13
1 Areng ly mosi hawi Aron nini teng y, hini reitachi pei pi bo.
2 Nangchi theung y amimi py, ngan peih salo y uisalu mo, taposa nai mo, ang vawi engthla nai mo amny iy, ka-jei awm nai nganpeih no man ai nai tau lawh baly, Aron i kangpreang pathyp pi nai keung teng y chei hai ai nai tla.
3 Pathyp pi nai keung my ang vawi ai cham nai khala, tlang muichi kaleung iy, ang vawi tamo aneng lawh baly, huni khumi teng y ka-jei awm nai nganpeih no man nai deaungkho y, nang ly chai y, nanai thui pi ai nai tla.
4 Na i py huni ang vawi ly kaleung i py mui ly kaleung y, ang vawi tamo py aneng y lawh baly, pathyp pi nai keung ly huni khumi ai kani saryhrei khai takhra ai nai tla.
5 Pathyp pi nai keung ly saryh kani y huni khumi ai khen bi nai khala, ang vawi ly kari awm nai, typra y, nanai niu baly huni khumi ai ly kani saryhrei khai takhra bi ai nai tla.
6 Naibaly kani saryhrei kani y, huni khumi ai cham bi i, ang vawi ly jeinawm nai am-oh y iy, ang vawi rumrang teu nai deaungkho y, reita y chai bo, napi ai nai tla. Huni khumi ly my i ateaungchi pasiu pan chum baly, reita y chai ai.
7 Na i py Pathyp pi nai keung my khen nai huni khumi i ang vawi ly chai bo, napi nai bo y ang vawi am-oh lawh baly, huni khumi ly pathyp pi nai keung teng y akhen hai bi ai nai tla.
8 Pathyp pi nai keung my huni khumi i ang vawi khen pi nai khala, ang vawi ly angdaira nai niu lawh baly, huni ang vawi ly ka-jei awm nai nganpeih no ang vawi ne nai deaungkho y, huni khumi ai chai y, nanai thui pi ai nai tla.
9 Nangchi theung i amimi py ka-jei awm nai nganpeih no man lawh baly, huni khumi ai pathyp pi nai keung teng y chei hai ai nai tla.
10 Pathyp pi nai keung my ni ai khen pi nai khala, nganpeih salo y ang vawi kaleung nai hawi mui py kaleung iy, nai am-eng lawh baly,
11 huni ly ka-jei awm nai nganpeih no ang vawi ne. Pathyp pi nai keung ly huni khumi ai chai y napi ai nai tla. Ni teng y hawi y nai no-na man bo, nanai apany nai deaungkho y ni ai ly khai takhra ai nai aly by y.
12 Ni i nganpeih no ly lu i ka-so kheu mang y khrairei kawibiu na lawh baly,
13 pathyp pi nai keung my huni khumi ai, khen taleang bi ai nai tla. Ni i ang vawi ly tlang verei kawibiu nai niu baly, pathyp pi nai keung my nang ly reita y chai bo napi ai nai tla. Ni ly tlang verei kaleungbiu na baly reita y chai nai ne.
14 Na i py huni khumi i ang vawi ly angdai tyh lawh baly ni ly chai y bo.
15 Naibaly pathyp pi nai keung ly ni ai khen bi nai khala, tlang tleaung y ang vawi man nai niu baly, ni ai chai y napi ai nai tla. Angvawi man nai ly ka-jei awm nai nganpeih no ne, nanai amny nai y, ni ly chai y nai ne.
16 Na i py ang vawi ly tha iy kaleung baly, ni ly pathyp pi nai keung teng y chei teang bi ai nai tla.
17 Nimy nang ai cham teang bi ai nai ne. Huni ang vawi ly kangleung mang y amtlau ali baly nang ly reita y chai naira nga bo, nanai pathyp pi nai keung my ang thai hai ai.
18 Nangchi theung i leaung leaungrei ly uisalu hawi veng iy satlangra y,
19 kangleung eng-hup nai mo, ti y baly paleng rang naimy kangleung vah lawh baly, nang ly pathyp pi nai keung teng y chei hai ai nai tla.
20 Pathyp pi nai keung my no ang vawi khen pi nai khala, ang vawi ly aneng iy muichi kaleung nai niu lawh baly, huni khumi ai chai y napi ai nai tla. Huni ang vawi ly uisalura man nai ka-jei awm nai nganpeih no ang vawi ne.
21 Na i py pathyp pi nai keung ly angvawi y khen i, muichi kaleung y, ang vawi py aneng kyh y, kaleungho nai niu lawh baly, huni khumi ai kani saryhrei khai takhra ai nai tla.
22 Angvawi tamo ampreng nai niu lawh baly, huni khumi teng y no-na man bo i, ni ai chai y napi ai nai tla.
23 Na i py huni ang vawi ly am-oh y naimy, kari kamta awm lawh baly, uisalu satlang teu; naibaly pathyp pi nai keung my huni khumi ai, reita leaungsai y chai bo, napi ai nai tla.
24 Nangchi theung i amimi py, mai my kang iy mai kang lawi nganpeih y kaleung nai mo, ti y baly paleng rang nai mo, awm lawh baly,
25 pathyp pi nai keung my khen cham ai nai tla. Huni angvawira i muichi ly kaleung iy aneng nai niu lawh baly, mai kang tamo y ka-jei awm nai nganpeih no lawm nai deaungkho y, pathyp pi nai keung ly huni khumi ai, chai y napi ai nai tla.
26 Na i py angvawira awm nai mui ly kaleung y, ang vawi py aneng y, kaleungho nai niu lawh baly, huni khumi ai kani saryhrei khai takhra ai nai tla.
27 Pathyp pi nai keung my saryhrei kani y ni ai khen taleang bi iy, ang vawi ly ampreng nai niu; huni ang vawi ly ka-jei awm nai nganpeih no ne lawh nai deaungkho y, huni khumi ai chai y napi ai nai tla.
28 Na i py huni ang vawi ly kari kamta awm iy, am-oh y nai py, kaleungho nai py niu lawh baly, huni ly ka-jei awm nai nganpeih no ny y; huni ang vawi ly mai kang lawi satlang teu deaungkho y, pathyp pi nai keung ly huni khumi ai, reita leaungsai y chai napi ai nai tla.
29 Nangchi theung y neampacho, ti y baly neampachy leaungrei i lu y mo, tengtabyh y mo ang vawi man lawh baly,
30 pathyp pi nai keung my huni ang vawi khen pi ai nai tla. Angvawi ly aneng iy muichi hapreaung nai kaleungho lawh baly, huni ly ka-jei awm nai nganpeih no ne nai deaungkho y, huni khumi ai chai y napi ai nai tla.
31 Pathyp pi nai keung ly huni khumi ai khen nai khala, ang vawi aneng y i py ang vawi tamora i muichi ly kari kamta ny y jojo lawh baly, huni khumi ai kani saryhrei khai takhra ai nai tla.
32 Pathyp pi nai keung my saryhrei kani y, khen taleang bi i, huni ang vawi ly am-oh y, muichi py kadausa y, ang vawi py aneng y nai niu baly,
33 ang vawi teng ka-ki mui vau ai nai tla. Naibaly huni khumi ai kani saryhrei khai takhra bi ai nai tla.
34 Saryh kani y pathyp pi nai keung my ang vawi khen taleang bi nai khala, ang vawi ly am-oh y, aneng y, nanai niu baly huni khumi ai, reita leaungsai y chai bo napi ai nai tla. Huni khumi ly my i ateaungchi pasiu pan chum baly chai bo.
35 Na i py ni ai chai bo, napi chum nai bo y, ang vawi ly am-oh teang lawh baly,
36 pathyp pi nai keung ly huni khumi ai khen taleang bi ai nai tla. Angvawi am-oh teang nai niu baly mui kadausa mo, nanai khen ai nai aly by y; ati mana nai mo na baly ni ly chai y, nanai amny veng bo.
37 Na i py pathyp pi nai keung ly ang vawi am-oh y, mui panum nai kari niu iy, ang vawi tamo tha nai niu baly, huni khumi ai reita leaungsai y, chai bo napi ai nai tla.
38 Nangchi theung y neampacho, ti y baly neampachy i nganpeihra y kaleung lawp, kaleung lawp nai awm baly,
39 pathyp pi nai keung ly huni khumi ai khen ai nai tla. Angvawi kaleung hup-hau lawh baly, nganpeihra man thai nai buhuthi teu i, ni ly reita leaungsai y chai nai ne.
40-41 Neampacho, ti y baly neampachy i lu nithun mang i sam mo, mo mang i sam mo, amui lawh baly chai y, nanai tapi pajau y.
42 Na i py lu benglau naira y paleng rang nai ang vawi man lawh baly, huni ly ka-jei awm nai nganpeih no ang vawi ne.
43 Pathyp pi nai keung ly huni khumi ai khen pi nai khala, ang vawi ly paleng rang nai niu lawh baly,
44 pathyp pi nai keung my ni ai chai y napi ai nai tla. Ati mana nai mo na baly ni i lu tleaung y man nai ly, ka-jei awm nai nganpeih no ang vawi ne lawh nai deaungkho y ne.
45 Ka-jei awm nai nganpeih no man nai khumi ly baichu kamawn amchiu ai nai tla, sam py aseu y naimy khai ai nai tla; meimai ka-hyhrei amym iy, “Kai ly chai y, chai y!” nanai aeu ai nai tla.
46 Ni i tlang tleaung y huni no awm nai sala ryrei ly chai y nai deaungkho y khumichi hawi palo nai, tai naira angam mang y awm ai nai tla.
47 Beram mui ateaung, ti y baly kanih mai ka-syn ateaung mo,
48 beram mui kanih mo, ti y baly kanih mai ka-syn kanih nganra y mo, mawi peih, ti y baly mawi peih ateaungra y mo,
49 heng-a, ti y baly pasen jeaung nai kani-ei chawp lawh baly, kawibiu thai nai kani-eichi ne nai deaungkho y, huni ateaungchi ai pathyp pi nai keung teng y patei ai nai tla.
50 Naibaly pathyp pi nai keung ly khen iy huni ateaung ai ly kani saryhrei khai takhra ai nai tla.
51 Ni ly saryhrei kani y khen bi nai khala, kani-ei chawp nai nawi ryhryh lawh baly, huni ateaung ly chai y nai ne.
52 Huni kani-ei chawp nai ly angpreng thai nai ne nai deaungkho y, pathyp pi nai keung my huni ateaung ai mai y veang vui ai tla.
53 Na i py pathyp pi nai keung ly huni ateaung ai khen nai khala, kani-ei chawp nai nawi y lawh baly,
54 huni ateaung pasiu hai iy kani saryhrei khai takhra bi ai nai tla.
55 Huni bo y pathyp pi nai keung ly huni ateaung ai khen bi ai nai tla. Kani-ei chawp nai nawira y i py, an akheng vui y lawh baly, huni ateaung ly chai y nai ne. Huni ateaung theung mang py, salo mang py pyn nai niu baly, huni ai mai leng vui ai nai tla.
56 Na i py pathyp pi nai keung my khen taleang bi nai khala, kani-ei chawp nai mawi tlu nai niu baly, ateaung, ti y baly mawipeih ateaungra i, kani-ei chawp nai ly sei lawp vui ai nai tla.
57 Naibaly kani-ei chawp nai nawira lawh baly, kani-ei nawira nai deaungkho y, yhmkeung ly huni ateaung mai veang vui ai nai tla.
58 Ni ly huni ateaung pasiu nai khala y, kani-ei chawp nai tama baly, pasiu taleang bi ai nai tla. Naibaly huni ateaung ly reita leaungsai y chai ai.
59 Hini reita ly beram mui ateaung, ti y baly kanih mai ka-synra mo, mawipeih ateaungchira mo, kani-ei chawp nai i vui reita ne.