4
Isu ai parawi nai
(Mt 4:1-11; Mk 1:12-13)
1 Naibaly Isu ly Phailo Kachai my kawi i, Jordan tavo dengdairei ali teang;
2 naibaly diabola my parawi nai tarawi y daichi ka-vym y Phailo my pahawi nai kani vui palyhrei awm. Naibaly hunai kha y ly mymy ly ati sai py cho y i, kangkhym y ly kajeu alam bo.
3 Naibaly diabola my ni teng y, “Nang ly Tameuh i Chapo ne nabaly hini lengseaung ly tako lawn ai nai leu pei bei,” napi.
4 Naibaly Isu my ni teng y, “Khumi ly tako harei khyh naira y ly heng y leang,’ nanai tajiu nai awm,” nanai pathang.Ref 4.4: Leu 8.3
5 Naibaly mymy ai pahawi kalau iy tlenrei khyh my khaileaung pri peang naira bawibawi patei.
6 Naibaly diabola my ni teng y, “Hini bawibawi tleaung y peang ai nai hawi, hunichi i nang naira py kang pei ai; kai teng y ang pei nai bo i, kaimy i ngai nai ngiereichi teng y kapei reng.
7 Hunaibaly nang ly kai ai chiu baly, hini bawibawi nang i ne bebe ai,” napi.
8 Naibaly Isu my ni teng y, “Nang i Areng Tameuh ai phai chiu ly, mymy i kalop harei phai so khyh,‘ nanai tajiu nai awm,” nanai pathang bi.Ref 4.8: Leu 6.13
9 Naibaly mymy ly ni ai Jerusalem y pahawi iy, achura yhm kalen pui saleung kamsui y angdo hai i ni teng y, “Nang ly Tameuh i Chapo ne nabaly, hi i dengdairei tabo kathiu;
10 ‘Nangmy ai typ ai nai nang i mo y molam y
mymy kani pri i amtaw thau naichi
ai leu ang pei ai,’ nanai hawi. Ref 4:10: Sam Sam 91: 11
11 ‘Nichi i kiu y nang ai dawmkhawn ai,
Ti y baly nang i kheu ly lengseaung y thip lawh na,’ nanai py tajiu nai awm lawh,” napi. Ref 4:11: Sam 91: 12
12 Isu my ni teng y, “Nang i Areng Tameuh ai ly cham moh,’ nanai awm na a,” nanai pathang bi.Ref 4.12: Leu 6.16
13 Hunaibaly diabola ly ni ai cheaungkhangra y parawi pajau baly avo nai neng ajeng ai nai tako vui bo.
Isu ly Kalili pri y kalop sa amteaung nai
(Mt 4:12-17; Mk 1:14-15)
14 Naibaly Isu ly Phailo i sa thai naira apu iy Kalili pri y vawi ali teang: naibaly ni i satang ly huni pri tengrang meingtym tleirei y amthang.
15 Naibaly mymy ly nichi i achura yhm takhra takhra y leu patiu i, khumi bawibawi my ni ai palo.
Isu ai Nazaret my ngai y nai
(Mt 13:53-58; Mk 6:1-6)
16 Naibaly ni ly mymy i tleaungri aveang nai Nazaret avang y tym: naibaly mymy i sa reng nai kamta Anawn Kani y achura yhm y kun iy, phain ai nai angdo.
17 Naibaly amo Isaia i cha-iu ly mymy teng y pei. Naibaly cha-iu aeang lam iy, hini tajiu naira i nai vawi i,
18 “Khumi kamawnchi teng y Satang Kahawi thui ai naiRef 4.18–19: Is 61.1–2
ang khai takhra nai deaungkho y,
Areng i Phailo ly kai i tlang tleaung y awm;
Miseaungchi teng y alaw hai ai nai leu hawi,
Mei kamjuchi teng y mei angvang teang ai nai leu thui
ai nai py,
Ana patang naichi ai patheu ai nai py,
19 Areng i avo nai saneng i satang thui ai nai py ang
pato nai ne, ‘nanai he,’ napi
20 Naibaly mymy ly cha-iu taeang iy kalop sa nai keung teng y pei ali teang i ateh bo. Naibaly achura yhm i khumi bawibawichi ly ni ai khen ripati na.
21 Naibaly mymy ly nichi teng y, “Hini Tameuh i cha-iu leu sai ly vaini nangchi i kano y thai hai angym bo,” nanai thui amteaung.
22 Naibaly nichi bawibawi ly mymy ai kawn iy ni i labeaung i theu nai tamen nai leu ly lyh parai na i, “Hini khumi ly Josepha i chapo ny y lawh kha? ” napi.
23 Naibaly ni my ly nichi teng y, “Nangchi ly, ‘Daitang awi, nangmy ai hawi aso ba: Kapernaum avang y nang i atiti sa nai kaichi thai nai ngierei ly hi y nangmy i meingtym y py so ba,‘ nanai pata nai leu ly thui pi thlethle ai ngaw khyh,” napi.
24 Naibaly mymy ly, “Meitang khyp kang thui pi, amo ami ai py amy i avang my kawn vai y leang.Ref 4.24: Jh 4.44
25 Meitang khyp kang thui pi, Elija awm khala ly saneng thomlo tariurei kani amdeng iy, pri y khrikhri pa-rei takang theu i, Israela pri y neampachy lumai neangneang awm;Ref 4.25: 1 Ar 17.1
26 na i py nichi theung i nai ami teng y py Elija ai pato y, Sidon pri mang y Sarepta avang y neampachy lumai leaungrei teng y naini pato khyh.Ref 4.26: 1 Ar 17.8–16
27 Naibaly amo Elisa awm khala py Israela pri y keaungsi man nai khumi neangneang awm; na i py nichi theung i nai ami ai py pachai y: Naaman, Suria pri i khumi leaungrei ai naini pachai khyh,” napi.Ref 4.27: 2 Ar 5.1–14
28 Naibaly achura yhm i khumi bawibawichi ly huni leu thai baly khrikhri pa-rei kado theu,
29 naibaly angthau pawn iy avang i dengdairei ni ai patheu i, mymy ai aphi vui ai nai nichi avang i tangam peang mang y pahawi.
30 Na i py ni ly mymychi i sala y tako prei i, tako joja ryp.
Vawinam aso y naimy nam nai khumi leaungrei
(Mk 1:21-28)
31 Naibaly mymy ly Kalili pri y avang harei Kapernaum y chei kathiu i, Anawn Kani y nichi ai leu patiu.
32 Naibaly mymy ly phom awm parai naimy leu thui nai deaungkho y nichi ly mymy i leu patiu nai ly lyh parai.Ref 4.32: Mt 7.28–29
33 Naibaly achura yhm y ly vawinam my nam nai khumi leaungrei awm i, ni ly tao pajeng parai pa-rei my,
34 “Aw, Nazaret Isu awi, kaichi hawi nang hawi ati amtawm mo? Nang ly kaichi ai tama hai ai nai jeu nai a? Nang ai ly kai pany mang, Tameuh i Khumi Kachai ne,” nanai aeu.
35 Naibaly Isu my ni ai jo i, “Katheu moh, ni i taku theung i nai theu jau,” napi. Naibaly vawinam ly ni ai sala y atlym hai chum iy, no hai y naimy ni i taku theung i nai theu.
36 Naibaly nichi bawibawi khri pa-rei lyh na i, “Hini ly ati leu mo? Phom awm parai nai hawi sa thai naira y py vawinamchi ai leu pei i theu u lawh ly,” nanai arum u.
37 Naibaly mymy i satang ly huni pri tengtang meingtym tleirei y amthang.
Isu my khumi kano neangneangchi ai hawi sa pi nai
(Mt 8:14-17; Mk 1:29-34)
38 Naibaly mymy ly angthau iy achura yhm i dengdairei theu i Simon i yhm y kun. Naibaly Simon i ampi ly khrikhri pa-rei keaung no na i, mymy teng y ni i vui takeng pi.
39 Naibaly mymy ly ni i ahawi y angdo iy no nai ai jo i, keaung no nai ly pra ryp bo, naibaly ni ly angthau praw i nichi ai kry.
40 Naibaly kani avah nai thym khala y no nai cheaungkhang no nai ngiereichi ai ni teng y pahawi u i, mymy ly nichi i tlang tleaung y kiu tamam bawibawi i hawi sa pi bebe.
41 Vawinamchi py, “Nang ly Tameuh i Chapo ne,” nanai aeu naimy khumi neangneangchi i taku theung i nai theu u. Naibaly mymy ly Krista ne, nanai nichi ly pany nai deaungkho y, ni my nichi ai jo i katheu ai nai pei y.
Isu ly tara charaichira y leu thui nai
42 Naibaly khutawi baly mymy ly theu i ka-vymra y chei; naibaly khumi mipuichi ly ni ai hau i ni teng y chei u teang iy, mymychi ai khai jo y ai nai patawn ai nai tau,
43 Na i py ni my ly nichi teng y, “Avang takhra y py Tameuh i peang nai Satang Kahawi kathui pi ai nai tla, huni molam y kai ai ang pato nai tang,” napi.
44 Hunaibaly ni ly Kalili pri y achura yhm takhra takhra y leu thui.