4
Solomon i bangtangchi
1 Solomon ly Israela pri verei ai peang nai samrang;
2 ni i bangtangchi ly anui mang ichi ne:
Pathyp pi nai keung Zadok i chapo Azariah,
3 Samrang yhm i secretarychi ly Shisha
i chapo Elihore hawi Ahijah,
vuikanai kry nai keung ly Ahilud
i chapo Jehoshapha,
4 Tavailu areng keh ly Jehojada
i chapo Benajah,
Pathyp pi nai keungchi ly Zadok hawi Abiatha.
5 Khu peang nai kalen keh ly Nathan i chapo Azariah;
samrang ai tau pei nai keung ly Nathan
i chapo pathyp pi nai keung Zabud ne.
6 Samrang yhm i miseaungchi ai kalop pacheang nai keung ly Ahisha;
kalop ram pacheang nai keung ly Abda
i chapo Adoniram ne.
7 Solomon ly Israela pri y khu peang nai keung leaung holai nyhrei khai. Nichi ly leaungrei y lorei, samrang hawi samrang yhm i vui, mychi khura i teicha teineichi tha pi ai nai tla.
8 Huni khu peang nai keungchi hawi nichi i peang nai khuchi ly hinichi ne.
Benhura ly Ephraim mawitleaung pri,
9 Bendeka ly Makaza mary, Salabim mary,
Beth Shemesh mary, Elon mary hawi Beth Hanan mary;
10 Benhesi ly Aruboth mary,
Sokoh mary hawi Hepha khu ka-peang bawibawi ne.
11 Solomon i chaniu Taphath ai pom nai
Benabinada ly Dora khu verei y peang.
12 Ahilud i chapo Baana ly Taanach mary, Mekido mary raurei Abel Meholah marychi hawi Jokme mary y tym pa-rei awm nai khu ka-peang verei; huni khu ly Beth Shan mary hawi Zarethan mary sahawi Jezarela mary tokalawi mang y awm nai ne.
13 Benkeba ly Manase i chapo Ja-ira kangpreangchi my peang nai Kilead pri Ramoth mary hawi avangchi; Bashan pri Arakoba khu; mary apai hawi kheupaja apai katheu pa-kho angtleang tai nai mary pui vui tariureichi ai peang bo.
14 Iddo i chapo Ahinada ly Mahanaim mary ka-peang ai peang;
15 Solomon i chaniu Basemath ai pom nai Ahima ly Naphtali khu y peang.
16 Hushai i chapo Baana ly Aser khu hawi Bealoth mary ai peang.
17 Paruah i chapo Jehoshapha ly Isakha khu ai peang.
18 Ela i chapo Shimei ly Benjamin khu ai peang.
19 Uri i chapo Keba ly Amori samrang Sihon hawi Bashan samrang Oka i peang nai Kilead khu ka-peang;
hini khu ka-peangchi ai peang nai keung leaung holai nyhrei bo y, pri verei y peang nai keung kalenkeh leaungrei awm rai nai ne.
Solomon i tlamsa naimy peang nai sanengchi
20 Juda pri hawi Israela pri i mipuichi ly pangli peang i spryh jirei nawi nai ne. Nichi ly amo theu naimy cha nei iy awm u bo.
21 Solomon ly Euphrat tavo dengdairei Philistin pri hawi Aikupta pri khujyh khrairei awm nai pri bawibawichi ai peang nai ne. Huni prichi ly samrang teng y kahm pei u iy, samrang heng nai ryrei ly ni i anui y awm nai prichi lawm bo.Ref 4.21: Atiti 15:18; 2 Neng 9:26
22 Solomon i kanirei y ngai nai teicha teineichi ly tako dei teaung 300 rei, tako changkrym teaung 600 rei,
23 sisiu, sakhi, sumpajo hawi a-chi bo y, hai theung y khawn nai si horei, sui tlaira i si apomrei hawi beram chungvairei ne.
24 Solomon ly Euphrat tavo peang y awm nai Tiphsah mary dengdairei nidym mang i Kaza mary tym pa-rei, Euphrat tavo nidym ngan khu ka-peang bawibawichi peang bo. Euphrat tavo nidym mang i samrang bawibawichi ly ni i anui y awm naichi ne. Ni ly my i pri deaungpa prichi hawi py tlamsa naimy awm bo.
25 Ni i heng nai ryrei Juda pri hawi Israela pri verei y awm nai khumichi ly mychi yhm dengtheungchi i kreip akho hawi thaidu keung akhochi ra y tlamsa naimy awm u nai ne.
26 Samrang Solomon teng y keaungngochi khaira hai 40,000 rei hawi tavai keaungngochi khaira hai 12,000 rei awm. Ref 4.26: 1 Areng 10:26; 2 Neng 1:14, 9:25
27 Khu peang nai keung leaung holai nyhreichi ly samrang Solomon cha ai nai hawi samrang yhm i khumi bawibawichi i ngai nai teicha teineichi, lorei y leaung leaungrei my tha pi u ai nai tla bo. Nichi ly samrang yhm y ngai nai ngiereichi pei pi u jojo nai ne.
28 Khu peang nai keung bawibawichi ly mychi aphy nai kamta, choh hawi chohphichi py, tavai ka-ri ryh nai keaungngochi, keaungngo kano kasauchi i vui, ngai nai meingtymchira y tym pa-rei pei pi u bo.
29 Tameuh ly Solomon teng y lyh ai hawi nai cheng naira hawi lulip pany nai cheng naira py, dawn pajau y na pa-rei pany thai naira py pei pi nai ne.
30 Solomon ly nisi mang i khumi kachengchi hawi Aikupta pri i khumi kachengchi tleaung y py cheng.
31 Ni ly Ezarahi cheng Ethan tleaung y py, Mahola i chapochi napi nai Heman, Kalkola hawi Daradachi tleaung y py cheng keh. Ni ly khumi bawibawichi theung y cheng keh nai ne. Ni i cheng nai satang ly pri deaungpa tleirei y amthang bo.Ref 4.31: Sam 89 (Title)
32 Ni i tajiu nai leu kacheng 3,000 rei hawi khulym sang atlo awm. Ref 4.32: Leu kacheng 1:1, 10:1, 25.1; Solomon khulym 1:1
33 Ni ly Lebanon saitleang keungchi dengdairei, apaichira i amjang nai hupssop keung khrairei, dengkeaung katheang kalenchi ai khulym adi iy tajiu bo. Amso tawnbawichi, tavochi, ava iy heng nai amjy cheaungkhangchi hawi ngochi raurei py, khulym mang adi iy tajiu bo.
34 Khaileaung pri verei i samrang bawibawichi ly Solomon i cheng nai satang thai u nai khala, savaichi pato u iy ni i leuchi tangai u nai ne.