21
Naboth i kreip akho
1 Jezarela mary y awm nai samrang Ahab i yhm sahawi y, Naboth napi nai khumi i kreip akho awm.
2 Kanirei nai khala y Ahab my Naboth teng y, “Nang i kreip akho ai kai aly ngai; huni akho ly kai i yhm hawi py kasa nai ne i, huni khaileaungra y amti amjang bai sa ai nai ngai. Nang ai tuni akho bai tleaung y hawi keh nai kreip akho kang pei ai, ti y naimy nang ngai nabaly vang i py kang pei ai,” napi.
3 Naboth my,”Kai ly hini akho ai amsi pajochi teng i amtym nai deaungkho y, nang teng y pei ai nai ly Areng my paka na sy!” napi.
4 Ahab ly Naboth i leu molam y paleung ka-dawn hawi y; kado theu naimy yhm mang y vawi bo. Ni ly angpang mang y engleng i, ira tleaung y aseaung iy biu py cho y bo.
5 Ni i aju Jezabela ly ni teng y jeu iy, nang ly ati deaungkho y hina tanrei paleung hawi y nai awm lawh mo? Ati mana nai molam y cho nei y nai pa-rei awm lawh mo?” nanai deng.
6 Samrang my, “Ati mana nai mo nabaly kai ly Naboth teng y, nang i kreip akho kaimy van si, ti y baly ni i kreip akho jeng y takhra kreip akho hawi angtheung ai nai thui pi i py Naboth my, ‘hini akho ai ly nang teng y kang pei pajau y leang,’ ang napi lawh. Hunai deaungkho y kai ly paleung ka-dawn hawi y nai ne!” napi.
7 Jezabela my, “Nang ly Israela samrang ny y a? Aseaung naira i ang thau iy amo theu naimy cho nei ba; Naboth i kreip akho ly nang i kiu y kaimy kang-au ai!” napi.
8 Naibaly Jezabela ly cha tajiu iy Ahab i amyn y lamai nip i, samrang i pajawp typ nai ka-ma-ra hawi pajawp hai typ chum baly, Jezarela mary i khumichi ai lu sa nai keungchi hawi bangtangchi teng y pei.
9 Huni cha theung y ly “Nangchi ly kanirei biu hai iy khumi mipuichi ai palau achu; Naboth ai ly tahm asang nai atehra meingtym pei pi u.
10 Khumi hawi y nai leaung nyhrei ai Naboth i mo y ateh hai iy, ‘hini khumi ly Tameuh hawi samrang ai thui tamawn nai keung ne,’ nanai seu hawi na sy; naibaly huni khumi ai mary angam mang y patheu iy lengseaung hawi aphi u ka,” nanai ne.
11 Bangtangchi hawi Jezarela mary i khumichi ai lu sa nai keungchi ly Jezabela i leu pei nai kamta sa u bo.
12 Nichi ly biu hai ai nai kanirei thai hai chum baly mipuichi angym iy, Naboth ai tahm asang nai meingtym pei u bo.
13 Khumi hawi y nai leaung nyhrei my py, Tameuh hawi samrang ai thui tamawn nai molam y, Naboth ai mipuichi mo y seu u. Naibaly khumichi ly ni ai mary angam mang y patheu iy, lengseaung hawi aphi u ka nai ne.
14 Naibaly Jezabela teng y satang thai hai nai ly “Naboth ai padei veng bo,” napi.
15 Huni satang nga phai nga baly Jezabela ly Ahab teng y, “Naboth ly dei bo i, vai, nang chei ly nimy jo ai ngai y nai kreip akho lo vui jau,” napi.
16 Ahab my py huni akho peang vui ai nai, vaimy ang thau praw iy chei bo.
17 Naibaly Areng ly Tishbe mary y awm nai amo Elija teng y,
18 “Nang ly Samari mary i samrang Ahab teng y chei; ni ly Naboth i kreip akho la vui ai sa nai akho theung y ni ai avum ai mang.
19 Kai Areng my, ‘nang ly khumi ai padei nai bo y, ni i vawn la pi vui ai a?,’ nanai ni teng y thui pi; ‘Naboth i thi uichi my palei nai meingtym y, nang i thi py palei u ai,’ nanai thui nai leu py ni teng y amti pi!” napi.Ref 21.19: 1 Areng 22:38
20 Ahab ly Elija ai niu nai khala, “Kai i paleung ka-e awi, nang ly kai ai ka-vum sa nai a?” nanai deng.
Elija my, “Avum bo, nang ly Areng i mei ka-niu y kamngo sa ai nai, nangmy ai nangmy akhai takhra nai deaungkho y, avum ai nai kang jeu nai ne,” napi.
21 Hunai deaungkho y Areng my, “Kai ly nang i tlang tleaung y patang naira tym hai ai; nang ai kang pasyn vui iy nang i dengtheung katheang kalen neampacho ngiereichi ai py tamyh pawn ai.
22 Nang ly Israela mipuichi ai kamngo sa ai nai pahawi nai ne iy, nang i yhm dengtheungchi ly Neba i chapo samrang Jeroboam i yhm dengtheungchi hawi, Ahija i chapo samrang Baasa i yhm dengtheungchi kamta lawm ai.’
23 Jezebela i molam y Areng my, Jezarela mary y huni neampachy i veu ly uichi i teicha lawm ai. Ref 21.23: 2 Areng 9:36
24 Ni i amjo amnau bawibawichi py mary theung y dei baly uichi i teicha, mary angam mang y dei baly langnachi i teicha lawm u ai, nanai leu ang pei,” napi.
25 (Areng i mei ka-niu y khri pa-rei kamngo sa nai Ahab kamta ly leaungrei py by y; ni i sa nai sai bawibawichi ly samrangnu Jezabela i pachei nai leu molam y ne.
26 Ahab ly Amori pri khumichi i sa nai kamta, mynchi y chiu nai molam y khri pa-rei jei kaji ai hawi nai kamngochi sa bo. Amori khumichi ly Kanan pri y Israela chengchi kun u nai thym khala, Areng my patheu nai khumichi ne.)
27 Elija my hini leu thui pi pajau nai khala y Ahab ly mymy i ateaungchi sei vui iy, paisiu amchiu bo. Ni ly teicha py cho y naimy paisiu amchiu iy i bo. Aleaung ali nai khala py meimai takhuisui nai ne.
28 Areng ly amo Elija teng y,
29 “Kai i mei ka-niu y Ahab ly mana tanrei paleung apanem mo, nanai niu a? Ni ly nina tanrei apanem nai deaungkho y kai ly ni i deung y patang naira tym hai ai ny y. Ni i chapo deung, ni i yhm dengtheungchi i tlang tleaung y patang naira katym hai ai,” napi.