12
Juda samrang Joasa
(2 Neng 24:1-16)
1 Israela samrang Jehu i peang nai saneng saryhrei awm nai khala y, Joasa ly Juda samrang lawm i, ni ly Jerusalem mary y saneng vui palyhrei peang nai ne. Ni i amhm ly Beraseba mary i Zibia ne.
2 Ni ly pathyp pi nai keung Jehojada my thui parip nai deaungkho y, mymy deungrei Areng i kangaichi sa.
3 Na i py myn chiu nai meingtymchi ai ly taphra y nai deaungkho y, khumi mipuichi ly huni meingtymchira y apathyp iy, rimui patawi u rai nai ne.
4 Joasa ly pathyp pi nai keungchi ai palau iy, Achura yhm theung y apathyp nai khala nga nai tangkachi, tawnbawichi i vui y pei nai tangkachi hawi paleung ngai parai naimy talam nai tangkachi ai, pateung achu ai nai leu pei. Ref 12.4: Theu 30:11-16
5 Pathyp pi nai keung bawibawichi ly mychi pathyp naira i nga nai tangkachi hawi, Achura yhm palum naira y, aly ngai nai kamta teaung u bo.
6 Na i py Joasa i peang nai saneng 23 tym nai ryrei, pathyp pi nai keungchi ly Achura yhm y mani sa palum nai py so y rai nai ne.
7 Hunai deaungkho y ni ly Jehojada hawi pathyp pi nai keung phyreichi ai palau i nichi teng y, “Nangchi ly ati mana nai y Achura yhm palum y naimy awm u lawh mo? Nangchi ly vai i dengdairei nangmychi i nga nai tangkachi pateung u moh. Achura yhm palum ai nai i vui y au ai nai tla,” napi.
8 Pathyp pi nai keungchi py tangka au ai nai hawi, Achura yhm palum naira y amtu y ai nai ngai angym u bo.
9 Naibaly Jehojada ly tengta harei la iy khymra y kho sa i, Achura yhm katheu pa-kho lamtang mang i maicham sahawi y khai bo. Achura yhm katheu pa-khora y kalop tla nai pathyp pi nai keungchi ly chiu sa ai nai jeu nai khumichi i talam nai tangka bawibawichi la achu iy, tengta theung y khai u nai ne.
10 Tengta theung y tangka nawi bo nabaly, samrang i tangka kry nai keung hawi, pathyp pi nai keung kalen keh, nini chei hawi iy tangkachi patlawn i neh hawi bo.
11 Nini ly tangka kaji vuikanai kati hawi chum baly, Achura yhm palum nai kalopra lu sa nai keungchi teng y au hawi nai ne. Naibaly lu sa nai keungchi ly huni tangka ai lasama,
12 iusai kakawp hawi lengseaung si kawp naichi ai vang pei ai nai py, sa palum naira y ngai nai dengkeaung, lengseaung vang ai nai hawi takhra aly ngai naichi vui py, teaung u nai ne.
13 Tangka khau, tangka rahum, tangka baw hawi tangka mai takiprachi sa ai nai py, huni tangka hawi pipi teaung u y.
14 Kalop sa vangchi pei ai nai hawi, sa palum nai vawnsaichi van naira naini, huni tangkachi teaung nai ne.
15 Kalop sa naichi ai lu sa naichi ly khri pa-rei ka-ym awm nai khumichi ne nai deaungkho y, nichi ly pasum nai tangka vuikanai patei ai nai aly ngai y. Ref 12.15: 2 Areng 22:7
16 Kamngo ahui nai katalamra hawi kamngo pahen nai katalamrachi ra i nga nai tangka ai ly tengta theung y khai y naimy pathyp pi nai keungchi i vui ne. Ref 12.16: Lev 7:7
17 Huni neng khala y Suria samrang Hazaela ly kath mary y tiu i, pajau vui bo. Naibaly ni ly Jerusalem mary y tiu ai nai amsa nai thym khala,
18 Juda samrang Joasa ly mymy ny y rai khala i peang nai samrang Jehoshapha, samrang Jehoram hawi samrang Ahaziachi my, Areng teng y talam nai katalamrachi hawi my i talam nai katalamrachi py, Achura yhm hawi samrang yhm i awm nai mukuchi py la iy, langseaung palawn i, samrang Hazaela teng y pei nai ne. Huna nai khala Hazaela ly my i tavaimichi ai Jerusalem mary i nai anaw hai vui bo.
19 Samrang Joasa i atiti sa naichi ly Juda razavang cha-iu theung y tajiu pi typ nai ne.
20-21 Samrang Joasa i bangtang leaung nyhrei ly ni ai padei ai nai dawn paviu. Leaungrei nai ly Shimeath i chapo Jozakar ne; leaungrei nai ly Shomera i chapo Jehozaba ne. Nini ly Jerusalem mary nisi mang Silla avang y chei nai lamra awm nai khaileaungbu ra sa nai yhm y, ni ai padei hawi bo. Ni ai Davida mary y awm nai tapreaung y heung u. Naibaly ni i chapo Amazia ly ampo i meingtym y amtym i, samrang lawm bo.