21
Neampachy lumai i talam nai
(Mk 12:41-44)
1 Naibaly mymy ly angdeang i khumi kanangchi my ly khai achu naira y mymychi atiti pei pala nai thym khala y niu.
2 Naibaly neampachy lumai kamawn teichy ami mo pia nyhrei pala nai py niu.
3 Hunaibaly mymy ly, “Meitang khyp kang thui pi, hinichi bawibawi tleaung y py hini neampachy lumai kamawn teichy i pala nai nawi keh.
4 Hunichi bawibawi ly pasym nai theung i kamlai talam nai ne; hini naini asawi aem nai theung i apacho ai naira bawibawi pala keih na ly,” napi.
Isu my Acgura yhm taphra ai nai molam thui pi nai
(Mt 24:1-2; Mk 13:1-2)
5 Naibaly amichi mo achura yhm kalen pui i lengseaung hawi parai nai hawi, atiti pei achu iy ka-pu palum nai sai thui nai thym khala y ni my ly,
6 “Nangchi i hini atiti niu nai ly panawi y nai lengseaung tleangleang nai ly hi y ha py awm ai ny y; huna nai kani tym ai,” napi.
Ngari akmtangchi hawi ana patheng naichi
(Mt 24:3-14; Mk 13:3-13)
7 Naibaly nichi my ly mymy teng y, “Sara, huni atitichi ly mana khala y tym ai mo? Huni atitichi tym ai nai kasa khala y ly ka-ma-ra ati awm ai mo?” nanai deng.
8 Naibaly ni my ly,“Nangchi ai ang tapawp y ai nai tau tleaung y awm u; ati mana nai mo na balykhumi neangneangchi my, ‘Kai ne he,’ ‘Neng ang tym bo,’ nanai kai i amyn angam nai ang jeu ai; nichi teng y ly abang u moh.
9 Naibaly atiu nai leu hawi, khrukhrala nai satang nangchi thai nai khala y ly jei u moh: hunichi ly tym man ai nai angchi yb teu, tem ai naira naini tym ryp ai nai ny y leang rai,” napi.
10 Naibaly mymy ly nichi teng y, “Cheng takhra hawi cheng takhra atiu ai i, pri takhra hawi pri takhra atiu ai.
11 Kaleih py khri pa-rei theu ryry ai i, meingtym takhra takhra y takang py theu ai, no nai michi py aki ai, kani mang i dengdairei atiti ka-jei awm naichi hawi ka-ma-ra lyh parai tlai naichi py awm ai.
12 Na i py huni atiti bawibawi tym y rai khala y nangchi ai ang patiu ai i, achura yhm y hawi, theaung y py ang hawi ai, kaimy i amyn deaungkho y samrangchi hawi miteaung kehchi i mo y ang hawi ai.
13 Huni ly nangchi ai eaung naira nga hai ai.
14 Naibaly nangchi i tlau ai nai leu dawn u rym y ai nai, nangchi i paleung hawihai khaw u.Ref 21.14–15: Lk 12.11–12
15 Nangchi i paleung ka-e bawibawichi my paka iy ei thai y ai nai, labeaung hawi cheng naira kang pei ai.
16 Naibaly ngamhm ngampochi, misochi, ahawichi my py ang patiu hai ai i, nangchi theung y phyreichi ai ly ang padei hai ai.
17 Kaimy i amyn deaungkho y khumi bawibawichi my nangchi ai niu ngai y ai.
18 Na i py nangchi i sam amairei py tamo y leang mang.
19 Nangchi i kham pajau naira my ly nangchi i hengra ai ly lawi hai ai.
Isu my Jerusalem phra ai nai thui pi nai
(Mt 24:15-21; Mk 13:14-19)
20 “Na i py nangchi ly tavaimichi my Jerusalem avang y katanmeuh nai niu khala ly, huni ly tama ai bo, nanai pany u.
21 Huna nai khala y ly Judai pri i kaawmchi ly mawi y preang u pawn sy; huni theung y awm naichi py theu u pawn sy; daichi y awm naichi ly huni theung y kun u moh sy.
22 Satang tajiu nai bawibawi ly tym thai ai nai, huni kani ly vawitheung tha nai kani ne.Ref 21.22: Hos 9.7
23 Huni kani y ly khaileaung pri y khrikhri pa-rei kamtang tym ai nai hawi, hini chengchi i tlang tleaung y kado theu nai tym ai nai deaungkho y py, deaungdi aniu naichi hawi deaungdi kanu kanei naichi ly taham si ai.
24 Naibaly nichi ly haisau bo y dei ai i, cheng cheaungkhangchi teng y miseaung y hawi ai; naibaly Cheng Takhrachii neng angym y ryrei ly Cheng Takhrachi my Jerusalem ai ly chiu nai tli ai.
Khumi i Chapo angjeu bi ai nai
(Mt 24:29-31; Mk 13:24-27)
25 Naibaly kanito y py, lo y py ka-si y py ka-ma-ra awm ai, pangli tui kamsau hawi, tui sampyh len nai deaungkho y khaileaung pri y py cheng cheaungkhangchi teng y patang naira hawi, paleung bi naira py tym ai;Ref 21.25: Is 13.10; Ezek 32.7; Joel 2.31; Amt 6.12–13
26 khumichi ly jei nai hawi, khaileaung pri y atiti tym ai nai dawn nai deaungkho y dei vi dei vi ai; kani mang i atiti sa thai nairachi ai py ang hyn hai ai.
27 Huna nai khala y ly Khumi i Chapo ly atiti sa thai naira hawi, khri pa-rei nang parai naira hawi khupanym theung y jeu nai niu u ai.Ref 21.27: Dan 7.13; Amt 1.7
28 Naibaly hina nai atitichi tym angchei nai khala y ly khen u kalau ly, angdeang u, ati mana nai mo nabaly nangchi ai atleu ai naira ly kasa nai bo,” napi.
Thaidu keung y amtiu naira
(Mt 24:32-35; Mk 13:28-31)
29 Naibaly mymy ly nichi teng y pata nai leu thui i, “Thaidu keung hawi, dengkeaung bawibawi ai khen u;
30 sai ang pho bo nabaly huni ly nangchi niu i nisa theu ai bo, nanai nangmychi my pany.
31 Hunai kamta teang, nangchi py hina naichi tym nai niu khala y ly Tameuh i peang nai ly kasa bo, nanai pany u.
32 Meitang khyp kang thui pi, hinichi bawibawi tym angym y ryrei ly vai deung i kangthauchi ly tamo y ai.
33 Kani khaileaung ly tama ai i, kai i leu ly tamo y ai.
Tau tleaung y awm ai nai
34 “Na i py tau tleaung y awm u,ti y baly cha nai kajeu kawi ala nai hawi, mhm pavui nai hawi, heng nai sala y awm nai sai dawn nai hawi nangchi i paleung y kawi ala ai i, huni kani y ly deaung man nai kamta tlenrei khyh my nangchi i tlang tleaung y tym miu lawh na.
35 Hunai kamta khyp khaileaung tleaung i awm nai bawibawichi teng y ly tym ai.
36 “Hunaibaly huni atiti tym ai nai bawibawi ly nangchi lawi ai ataing ai nai hawi, Khumi i Chapo i mo y angdo ai ataing ai nai py, mana khala y py chiu sa nai tarawi y ajeng u paryp,” napi.
37 Naibaly mymy ly kani tleirei achura yhm kalen pui y patiu iy, vum tleirei theu i Olive mawi napi naira y jei.Ref 21.37: Lk 19.47
38 Naibaly mymy i leu tangai ai nai khumi bawibawichi ly khawn angthodyh y achura yhm kalen pui y ni teng y chei reng.