22
1 Areng my Mosi dengdairei
2 Aron hawi ni i chapochi teng y amti pi ai nai leu pei nai ly “Nangchi ly kai i amyn kachai ai thui tamawn y ai nai, Israela khumichi i kai teng y kapathypra talam nai ly tahm ai nai tla. Kai ly Areng ne.
3 Nang i kangpreangchi theung i ami py, reita leaungsai y chai y nai khumi ly Israela chengchi my kai teng y talam nai kapathyprachi sahawi y ahai lawh baly, ni ly maichamra kalop sa bi ai nai ngo y ai. Hini reita leu pei nai nangchi patawm jojo ai nai tla. Kai ly Areng ne.
4 “Aron kangpreangchi theung i ami py ka-jei awm nai nganpeih no man nai khumi mo, ang vawi hawi y nai man nai khumi mo, reita leaungsai y kachai ngo y rai khala, kai teng y talam nai kapathyprachi cho ngau y. Pathyp pi nai keung ly khumi tlaiveu ai abi iy chai y nai ngiereichi ai nam lawh nai py, taheaung tui ju nai py,
5 chai y nai tawnbawi, ti y baly khumi ai nam lawh nai py, chai y nai lawm ai.
6 Huna nai pathyp pi nai keung ly dym mang y khrairei chai y ai. Ni ly tui ahiu chum khala naini kai teng y talam nai kapathyprachi cha ai nai nga ai.
7 Kani dym baly ni ly chai bo; naibaly ni ly katalamra teicha teineichi cha pajau nai ne.
8 Ni ly dei kari y dei nai tawnbawi, ti y baly mawi kasi my kei iy dei nai tawnbawi mawi cha ai nai avo y; huna nai cha lawh baly ni ly chai y bo. Kai ly Areng ne.
9 Pathyp pi nai keung bawibawichi ly kai i reita leu pei naichi teaung patawm ai nai tla. Huna nai so y baly nichi ly kamngo tla ai i dei u ai; ati mana nai mo nabaly nichi ly reitachi taphra nai deaungkho y ne. Kai ly Areng ne i, hunichi ai chai hai bo.
10 “Pathyp pi nai keung i yhm dengtheung y abawi nai khumi naini katalamra kachai cha pajau khyh nai ne; pathyp pi nai keung hawi vanrei awm nai khumi hawi, ka-tham khumichi ly huni katalamra cho ngau y.
11 Na i py pathyp pi nai keung mymy i van nai miseaung, ti y baly my i yhm y tapen nai miseaung ly pathyp pi nai keung i nga nai phy teicha teinei cha pajau nai ne.
12 Pathyp pi nai keung i chaniu ly pathyp pi nai keung ny y nai khumi leaung leaungrei hawi apom baly, ni ly katalamra kachai cho ngau y.
13 Na i py pathyp pi nai keung i chaniu ly juvo dei nai mo, ti y baly juvo hawi akhai nai mo, cho chanau so y nai deaungkho y ampo i yhm y ali nai ne baly, ampo i phy nga nai teicha teineichi cha pajau. Pathyp pi nai keung i yhm dengtheungchi naini hunichi cha pajau khyh nai ne.
14 “Pathyp pi nai keung yhm dengtheung y abawi y nai khumi ly athang khai y naimy kachai talam nai cha lawh baly, ni ly pathyp pi nai keung teng y huni teicha teinei van bo y, chumphy apomrei peh ai nai tla.
15 Pathyp pi nai keungchi ly kapathypra kachai cho ngau y nai khumi ai cha hai nai molam y
16 huni katalamra ai chai hai y nai so moh. Huni katalamra cho ngau y nai khumi cha lawh baly, kamngo sa nai ne i pajeng naira avum ai. Kai ly Areng ne i, huni katalamrachi ai chai hai nai ne,” napi.
17 Areng my Mosi dengdairei
18 Aron hawi ni i chapochi hawi, Israela khumi bawibawichi teng y hini reitachi pei pi nai ne. Israela cheng mo, Israela pri y awm nai cheng takhra mo, vaineng abeu nai kamta py ne sy, paleung kangai mo py ne sy, leng patlum nai kapathypra talam nai khala tawnbawi ly no-na awm ai nai tlo y.
19 No-na by y nai tawnbawi katai ai naini, kai ly kawn pi nai ne.
20 Nangchi ly no-na awm nai tawnbawi talam lawh baly, Areng ly kawn pi ai ny y.Ref 22:20 Leu 17:1
21 Ami mo ly Areng teng y leunghawi kapathypra talam nai khala, vaineng abeu iy talam nai py ne sy, paleung kangai y talam nai py ne sy, kaimy kawn pi ai nai tawnbawi ly no-na by y ai nai tla.
22 Areng teng y, mei paju nai tawnbawi, kiu kheu tabai nai tawnbawi, nai jui nai ang vawi awm nai tawnbawi, nganpeihra kamtha hawi phran awm nai tawnbawichi ai maicham tleaung y leng patlum ai nai avo y.
23 Dawipeu nai tawnbawi, ti y baly mo-cha amny amcha y nai tawnbawichi ai amy i paleung kangai talam pajau lawh teu i py, vaineng ka-deu hawi talam nai kapathypra ly talam ai nai avo y.
24 Areng teng y talam ngau y nai tawnbawichi ly janghm thip piu nai, takip vui nai, tamo nga nai, tamawi aseih piu nai tawnbawichi ne; nangchi i pri y huna nai tawnbawichi talam ngau y.
25 Cheng takhra khumi teng i nga nai tawnbawi py, kapathypra palawn iy talam ai nai avo y. Huna nai tawnbawi ly no-na awm, nanai palawn ai i, talam ngau y.
26-27 Si, beram, mi-i chochi ai amhm hawi kani saryhrei awm hai chum kha naini, kapathypra y talam pajau.
28 Si nu hawi si cho ai mo, beram cho hawi nu ai mo, mi-i nu hawi cho ai mo, kani khurei talam ngau y.
29 Nangchi ly Areng teng y kawn nai kapathypra talam nai khala, reita leu pei nai kamta sa baly kawn pi ai.
30 Kapathypra mawi ly kani khurei y my cha be ai nai tla; khawn mang khrairei kamlai awm ai nai tlo y.
31 Areng my, “Kai i leu pei naichi tangai u; kai ly Areng ne.
32 Kai i amyn kachai ai thui tamawn moh; kai ly kachai ne, nanai Israela khumi bawibawichi my pany u ai nai tla. Kai Areng ly nangchi ai chai hai bo.
33 Kai ly nangchi i Tameuh kalawn ai nai, nangchi ai Aikupta pri i dengdairei kang pahawi bo; kai ly Areng ne,” napi.