7
Akhean i kamngo
1 Israela chengchi ly taphra pawn ai tla nai vawnsai harei py lo moh, napi nai Areng i leu ai Akhen ly tangai y nai deaungkho y, Areng ly Israela chengchi i tlang tleaung y khri pa-rei kado theu bo. (Akhen ly Juda theaung Zerah yhm dengtheung Zabdi i katu, Kami i chapo ne.)
2 Josua ly Bethela mary nisi mang i Bethavan mary sahawi y awm nai A-i mary i awm nai sai khen paviu ai nai, khumi phyreichi ai Jeriko mary i dengdairei pato bo.
3 Nichi ly huna nai khen paviu chum baly Josua teng y vawi u i,” A-i mary ai tiu ai nai ly achi chei bawi ai nai ngai y leang; khumi leaung sang nyhrei, sang thomrei pato baly hawi bo. Tavaimi kamkawm verei pato ai nai aly ngai y. Huni mary ly mary kalen ny y leang,” nanai amti pi u bo.
4 Naibaly Israela cheng khumi leaung sang thomrei tahm ly huni mary ai tiu u. Na i py tavai sum u i, anaw u bo.
5 A-i mary i khumichi ly nichi ai mary apai pa-kho dengdairei, lengseaung tapiuchi awm nai meingtym ryrei tiu u i, mawi angthiura y Israela cheng leaung phai palyh tariurei vi padei iy, phyreichi ai langheng hawi u bo. Hunai deaungkho y Israela chengchi ly khri pa-rei paleung phra atho si u bo.
6 Josua hawi Israela lu sa naichi ly paleung bi nai y, mychi i ateaungchi sei u i, Areng i Leu Maikawm Pawm mo y paleung si nai, mychi i lu y spryh aprawn u naimy, kani dym pa-rei ambeu u bo.
7 Naibaly Josua my, “Salo kangteng Areng! kaichi ai ati mana nai y Jordan tavo angpeang hai lawh mo? Amori chengchi i kiu y au ai nai a? Kaichi ai tama hai ai nai a? Kaichi ly Jordan tavo vai mang y naini kaawm u jo baly hawi ai.
8 Aw Areng, Israela chengchi ly paleung ka-echi teng i dengdairei, preang ai nai tla lawh nai deaungkho y, kai ly ati kathui ai mo?
9 Kanan cheng dengdairei, hini pri y awm nai khumi bawibawichi ly huni satang thai u i, kaichi ai katanmeuh iy leaungrei py tleaung y na pa-rei ang tleh u ai. Huna nai khala, nang i nang parai nai sai khumichi my tahm panem y ai nai mana sa ai mo?” napi.
10 Areng my Josua teng y, “Angthau! Ati mana nai khaileaung y ambeu lawh mo?
11 Israela chengchi ly kamngo sa u bo. Nichi ly kai i leu pei nai tangai u y. Nichi ly taphra pawn ai nai vawnsai phyrei um paviu u lawh. Huni vawnsaichi paviu iy, ka-chawi thui naimy, mychi i vawnsaichi hawi vanrei khai u bo.
12 Hunichi deaungkho y Israela chengchi ly paleung ka-echi ai pajau y nai ne. Mychi naimy tama naira avum ai nai khumichi ne i, paleung ka-echi teng i dengdairei preang u nai bo. Nangchi ai lo moh, nanai leu kang pei i py, nangchi um vui nai vawnsaichi taphra pawn y baly, kai ly nangchi hawi vanrei awm ai ny y!
13 Angthau! khumichi ai kachai so hai ly khawndam kai i mo y kun ai nai angvei hai rym. Israela chengchi i Areng Tameuh my, hina nai leu pei nai ly thui pi; ‘Israela cheng bawibawichi awi, taphra pawn ai nai tla, napi nai kai i leu pei yb nai vawnsai phyrei nangchi teng y awm. Huni vawnsaichi ai nangchi taphra y nai ryrei ly nangchi ly paleung ka-echi i mo y angdo u pajau ai ny y!
14 Hunai deaungkho y khawndam khawn mang y, nangchi ly cheng theaung ka-thui theu u ai nai tla. Tamgbe avah nai cheng theaung ly nupai ka-thui mo mang y theu ai nai tla. Tambe avah nai yhm dengtheungchi ly leaung leaungrei mo mang y theu thli ai nai tla.
15 Naibaly taphra veng ai nai vawnsai um paviu nai keung, nanai tambe avah nai khumi ly kai i Leu Maikawm ai taphra iy, Israela chengchi ai kangji kangai nga hai nai deaungkho y, nihawi vanrei ni i yhm dengtheungchi ai py, mai hawi taphra pawn ai nai tla,’ ” nanai leu pei bo.
16 Khawn khutawi angthodyh y Josua ly Israela chengchi ai cheng theaung ka-thui theu hai i, Juda theaung y tambe avah bo.
17 Juda theaung theung i, nupaichi mo mang y theu nai khala, Zerah nupai tambe avah bi bo. Zerah nupai theung i yhm dengtheungchi ai mo mang y theu hai i, Zabdi i yhm dengtheungchi y tambe avah bo.
18 Naibaly Zabdi yhm dengtheung theung i leaung leaungrei ai mo mang y theu hai nai khala, Akhean teng y tambe avah; Ni ly Kami i chapo, Zabdi i katu ne.
19 Josua my ni teng y, “Deang awi, Israela chengchi i Areng Tameuh i mo y meitang khyp thui ba. Nang i sa nai saichi apha y naimy kai teng y thui pi ba,” napi.
20 Huna nai khala Akhean my, “Kai ly Israela chengchi i Areng Tameuh i tlang tleaung y kamngo sa tamang lawh bo.
21 Achi my tiu iy nga nai vawnsaichi theung i, apu parai nai Babulon ateaung, tangka kaji sie palyhrei vi hawi muku beang sierei chang y kyh nai niu i, paleung no nai deaungkho y ka-um vui nai ne. Kai i Tai theung y tangka ai anui kehra y khai iy um me bo,” nanai pathang.
22 Huna nai khala Josua ly khumi phyrei ai pato i, nichi ly Akhean i Tai mang y angpreng u. Tai theung y Akhean i thui nai kamta, taphra ai nai vawnsaichi niu u bo.
23 Nichi ly huni vawnsaichi ai Josua hawi Israela cheng bawibawichi teng y tym hai i, Areng i mo y khai u bo.
24 Josua hawi Israela cheng bawibawichi ly Akhean hawi vanrei, tangka, ateaung hawi muku beangchi ai py, ni i cho chanauchi, si, beram, keaungngo kano kasau, Tai hawi ni i yhm dengtheung ngiereichi ai py, patang naira leaunghawi mang y pahawi u bo.
25 Josua my Akhean teng y, “Nang ly ati mana nai kaichi teng y patang naira tym hai lawh mo? Vai ly Areng my nang i tlang tleaung y patang naira tym hai ai,” napi. Naibaly Israela cheng bawibawichi ly Akhean ai lengseaung hawi aphi iy padei u bo. Ni i dengtheungchi ai py, lengseaung hawi aphi iy padei u chum baly, ni i vawnsaichi hawi vanrei mai leng u bo.
26 Nichi my Akhean i veu tleaung y, lengseaungchi pakheng hai cheng bo. Huni lengseaung pakheng nai ly vaini khrairei awm jo nai ne. Hunichi molam y huni meingtym ai ‘Patang naira leaunghawi’ nanai vaini khrairei amyn pathi nai ne. Naibaly Areng i kado theu nai ly rym bo.