1 Areng ly Mosi nini Aron teng y, 2 Israela khumichi i vui teaung ai nai reitachi pei pi bo. Neampacho leaung leaungrei ly ni i taheaungra y katli leaung sup nai ang vawi man nai mo, 3 ang vawi hawi chum nai bo y mo, apachai y rai baly chai y nai ne. 4 Huni khumi ateh nai ira, ti y baly aseaung nai nibai py chai y. 5 Khumi leaung leaungrei ly ni i aseaung nai nibai y abi lawh baly, 6 ni i ateh lawi y abi lawh baly, my i ateaungchi pasiu iy tui ahiu pan ai nai tla; ni ly dym mang y khrairei chai y ai. 7 Angvawi hawi y nai man nai khumi ai abi nai khumi ly my i ateaungchi pasiu iy tui ahiu pan ai nai tla; ni ly dym mang y khrairei chai y ai. 8 Huni taheaungra y katli leaung sup nai khumi ly reita leaungsai y chai nai khumi i tlang tleaung y pachi pathawi lawh baly, pachi amthawi chawm nai khumi ly mymy i ateaungchi pasiu iy tui ahiu pan vui ai nai tla; ni ly dym mang y khrairei chai y naimy awm ai. 9 Taheaungra y ang vawi hawi y man nai khumi ateh nai keaungngo atang nai nibai, ti y baly ni i ateh naira ly chai y nai ne. 10 Huni khumi i ateh nai atehra ai nam nai khumi ly dym mang y khrairei chai y ai. Huni khumi i vawnsai ateaung ai syn nai khumi ly my i ateaungchi pasiu iy tui ahiu pan ai nai tla; ni ly dym mang y khrairei chai y naimy awm ai. 11 Huni ang vawi man nai khumi ly kiu asi pan y naimy takhra khumi leaungrei ai nam lawh baly, nam amteng nai khumi ly ateaungchi pasiu iy tui ahiu pan vui ai nai tla; ni ly dym mang y khrairei chai y naimy awm ai. 12 Huni ang vawi awm nai khumi my nam nai alai laawm ai ly pakawi veng ai nai la; dengkeaung hawi sa nai laawm ai nam lawh baly, hawi hai palai paju pan ai nai tla.

13 Huni khumi ly ang vawi man nai hawi nai bo y, kani saryhrei ajeng ai nai tla; huni bo y ateaungchi pasiu iy tui kachai hawi ahiu pan ai nai tla; naibaly ni ly reita y chai naira nga bo. 14 Tajarei kani y ni ly yhm buhu bomrei, ti y baly amprym buhu bomrei ai, Areng i awmra Tabynako katheu pa-kho mang y syn iy pathyp pi nai keung teng y au ai nai tla. 15 Pathyp pi nai keung ly kamngo pahen nai kapathypra i vui tavo harei talam ai nai tla. Huna nai kamta pathyp pi nai keung ly huni khumi i vui kachai sa pi ai nai tla.

16 Neampacho leaungrei ly atyhtyh naimy taheaung tui jui lawh baly, tlang verei tui ahiu pan vui ai nai tla; ni ly dym mang y khrairei chai y ai. 17 Taheaung tui abawi nai ateaung, ti y baly mawipeih ateaung ly pasiu pan vui ai nai tla; huni ly dym mang y khrairei chai y ai. 18 Neampacho hawi neampachy nini i ahawi pajau nai bo y, nini ly tui ahiu ai nai tla; nini ly dym mang y khrairei chai y ai.

19 Neampachy ly tlangchai tym baly, ni ly kani saryh ryrei chai y nai ne; ni ai nam nai khumi ly dym mang y khrairei chai y ai. 20 Tlangchai tym nai thym khala, huni neampachy i ateh lawi, ti y baly aseaung nai nibai ly chai y nai ne. 21-23 Huni neampachy i ateh nai lawi, ti y baly aseaung nai nibai y abi nai khumichi ly my i ateaungchi pasiu iy tui ahiu pan ai nai tla; ni ly dym mang y khrairei chai y ai. 24 Tlangchai tym nai neampachy ly chai y nai deaungkho y ni hawi ta-pui ta-chi apha nai neampacho py, kani saryhrei chai y ai; ni i aseaung nai nibai py chai y bo.

25 Neampachy leaungrei ly my i tlangchai awm nai neng ny y naimy neng kakra thi parawp nai mo, ti y baly my i tlangchai neng bo y py, thi parawp veangveang lawh baly, my i tlangchai kari tym nai kamta, chai y nai ne. 26 Tlangchai tym nai thym khala ni i ateh lawi, ti y baly aseaung nai nibai ly chai y nai ne. 27 Hunichi ai abi nai khumi ly chai y nai deaungkho y, my i ateaungchi pasiu iy tui ahiu pan ai nai tla; ni ly dym mang y khrairei chai y ai. 28 Neampachy ly thi parawp nai akyn nai bo y, kani saryhrei bo baly, reita leaungsai y chai ai. 29 Tajarei kani y ni ly yhm buhu bomrei, ti y baly amprym buhu bomrei ai Areng i awmra Tabynako katheu pa-kho mang y syn iy, pathyp pi nai keung teng y au ai nai tla. 30 Pathyp pi nai keung ly kamngo pahen nai kapathypra i vui tavo harei, leng patlum nai kapathypra i vui takhra tavo harei talam ai nai tla. Huna nai kamta pathyp pi nai keung ly huni neampachy i vui kachai sa pi ai nai tla.

31 Areng ly tai naira umtang y awm nai Tabynako ai amso ngai hai y ai nai, Israela chengchi i vui Mosi teng y pany hai nai ne. Nichi ly Tabynako ai chai hai y lawh baly dei u takengkei ai.

32 Hini reitachi ly ang vawi hawi y nai man nai khumi, taheaung tui jui nai khumi, 33 tlangchai tym nai neampachy, reita leaungsai y chai y nai neampachy hawi ta-pui ta-chi apha nai neampachochi i vui y pei nai reitachi ne.