JEREMIA I TANGAM NAI LEU
1
Jerusalem mary i paleung mawn naichi
1 Vaichi khala y khumi neangneang kawi nanai Jerusalem mary ly mymy tlairei awm jo khyh na bo ly!
Vaichi khala ly khaileaung pri vereichi my, tahm pasang naira avum teu i py, vai ly neampachy lumai hawi atawm veng bo.
Mary leilachi theung y tahm awm keh nai mary ly miseaungra ang vum lawh bo.
2 Ni ly vumtorei vo naimy awm; meikatui ly my i tangbeng y leaung na bo.
Vaichi khala mymy i ahawi kamrawi bawibawichi theung y, ni ai awmnemra pei ai nai leaungrei py by y leang bo.
Ni i amsawi amnai asa naichi py, atakai vui veng bo. Vai ly nichi my ni ai paleung ka-e khai u.
3 Juda pri mipuichi ly pri pala naira avum iy, kajeaung kamangnote 1:3 kajeaung kamang; ti y baly yhm hlau by y nai, saleaung khuteng by y nai, amjo amnau by y nai.naira avum i, miseaung achei u bo.
Nichi ly yhm hlau meingtym amny y naimy, pri takhra y awm u nai ne.
Paleung ka-echi my katanmeuh nai y, tleaungra by y leang bo.
4 Khai takhra nai pawi neng kani khala, chiu sa ai nai Achura yhm y chei nai khumi py by y.
Achura yhm y khulym thui nai anglochi py, paleung si paleung mawn naimy awm u bo. Naibaly pathyp pi nai keungchi py, vo tangam nai ny y baly ati sai py so u thai y.
Mary katheuchi ly khumi savai angau na bo. Zion mary ly patang naira avum bo.
5 Ni i paleung ka-echi ly ni ai pajau i, nichi i peang nai anui y khai bo.
Ni ly kamngo neangneang sa tamang i, Areng ly ni i tlang tleaung y, ngari kamtang tym hai nai ne.
Ni i cho chanauchi ai ly patiu pawn iy, langheng hawi vui bo.
6 Jerusalem mary i sareaung hawi nai sai ly jangni deung i awm nai sai harei kamta lawh khyh bo.
Ni i lu sa nai keungchi ly musychi kiu i tleaung ai nai angpreng nai sisiuchi hawi atawm.
Nichi ly atho kheihvi na bo i, teicha tlai ai nai sui tlai naira hau pajau y na bo.
7 Vai ly phra vui bo i, ahawi by y leang bo. Jerusalem mary ly jangni deung y, my i apu nai saichi ai aawi ali teang nai ne.
Paleung ka-echi i kiu tleaung y tym nai thym khala, ni ai sabawm ai nai khumi leaungrei py by y.
Ni ai tiu i pajau nai khumichi ly ni i jy nai sai ai panui pachem hai bo.
8 Ni i tahm awm nai ly tama vui bo; ni ly tlang ka-keu hawi amso ngailai nai lawm bo.
Ni ly tangam i, kaji nai deaungkho y, my i meimai tamym bo.
Jerusalem mary ly hawi y keh nai kamngo sa nai deaungkho y, mymy ai mymy naimy chai hai y nai ne.
9 Ni i chai y nai sai niu hawihai pajau teu i py, ni ly my i avum nai khym taham ai dawndan y.
Ni i phra nai sai ly ka-jei hawi parai na. Ami my py awmnem naira pei pajau y.
Ni ai paleung ka-echi my pajau vui nai deaungkho y, ni ly pahen naira nga ai nai Areng teng y hnei takeng bo.
10 Paleung ka-echi ly ni i yhmtheaung katui bawibawichi ai lawm pi pawn vui bo.
Ni ly Areng my kun ai pei y nai Achura yhm theung y
huni khumichi kun nai nui.
11 Ni i khumichi ly teicha teinei hau naimy, kani tleirei tangam u bo.
Nichi ly mymychi heng ai nai yhmtheaung katuichi ai, teicha teinei hawi katheung u bo.
Huni mary my, “Aw Areng, kai ai khen kyh cha; kai i paleung mawn nai sai khen kyh ba,” nanai aeu naimy takeng bo.
12 Ni ly tengpang sahawi i aki aleaung nai khumi lutengchi teng y, “Kai ai khen u cham! Hina nai kamtang ly awm vai reng a?
Kai kamta patang nai ly leaungrei py by y leang.
Hini kamtang ly Areng my kado theu i, kai ai avum hai nai patangra ne.
13 “Mymy ly salo mang dengdairei mai pato i, huni mai ly kai i tlang tleaung y angveaung nai ne.
Mymy ly kai ai deaung pateung iy patiu i, khaileaung y patlym.
Naibaly ang khai su iy kani khengrei, patang naira avum hai bo.”
14 “Mymy ly kai i kamngo bawibawichi pany pi jo nai ne.
Hunichi ai pateungchup iy, kai i kaneaung y awi hai i, kai ly kamngo myn ji parai nai deaungkho y, atho bai na bo.
Areng ly kai ai paleung ka-echi teng y au bo; kaimy py nichi ai tlau teang pajau y.
15 “Areng ly kai ai asa hai nai, atho ham parai nai risa bawibawichi ai panui hai.
Mymy ly kai i thawndeangchi ai, tamyh pawn ai nai tavaimi kamkawm pato bo.
Mymy ly kai i khumichi ai kreip hang nip ra theung i kreip athaichi kamta, teih hai pui nai ne.”
16 “Hunai deaungkho y kai i meichira i, mei katuichi leaung bo.
Kai ai ami py awmnem naira pei pajau y. Ami py paleung atho ham pa-rei pei pajau y.
Paleung ka-echi ly kaichi ai ang pajau u vui bo. Kai i khumichi teng y py, yhmtheaung katui ati sai py by y leaung bo. ”
17 “Kai ly kaimy i kiuchi jaha teu i py, kai ai sabawm ai nai khumi leaungrei py by y.
Areng ly kai ai tiu ai nai, tengpang sahawi tleirei mang i paleung ka-echi ai palau bo.
Nichi ly kai ai amso ngailai ai nai hawi, nanai dawn u. ”
18 “Na i py Areng ly leu meitang adyh adawi nai ne. Kai ly mymy i leu pei nai tangai y.
Meingtym tleirei y awm nai khumichi awi, kai i leu tangai u; kai i patang nai khen u cham.
Kai i chapo thawndeangchi hawi chaniu anglochi ly langheng y hawi nai avum u bo. ”
19 “kai ly kaimy i amsawi amnaichi teng y kasabawmra hnei teu i py, nichi ly akhi u nai ne.
Pathyp pi nai keungchi hawi mary i lu sa nai keungchi ly
mymychi heng ai nai i vui y teicha teinei hau u nai thym y, lamchira y dei u bo. ”
20 “Aw Areng, Kai i paleung bi paleung mawn nai py,
kai i paleung phailo khri pa-rei patang naira avum nai py, khen cham.
Kai ly kaimy i kamngo nai molam y, paleung mawn nai ne.
Lam y khumi ai padei nai avum; yhm angtheung y py, deira avum nai bo.”
21 “Kai i tangam nai raawichi tangai pi ba. Kai ai awmnem naira pei pajau nai khumi leaungrei py by y.
Nang ly kai ai khri pa-rei ka-jeira avum hai nai deaungkho y, paleung ka-echi amo theu u nai ne.
Nangmy i leu adeu nai neng kani tym hai kyh ba. Paleung ka-echi i tlang tleaung y kai kamta, patang naira avum hai kyh ba.”
22 “Nichi ai mychi i hawi y nai cheaungkhang molam y pajeng kyh ba.
Kai ai kaimy i kamngo molam y nangmy parip nai kamta, nichi ai py parip kyh ba. Kai i paleung py ka-dawn hawi y na bo.”