24
Maisi kateangchi kry nai
(Theu 27:20-21)
1 Areng ly Mosi i dengdairei
2 Israela chengchi teng y hina nai kamta leu pei bo. Tabynako theung i maisi kateangra mai avawrei thawn jo thai ai nai, hawi keh nai olive asitui jeu hai u.
3 Aron ly Tabynako theung i chai keh nai meingtymra y awm nai Leu Maikawm Pawm mo i kanih ali jang nai angam mang y maisi kateang ai dym tleirei thawn jo ai nai tla. Huni maisi kateang ly Areng i mo y dym mang dengdai khawn mang y khrairei, angvang jo ai nai tla. Nangchi ly hini Reita leu pei nai ai patawm jojo ai nai tla.
4 Aron ly muku masi kateangra i maisi yhmchi ai kry iy, Areng i mo y angvang hai jojo nai tla.
Tameuh teng y talam nai tako
5 Tako dei sie apom phai saryhrei hawi tako phi 12 rei paawp ai nai tla.Ref 24.5–6: Theu 25.30
6 Areng i mo y awm nai muku tangcheng hawi sa nai sabawi salo y, lam harei y tako phi tariurei, lam nyhrei pajyn ai nai tla.
7 Areng teng talam nai ka-ma-ra y tako phi pajyn nai lam hareira y rimui kahawi tangcheng khai ai nai tla.
8 Anawn kani tleirei Areng i mo y tako talam ai nai tla.
9 Hini ly Israela chengchi sa patawm jojo ai nai kalop ne. Hini takochi ly Aron hawi ni i katu chanauchi cha ai nai kavui ne. Pathyp pi nai keungchi i vui Areng teng y talam nai tako ne nai deaungkho y chai keh nai ne i, nichi ly hini tako ai meingtym kachaira cha ai nai tla.
Leu meingtym naimy tara chih nai sai
10-11 Israela chengchi i taira y Aikupta neampacho ampo hawi Israela cheng amhm nini i tapen nai leaungrei awm; amhm ly Dan cheng theaung theung i Dibri i chaniu Shelomith ne. Huni Aikupta neampachy ly tai theung y Israela cheng neampacho leaungrei hawi ajo ani nai thym khala, Areng i amyn y pasawi nai ne. Naibaly ni ai Mosi teng y hawi u i,
12 ni ai paeung vui iy ni i molam y Areng my ati mana leu pei na mo, nanai ajeng u bo.
13 Areng my Mosi teng y,
14 “Huni khumi ai tai angam mang y patheu; ni i pasawi nai ai thai nai khumi lutengchi ly ni i lu tleaung y kiu kheang u iy, kaichi thai, nanai pany hai ai nai tla. Naibaly Israela cheng bawibawichi my, ni ai lengseaung hawi aphi ka ai nai tla.
15 Khumi ami py Tameuh ai pasawi lawh baly, huni khumi i tlang tleaung y kamngo pajengra tym ai;
16 huni khumi ai padei ai nai tla, nanai Israela chengchi teng y thui pi ai nai tla. Israela cheng mo, Israela pri y awm nai cheng takhra mo, Areng ai pasawi lawh baly, Israela cheng vereichi my huni khumi ai lengseaung hawi aphi ka ai nai tla.
17 “Khumi ai padei nai keung ai ly padei teang ai nai tla;Ref 24:17: Theu 21:12
18 ami i tawnbawi ai padei nai khumi ly tawnbawi yhmkeung teng y kangtheung peh teang ai nai tla. Hini reita leaungsai ly hengra i vui hengra jeng theng teang nai ne.
19 “Ami ai tamo kalem nga hai nai khumi ly amy py huna nai kamta avum teang ai nai tla;
20 ami i hiu khei nai khumi ly amy py hiu khei nai avum teang ai. Ami i mei hm tha vui nai khumi ly amy py mei hm tha vui nai avum teang ai. Ami i ho khei vui nai khumi ly amy py ho khei nai avum teang ai. Ami ai no nga hai nai kamta ly amy teng py no nga hai teang ai.
21 Tawnbawi ai padei nai khumi ly huni kangtheung peh teang ai nai tla. Na i py khumi ai padei nai keung ai ly padei teang ai nai tla.
22 Kai ly nangchi i Areng Tameuh ne nai deaungkho y, nangchi hawi vanrei awm nai cheng takhrachi ly hini reita leu pei nai tangai ai nai tla,” napi.
23 Mosi my Israela chengchi teng y huna nai leu pei nai kamta, tangai y nai khumichi ai ly tai angam mang y patheu iy, lengseaung hawi aphi u ka nai ne. Hina nai kamta Israela chengchi ly Mosi teng y Areng my leu pei naichi tangai u bo.