3
Mikha ly Israela cheng lu sa naichi ai thui tamawn nai
1 Israela chengchi ai lu sa naichi awi, tangai u! Nangchi ly leu meitang naimy tara chih ai nai khumichi ne i py,
2 hawi nai kalop ai niu ngai y iy, hawi y nai kalop ai ly khrei u. Nangchi ly kai i khumichi ai kangheng tang my peih lei iy, hiura i bawichi tli u bo.
3 Nangchi ly kai i khumichi i ngan cha u. Nichi i pei leih iy hiuchi tawp piupa i, mawi biu kamta akei hawi abai u bo.
4 Nangchi ly Areng teng y vo naimy hnei takeng nai neng tym ai. Na i py mymy ly nangchi ai pathang pi ai ny y. Nangchi ly hawi y naira sa nai deaungkho y, mymy ly nangchi i hnei takeng nai raawi tangai pi ai ny y.
5 Paisa tangka pei pajau nai khumichi teng y tlamsa ai nanai py, paisa tangka pei pajau y nai khumichi teng y, tavai takai patang naira tym hai ai nanai py, thui reng nai amochi i li-tapawp nai ly kai i khumichi avum u bo. Areng my, huna nai amochi teng y,
6 “Amochi awi, nangchi i vui neng kani ly dym en bo, kani ly dym ai bo. Nangchi ly atiti amteng hai naichi niu ai ny y leang bo. Mo mang i satang thui thai nai sa thai naira awm ai ny y,” napi.
7 Mo mang i satang thui nai khumichi ly thui nai leu teng y nai deaungkho y, kangji nga u ai. Nichi ly Tameuh teng i thui nai leu ngo y nai y, tahm anem u ai.
8 Na i py kai ly Israela chengchi teng y mymychi i sa tamang naichi pany hai ai nai Areng i phailo sa thai naira, leu meitang naimy tara chih pajau nai haiho hawi sorai paleung kawi angym bo.
9 Israela chengchi ai peang nai keung miteaung kehchi awi, tangai u. Nangchi ly leu meitang naimy tara chih nai ai niu ngai y iy, kateng lam ai tamang hai u bo.
10 Nangchi ly khumi ai padei nai hawi, teng y nai sai pakhiu langdeng salo y, Tameuh i mary pui napi nai Jerusalem mary sa u bo.
11 Mary y peang nai khumichi ly un tangka cha iy, peang u. Pathyp pi nai keungchi ly vang nga ai nai i vui y reita leuchi patiu pi. Amochi ly tangka la iy amteng hai nai leu thui pachai u. Nichi bawibawi my Areng ly nichi hawi vanrei awm, nanai thui u. Nichi my, “Kaichi teng y patang naira tym pajau y, Areng ly kaichi hawi vanrei awm nai ne,” nanai thui u bo.
12 Hunai deaungkho y nangchi i molam y Zion mary ly thawn piu yb nai li khaileaung kamta lawm ai. Jerusalem mary ly phra nairachi pakheng mang nai meingtym lawm ai. Achura yhm awm nai mawi ly daichi lawm ai.