17
Israela samrang Hosea
1 Juda samrang Ahaz i peang nai saneng holai nyhrei saneng y, Ela i chapo Hosea ly Israela samrang y lyn i, Samari mary y saneng takawrei peang nai ne.
2 Ni ly Areng i tlang tleaung y kamngo sa. Na i py ni ny y rai khala i Israela samrangchi tanrei ly tamang y nai ne.
3 Asuria empara samrang Shalmaneser my tavai tiu nai khala, Hosea ly tavai sum nai deaungkho y saneng tleirei kahm pei ai nai tla.
4 Na i py sanengrei khala y Hosea ly Aikupta samrang so teng y; savaichi pato iy kasabawmra hnei chum baly, Asuria pri y kahm pei y naimy awm vui bo. Huna nai satang ly Shalmaneser my thai nai khala, Hosea ai patiu iy theaung u khai hai nai ne.
Samari mary jum nai
5 Naibaly Shalmaneser ly Israela pri theung y kun iy, Samari mary y katanmeuh bo. Saneng thomrei bo y
6 Hosea my peang nai saneng takawrei nai khala y, Asuria empara samrang ly Samari mary ai peang vui iy, Israela chengchi ai Asuria pri mang y langheng hawi vui bo. Hunichi theung i phyreichi ai ly Halah mary theung y khai; phyreichi ai ly Kozan ka-peang Habor tavo sahawi y khai, phyreichi ai ly Media pri i marychira y khai nai ne.
7 Samari mary jum nai ly Israela chengchi mymychi ai Aikupta samrang kiu i nai atleu iy, Aikupta pri i dengdairei pahawi nai mymychi i Areng Tameuh i tlang tleaung y kamngo sa u nai deaungkho y ne. Nichi ly tameuh takhrachi teng y chiu u lawh.
8 Areng i khumichi amsa u nai thym khala, mymy patheu pi pawn nai khumichi i reitachi mang y abang u bo. Israela samrangchi i sa manme nai reitachi sa patawm u.
9 Israela chengchi ly mymychi i Areng Tameuh i kangai so u y; nichi ly mychi i theang keh nai avangchi dengdairei len keh nai marychi khrairei, huni meingtymchi ra y myn chiu nai meingtymchi sa u nai ne.
10 Mawi aheung bawibawichi ra py, ka-khui hawi nai dengkeaung keung bawibawichi anui y py, leungcheng salengchi hawi Aser tameuh nu i tamkhawnchi khai u.Ref 17.10: 1 Areng 14:23
11 Naibaly nichi ly Kanan pri i dengdairei Areng my patheu pi pawn nai khumichi i reitachi mang y abang u iy, mynchi teng y talam nai maichamchi salo y rimuichi patawi u bo. Nichi ly mymychi i hawi y naira sa naichi hawimy, Areng ai kado patheu u.
12 Mynchi teng y chiu u moh, nanai Areng i leu pei nai ly tangai u y nai ne.
13 Areng ly mymy i amtaw thauchi hawi amochi ai pato iy, Juda chengchi hawi Israela chengchi teng y pany hai bo. Mymy ly “Nangchi ly nangmychi i hawi y sa naichi khai u su jau; nangmychi i amsi pajochi hawi kai i miseaung amochi dengdairei, nangchi teng y kaimy pei nai reita theung y abawi nai kai i leu tangai u,” napi.
14 Na i py nichi ly tangai pi y; mymychi i Areng Tameuh ai ym y nai amsi pajochi kamta, paleung kyh chawn u bo.
15 Nichi ly mymy i leu pei nai tangai u y; mymy hawi amsi pajochi asa nai leu maikawm ai py patawm u y. Mymy i pany hai nai leuchi ai py dawndan u y. Nichi ly ati sai py ny y naichi ai chiu u iy, nichi py ati sai py ny y nai khumichi lawm u bo. Tengpang sahawi i khumichi sa nai kamta, so u y ai nai, Areng i leu pei nai tangai u y naimy, huni khumichi i reita mang y abang u nai ne.
16 Nichi ly mychi i Areng Tameuh i Reita bawibawichi taphra u iy, chiu ai nai sikatai myn nyhrei sa u. Nichi ly Aser tameuh nu myn py sa u; ka-si taukichi py chiu u iy, bala tameuh ai py chiu u bo. Ref 17.16: 1 Areng 12:28
17 Nichi ly mychi i cho chanauchi ai mynchi teng y apathyp u. Nichi ly vawinam pakun kawp naichi, leung kawp naichi teng y deng u iy, Areng i mo y hawi y nai kalopchi naini sa u nai deaungkho y, mymy ai kado patheu u nai ne.Ref 17.17: Leu thui 18:10
18 Areng ly Israela cheng ne nai khumichi ai kado theu hai nai deaungkho y, mymy mei ka-niu i nai patheu vui nai ne. Juda pri naini khai khyh bo.
19 Na i py Juda khumichi malawn py, Areng Tameuh i reita leu pei naichi tangai u y; nichi ly Israela khumichi i sa nai reitachi naini amtiu u.
20 Areng ly Israela cheng bawibawichi ai khai su bo. Nichi ai mymy mei ka-niu i nai patheu vui iy, ana pumpi nai paleung ka-echi kiu y au nanai pa-rei pajeng bo.
21 Israelachi ai Judachi theung i nai Areng my patheu vui nai khala y, Israela chengchi ly Neba i chapo Jeroboam ai mymychi i samrang y palyn u. Jeroboam ly Areng ai khai su ai nai py, ka-jei hawi parai nai kamngochi sa ai nai py lam patei pi nai ne.
22 Nichi ly Jeroboam i sa nai amtiu u iy, ni i sa nai kamngochi sa u bo.
23 Naibaly Areng ly nichi ai, mymy i miseaung amochi dengdairei pany hai nai leu pei nai kamta, mymy mei ka-niu i nai patheu vui bo. Hunai deaungkho y Israela chengchi ly Asuria pri y pri pala nai avum u i, huni pri y vaini khrairei awm u nai ne.
Israela pri y Asuria khumichi khuteng sa nai
24 Asuria empara samrang ly Babulon mary, Kuth mary, Ivah mary, Hamath mary hawi Sepharvai marychi ra i khumichi ai ly pri pala naira avum nai Israela chengchi i marychi ra y awm hai bo. Nichi ly Samari pri marychi ai peang iy, hu y khuteng sa u nai ne.
25 Nichi hu y awm angchei nai khala y, Areng ai chiu u y; hunai deaungkho y mymy ly khrangsichi pato iy, khumi phyreichi ai kei hai bo.
26 Samari pri y awm u nai khumichi ly huni pri y typ nai tameuh mynchi i reita pany u y nai deaungkho y, tameuh my khrangsichi pato iy nichi ai kei hai nai ne, nanai Asuria empara samrang pany nai ne.
27 Hunai deaungkho y Asuria empara samrang my, “Huni pri i nai achi my patiu iy langheng hawi nai theung i, pathyp pi nai keung leaungrei ai pato teang sy. Khumichi ai huni pri typ nai tameuh i reita patiu pi ai nai, ni ly huni pri y vawi teang sy,” napi.
28 Hunai deaungkho y Samari mary i langheng hawi naichi theung y, pathyp pi nai keung leaungrei ly Bethela mary y awm iy, Areng ai mana chiu ai nai tla mo, nanai khumichi teng y patiu pi nai ne.
29 Na i py Samari mary y awm nai khumichi ly mymychi i vui mynchi sa iy, Israela chengchi i sa nai yhmchi ra y khai u bo. Huni khumichi ly amkawm iy, mymychi awm nai marychi ra y mynchi sa u.
30 Babulon mary i khumichi my Sukkoth Benoth tameuh mynchi py, Kuth mary i khumichi my Nerkala tameuh mynchi py, Hamath mary i khumichi my Asima tameuh mynchi py,
31 Ivah mary i khumichi my Nibhaza hawi Tartak tameuh mynchi py sa u nai ne. Sepharvai mary i khumichi ly Adramele hawi Anamile tameuhchi teng y, mymychi i cho chanauchi ai leng patlum nai kapathypra palawn iy talam u bo.
32 Huni khumichi ly Areng ai py chiu u iy, mynchi ai chiu nai meingtymchi ra y pathyp pi nai keung sa ai nai hawi apathyp ai nai molam, mymychi theung i khumichi ai vawi takhra u nai ne.
33 Hunai deaungkho y nichi ly Areng ai chiu u i py, mymychi vaichi khala y awm nai prichi i reita kamta, huni tameuhchi ai py chiu u bo.
34 Nichi ly mymychi i reita kangngymchi ai, vaini khrairei teang u bo. Nichi ly Areng ai py tahm khai u y; nichi ly Israela, nanai amyn pathi nai Jakob i katu chanauchi teng y, mymy i pei nai reitachi hawi leu pei naichi py tangai u y.Ref 17.34: Atiti32.28, 35:10
35 Areng ly nichi hawi leu maikawm asa iy, “Nangchi ly tameuh takhrachi ai chiu u moh; nichi mo y lu meung u moh; nichi i kalop py so u moh. Nichi teng y kapathyprachi py talam u moh.Ref 17.35: Theu 20:5; Leu 5:9
36 Nangchi ly nangmychi ai sa thai naira len parai nai hawimy, Aikupta pri i dengdairei kang pahawi nai keung kai, Areng i leu tangai u; nangchi ly kai ai lu meung naimy kapathyprachi talam u. Ref 17.36: Leu 6:13
37 Nangchi i vui kaimy tajiu pi nai reitachi hawi leu pei naichi tangai u jojo ai nai tla. Nangchi ly tameuh takhrachi i leu tangai u moh.
38 Nangchi hawi asa nai leu maikawm ai tami u moh.
39 Nangchi i Tameuh, kai Areng i leu tangai u ai nai tla. Kai py nangchi ai paleung ka-echi kiu i nai atleu ai,” napi.
40 Na i py nichi ly tangai y naimy, mymychi i reita kangngym y naini teaung u jojo nai ne.
41 Hunai deaungkho y nichi ly Areng ai chiu u teu i py, mymychi i mynchi py chiu u. Nichi i katu chanauchi py vaini khrairei, hunai kamta sa u jojo nai ne.