23
Isu ai Pilata teng y pahawi nai
(Mt 27:1-2, 11-14; Mk 15:1-5; Jh 18:28-38)
1 Naibaly achu naichi bawibawi ly angthau iy Isu ai Pilata teng y pahawi u.
2 Naibaly nichi ly, “Hini khumi ly kaichi i cheng ai taphra ai nai Kaisara teng y akeu cheaung ai nai py paka i, Krista, samrang amlawn, nanai kaichi pany ,” nanai seu amteaung bo.
3 Naibaly Pilata my ly ni teng y, “Nang ly Judachi i samrang ne a?” nanai deng.
Naibaly mymy ly ni teng y,”Nang ly thui khyp bo,” nanai pathang.
4 Naibaly Pilata my ly pathyp pi nai keung kalenchi hawi, khumi mipuichi teng y ly, “Hini khumi i tlang tleaung y ly ati sai py hawi y naira kaniu y leang,” napi.
5 Na i py nichi my ly, “Ni ly Kalili pri y amteaung iy, hini meingtym y tym pa-rei Judai pri verei y patiu i, khumi bawibawichi ai khrukhra hai,” napi nai ty ra.
Isu ai Heroda teng y tha nai
6 Naibaly Pilata ly hina nai thai iy, ni ly Kalili pri i khumi ne mo, ny y mo, nanai deng.
7 Hunaibaly Heroda i ka-peang i khumi ne, nanai pany i Heroda teng y pato bo; hunai thym khala y ly ni py Jerusalem y awm teang.
8 Naibaly Heroda my Isu ai niu baly khrikhri kawn na, mymy i satang thai nai deaungkho y kra parai nai dengdairei mymy ai niu ai nai ngai parai jojo, atiti mo sairei rengrang sa nai niu ai nai athang khai.
9 Naibaly mymy ly leu neangneang deng, na i py ni ly ati sai py pathang y.
10 Naibaly pathyp pi nai keung kalenchi hawi, Reita patiu nai keungchi ly angdo iy khrikhri pa-rei seu bi.
11 Naibaly Heroda hawi my i tavaimichi ly ni ai tahm khai y i panui hai: naibaly kanih vang kateng akhiu hai iy Pilata teng y pato bi bo.
12 Naibaly huni kani y ly Heroda nini Pilata ly ado bo, ti y rai khala y ly ado y.
Isu ai padei ai nai leu pacheang nai
(Mt 27:15-26; Mk 15:6-15; Jh 18:39-19:16)
13 Naibaly Pilata ly pathyp pi nai keung kalenchi hawi, miteaung kehchi hawi, khumi bawibawichi ai palau achu i nichi teng y,
14 “Khumichi ai taphra piupa nanai, hini khumi ai ly kai teng y nangchi my tha nai he, naibaly khen cham,nangchi i mo y kaimy ni ai chih i, nangchi i seu naira y ly hini khumi i tlang tleaung y ati sai py tamang naira kaniu y leang.
15 Ne, Heroda py niu y leang, kaichi teng y ang pato lawh bi nai teu; khen cham, dei ai nai ataing na pa-rei ati sai py so y leang.
16 Hunaibaly kaimy chip ai i patheu ai,” napi.
17 [Mymy ly pawi kani y ly theaung y tla nai leaungrei ai patheu ai nai tla.]
18 Na i py tlenrei khyh my vanrei aeu i, “Hini khumi ai lo la, Barabba ai phai patheu pi,” napi.
19 (Ni ly avang y ati mo damra sa nai deaungkho y hawi,khumi ai padei nai deaungkho y theaung y tla bo.)
20 Pilata my ly Isu ai patheu ai nai ngai i mymychi teng y leu thui bi, na i py nichi ly aeu u i,
21 “Kraws tleaung y tahen,kraws tleaung y tahen,” napi.
22 Naibaly ni my ly tlen thomrei naira y ly nichi teng y, “Ati na i bo? Ati tamang naira awm mo? Dei ai ataing na pa-rei mymy i tlang tleaung y ati sai py kaniu y be: hunaibaly ni ai chip iy patheu ai bo,” napi.
23 Na i py nichi my ly athorei my kraws tleaung y tahen ai nai takeng tanga. Naibaly nichi raawi my pajau bo.
24 Naibaly Pilata my ly nichi i hnei nai kamta sa ai nai leu patlym bo.
25 Naibaly damra sa nai hawi, khumi ai padei nai deaungkho y theaung y tla nai ai ly mymychi i hnei nai kamta patheu pi bo; na i py Isu ai ly mymychi ngaingai ana ai nai au bo.
Isu ai kraws tleaung y tahen nai
(Mt 27:32-44; Mk 15:21-32; Jh 19:17-27)
26 Naibaly nichi ly ni ai pahawi nai thym khala y Simon, Kurini avang i khumi, daichi mang i dengdairei jeu nai ai patiu i, Isu i nithun mang y tako iy apu pi ai nai, mymy i tlang tleaung y kraws neang bo.
27 Naibaly khumi mipui ka-teng ny y nai hawi, neampachychi paleung y atum iy vo ryry naichi hawi ni teng y abang.
28 Na i py Isu my ly nichi mang y hi iy, “Jerusalem chaniuchi awi, kai ai vo hai y han, nangmychi ai hawi, nangchi i chanauchi i vui phai vo hai u.
29 Khen cham, neng tym ai i, huni kani y ly, ‘Neampachy teng naichi hawi, deaungdi aneng vai y nai kajeuchi hawi, deaungdi nei vai y nai kanuchi ly tahm hawi,’ napi ai.
30 Hunai khala y ly nichi ly mawi ka-sangchi teng y, ‘Kaichi ai akai hai mawp kyh,’ naibaly mawichi teng y, ‘Kaichi ai tleng hai mawp kyh,’ napi ai.Ref 23.30: Hos 10.8; Amt 6.16
31 Dengkeaung kangheng ai malawn py hina tanrei sa baly, kadei ai ipsaly mana tanrei sa ai mo?” napi.
32 Naibaly mymy hawi vanrei padei ai nai takhra leaung nyhrei ai pahawi teang:nini ly khumi kamngo ne.
33 Naibaly Lu Hiu napi nai meingtym y tym i, hu y ly mymy ai kraws tleaung y tahen; khumi kamngo nini ai ly lamtang mang y leaungrei, langvawi mang y leaungrei tahen teang.
34 Naibaly Isu ly, “Ngaai nichi ai ly pahen ba, nichi i atiti sa nai ly pany y nai teu,” napi. Naibaly ni i ateaungchi ly amji ai nai tambe va.Ref 23.34: Sam 22.18
35 Naibaly khumi mipuichi ly angdo iy angdeang. Naibaly miteaung kehchi my py, “Ni ly khumi takhrachi ai malawn py palawi chy bo; Tameuh i vawi nai Krista ne khyp baly amy ai py apalawi sy bei,” nanai panui hai.Ref 23.35: Sam 22.7
36 Naibaly tavaimichi my py panui hai i mymy teng y chei iy, kreip athai hang katho talam pi i,Ref 23.36: Sam 69.21
37 “Nang ly Judachi i Samrang ne khyp baly apalawi bei,” napi.
38 Naibaly mymy i salo mang y ly, “Hini khumi ly Judachi i Samrang ne,” nanai cha awm.
39 Naibaly khumi kamngo tahen nai leaungrei my ly, “Nang ly Krista ny y a? Apalawi ly, kaini ai py palawi bei,” nanai ni ai panui hai.
40 Na i py takhra leaungrei my ly pathang i,“Nang ly Tameuh ai py jei y nai sai a? Vanrei ngari ang pei nai ly?
41 Na i py ani ly ataing khyp, amyni i hawi y sa nai vang nga nai teu; na i py hini khumi ly ati sa py hawi y sa nai by y,” nanai ni ai jo.
42 Naibaly mymy ly “Isu nangmy i peang naira y nang tym khala y kai ai pany jo ba,” napi.
43 Naibaly ni my ly mymy teng y “Meitang khyp kang thui pi, vaini ly nang py kai teng y Paradais y awm teang ai mang,” napi.
Isu i dei nai
(Mt 27:45-56; Mk 15:33-41; Jh 19:28-30)
44 Naibaly kanithun kha y mo, kani ka-reu khala y khrairei pri veng be i, kani kangvang jum bo.
45 Naibaly achura yhm kalen pui i kanih jang nai ly sala y asei kra vui bo.Ref 23.45: Theu 26.31–33
46 Naibaly Isu ly tao pajeng parai naimy aeu i, “Ngaai, nang i kiu y kai i phailo kang au ba,” napi. Naibaly huna nai thui pajau iy mymy i phailo patlaw bo.Ref 23.46: Sam 31.5
47 Naibaly tavaimi chungvairei lu ly huna naichi niu i, “Hini khumi ly khumi kahawi ne khyp nai bo, lawi pajau y,” nanai Tameuh ai palo ryp.
48 Naibaly huni atiti khen ai nai khumi mipui achu nai bawibawichi ly huna nai sa naichi niu i, mymychi i paleung y atum ryry naimy vawi ali teang bo.
49 Naibaly mymy i meimai pany naichi bawibawi hawi, Kalili pri i dengdairei abang nai neampachychi ly huna nai sa naichi angdeang nai kamlo parai ra y angdo.Ref 23.49: Lk 8.2–3
Isu ai up nai
(Mt 27:57-61; Mk 15:42-47; Jh 19:38-42)
50 Naibaly khen cham, khumi leaungrei amyn ly Josepha, tara chih nai keung, khumi meitang hawi khumi kahawi awm.
51 (Mymychi i tara chih nai hawi atiti sa nai py avo tapi y nai bo.) Judachi i avang Arimathai i khumi ne, Tameuh i peang nai ly tym ai nai athang khai reng nai ne.
52 Huni khumi ly Pilata teng y chei iy Isu i veu hnei i,
53 la iy kanih mai ka-syn hawi kajawi iy, lengseaung takeu nai angawm, ami ai py up vai y naira y up bo.
54 Naibaly huni kani ly Sa Rym Nai Kani ne, Anawn Kani py kasa parai veng bo.
55 Naibaly Kalili pri i dengdairei mymy hawi vanrei jeu nai neampachychi ly hui jojo i, angawm hawiveu up nai sai niu u.
56 Naibaly vawi u teang iy, atiti mui hawi nai amjychi hawi, rimuichi py sa u rym. Reita kamta anawn kani y kalop so u y nai ne.Ref 23.56: Theu 20.10; Leu 5.14