” nanai aeu ra aeu ra lawh.
49 Naibaly Isu ly angdo paw iy, “Ni ai palau u,” napi. Naibaly mei kamju ai palau u i ni teng y, “Paleung awmnem naimy awm ly, angthau, ang palau ho,” napi.
50 Naibaly ni ly kanih tli su i angthau praw iy Isu teng y chei.
51 Naibaly Isu ly pathang i ni teng y, “Nang i tlang tleaung y ati kang sa pi ai nai ngai mo,?” napi. Naibaly mei kamju ly mymy teng y, “Rabboni, niu thai ai nai kangai,” napi.
52 Naibaly Isu my ni teng y, “Tako jau, nang i ym naira my ang hawihai nai bo,” napi. Hunaibaly ni ly tlenrei khyh my mei angvang praw i lam y Isu teng y abang ryp.