10
1 Aron i chapo Nadab hawi Abihu nini ly myni leaung leaungrei i vui mai-ai laawm la hawi iy, mai-ai khai chum baly mui katui phui naimy Areng teng y talam bo. Na i py huna nai talam ai nai Areng my pei y nai deaungkho y, huni mai ly mai kachai ny y.
2 Huna nai y tlenrei khyhmy Areng teng i mai kangveaung tla hai i, Areng i mo y mai my kang i dei hawi mei bo.
3 Huna nai khala Mosi my Aron teng y, “Areng my leu pei nai ly ‘Kai i kalop sa nai khumi bawibawichi ly kai i chai nai sai ai tahm khai u ai nai tla. Kai ly kaimy i khumichi teng y kai i nang parai nai sai amteng hai ai,’ nanai thui nai ly hina nai molam y leu ang pei nai ne,” napi. Na i py Aron ly ati sai py katheu y naimy awm bo.
4 Mosi ly Aron i amprang Uziela i chapo Elzaphan hawi Misaela nini ai palau i, nini teng y, “Nang ni i amjo amnau veu ly Tabynako theung i nai tai naira ngam mang y angjeaung hawi veng,” napi.
5 Naibaly nini ly Mosi my leu pei nai kamta veu y kiu hawi abi y ai nai kanih bam iy ryh hawi i, tai naira angam mang y patheu hawi vui bo.
6 Naibaly Mosi my Aron hawi ni i chapo Eleaza, Ithama nini teng y, “Nangni ly paleung si nai sai patei ai nai molam y sam aseu y nai awm moh, nangchi i baichuchi py sei u moh. Leu pei nai kamta so y lawh baly dei u ai; Areng my py Israela chengchi tlang tleaung y kado thau hai ai. Na i py nangni i amjo amnau Israela chengchi ai ly Areng teng i mai tla hai iy, dei nai khumi i vui paleung si nai sai patei pajau.
7 Nangni ai ly Areng i tahm palyn nai asitui leih iy khai takhra nai deaungkho y, nangni ly Tabynako katheu pa-kho i nai theu hawi moh, theu hawi lawh baly dei ai,’ napi. Naibaly nichi ly Mosi my leu pei nai kamta sa hawi bo.
8 Areng my Aron teng y,
9 “Nang hawi nang i chapochi ly kreip hang, ti y baly pavui nai amjy nei iy, kai i awmra Tabynako theung y kun u moh. Huna nai sa iy kun u lawh baly, dei u takengkei ai. Hini reita ly nang i kangpreang bawibawichi tangai u ai nai tla.
10 Nang ly Tameuh hawi amtawn abi nai mo, amtawn abi y nai mo, reita y chai nai mo, chai y nai mo, khawilang thai ai nai tla.
11 Mosi teng y kaimy pei nai reita ngiereichi ai, nangchi ly Israela chengchi teng y patiu pi ai nai tla,” napi.
12 Mosi ly Aron hawi ni teng y vai awm nai chapo Eleaza hawi Ithama nini teng y, “Areng teng y apathyp nai teicha teinei katalamra theung i kamlai tako dei hawi, angbo abawi y nai tako sa iy, maicham sahawi y cho u. Ati mana nai mo na baly hini kapathypra ly khri pa-rei chai nai ne.
13 Huni tako ly meingtym kachaira y cha ai nai tla. Huni tako ly Areng teng y talam nai katalamra theung i, nang hawi nang i chapochi i vui phy ne. Huni ly Areng my kai teng y ang pei nai reita ne.Ref 10:12-13 Lev 6:14-18
14 Na i py nang hawi nang i dengtheungchi ly pathyp pi nai keungchi i vui Areng teng y talam patyp nai amsei hawi phaichi ai reita y meingtym kachai ra y cha ai nai tla. Hini phychi ly Israela chengchi i leunghawi katalamrachi theung i, nang hawi nang i chapochi ai vui nai mawi phy ne.
15 Nichi ly Areng teng y tawnbawi thau talam nai khala, amsei hawi phaichi syn u ai nai tla. Areng my leu pei nai kamta, hini tawnbawi phy ly nang hawi nang i chapo chanauchi i vui ne,” napi.Ref 10:14-15 Lev 8:30-34
16 Naibaly Mosi ly kamngo pahen nai tawnbawi mi-i satang deng nai khala, leang patlum chum veng bo, nanai thai i, Eleaza hawi Ithama nini tlang tleaung y kado theu hai iy nini teng y,
17 “Nangchi ly ati mana nai y huni tawnbawi mawi ai meingtym kachaira cho u y lawh mo? Kamngo pahen nai katalamra ly talam patyp nai ne i, Areng my Israela chengchi i vui kamngo pahen pi ai nai molam, nangchi ai huni tawnbawi mawi kang pei nai ne. Ref 10:17 Lev 6:24-26
18 Tawnbawi thi ai Tabynako theung y jeu hai y lawh ly. Nangni ly kai i leu pei nai kamta, huni tawnbawi mawi ai Tabynako theung y cha ai nai tla,” napi.
19 Naibaly Aron my Mosi teng y, “Kai ly kamngo pahen nai kapathypra mawi ai vaini cha lawh baly, Areng my kawn pi na a? Israela chengchi ly Areng teng y vaini kamngo pahen nai kapathypra talam u bo. Na i py kai ly hini ka-jeira avum asai lawh ly” nanai pathang.
20 Mosi ly Aron i pathang nai leu thai baly paleung tuinem nai ne.